அவளின் கண்ணீர் முத்துக்கள்!!

kandhasami saravanan · kandhasami saravanan Tue Dec 29, 2015 4:20 pm

இரவு உறக்கம் என்னை தழுவ நினைத்து-கண்
இமைகளிடம் ஆணையிட்டு - என்
இரு விழிகளையும் திரையிட்டு மறைக்கும்
இந்த ஏகாந்தவேளையில்......

என்னவளே - உன்
இனிமையான நினைவுகளுடன்
இரவின் தாக்கத்தில் எனைமறந்து
உறக்கத்தில் ஆழ்ந்த போது....

நீயும் நானும் நிலவின் மடியில்
நீண்ட நேரம் உரையாடிய போது - உன்
நீளவிழி பார்வையினால் என்னை
நீபார்த்த சில துளிகளின் நினைவும் ....

தூரப்பயணம் சென்று -நான்
திரும்பிய அந்நாளில் - நீ
தூரமாகவே நின்று என் மீது
தொடுத்த கோபக்கனை பார்வையும் ....

விளையாட்டாய் நான் உன்னை
விரும்பவில்லை என்று சொல்ல - உன்
விழிகள் இரண்டிலும் உதிர்ந்த
வெண் கண்ணீர் முத்துக்கலானது ....

உறக்கத்தில் ஆழ்ந்த என்னை
உரக்க அழைத்து சொல்லுதடி-உன்
உயிரானவள் ஒருத்தி உனக்காக
உறக்கமற்று காத்திருக்கிறாள் என்று!

நீங்காத நினைவுகளுடன்.....
க.சரவணன்