கனவு காண்பவள்…

**ayyasamy ram** · **ayyasamy ram** Sat Jan 02, 2016 3:45 am

1.
ஆரஞ்சு வண்ண உடைகளை
ஆரஞ்சு வண்ணப் பொருள்களை
ஆரஞ்சு வண்ண வாகனங்களை
விரும்புகிற ஒருத்தி
தன்னுடைய கனவுகளிலும்
ஆரஞ்சு வண்ணத்தைக் காணவே
விரும்பினாள்
–
ஆரஞ்சு வண்ணம் என்பது
அவளுடைய கற்பனைகளுக்கு
வசீகரத்தையும்
புதுப்புது அனுபவத்தையும்
தருகிறதாக நம்புகிறாள்
கூடவே
நினைவில் கொள்ள வேண்டிய
அவளுடைய காயங்களின்
ஆறாத கணங்களையும்.

2.
மீண்டும் மீண்டும்
அவள் அந்தக் கனவைக் காண விரும்பினாள்

மூடிய கண்களுக்குள் காணுதல்
அவளுக்கு அறிமுகமாகிய ஒரு நாளில்
உறங்கும் பொழுது கண்ட கனவுகளுக்கு
அர்த்தம் அறிந்து கொண்டாள்

இப்பொழுதெல்லாம்
பிடிபடாமல் போவதும்
தொடர்பறுந்து போவதுமான
தன்னுடைய இரவின் கனவுகளுக்கு
மூடிய இமைகளுக்குள்
ஒளிரும் சொற்களை உணர்ந்து கொள்கிறாள்
என்பதால்
மீண்டும் மீண்டும்
அவள் அந்தக் கனவைக் காண விரும்பினாள்
காணவும் செய்கிறாள்.

3.
துரத்தலும்
தப்பித்தலுமாக
அலைந்துகொண்டே இருந்தாள்

கருணையற்று
குத்திக் கிழிக்கும்முட்களுக்குள்
ஓடி ஒளியவேண்டியதாக இருந்தது
அவளின் பாதை முழுக்க
கூரிய சுக்கான் கற்களும் நிறைந்திருப்பதால்
அத்தனை எளிதாக இல்லை
அவளது நடையும் ஓட்டமும்

யானையைப் பிடிப்பதற்கு வெட்டிவைத்த
பெரும் பள்ளமொன்றில் விழுகிறாள்

அதிர்ந்து விழிக்கிறாள்
கனவு போலவே இல்லை.

4.
நள்ளிரவுக்கு பிந்தி
அவளுக்கு விழிப்பு வரும்
என்றாலும்
நள்ளிரவுக்கு பிந்திய கனவுகளை
ஒருபோதும் அவள் கலைக்க விரும்புவதேயில்லை

அதுவரையிலான
அவளுடைய கனவுகளை மறக்கடித்து
பின்னிரவில் தனக்குள் பேசிக்கொண்டிருக்கும்
தன்னுடைய கனவுகளை
அவதானிக்க தொடங்கிய பிறகு
தாழ் திறந்து வழிவிடும்
முடிவற்ற வெளியில் பயணிக்கும்
பின்னிரவு கனவுகளைப் புரிந்துகொள்ள
தொடர்கிறாள்
உறக்கத்தையும் அவளின் பால்ய ரகசியங்களையும்.
–
——————————–
சக்திஜோதி
நன்றி – காலச்சுவடு இதழ்

K.Senthil kumar · K.Senthil kumar Sat Jan 02, 2016 4:59 am

**பழ.முத்துராமலிங்கம்** · 27/09/2015

Sponsored content · Sponsored content

கனவு காண்பவள்…

கனவு காண்பவள்…

Re: கனவு காண்பவள்…

Re: கனவு காண்பவள்…

Re: கனவு காண்பவள்…

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக