பெண் குழந்தைகளை கவுரவிக்கும் 'பொன்னூஞ்சல்' விழா

]
பெண் குழந்தைகளை கவுரவிக்கும் 'பொன்னூஞ்சல்' விழா
By Dinakaran, 26 Dec 2015 12:22 PM

தாராபுரம்: தாராபுரம் அருகே பெண் குழந்தைகளை பெருமைபடுத்தும் வகையிலான 'பொன்னுாஞ்சல்' திருவிழா நேற்று நடந்தது. இதில் நுாற்றுக்கும் மேற்பட்ட பெண்
குழந்தைகள் பொன்னுாஞ்சலில் அமரவைக்கப்பட்டனர்.

திருப்பூர் மாவட்டம் தாராபுரம்அருகே சங்கரண்டாம்பாளையம் உள்ளது. மன்னர்களின் ஆட்சி காலத்தில் இந்த ஊர் தேன்கரைநாடு என அழைக்கப்பட்டது. இப்பகுதியில் கொங்கு வேளாளர்ள் 24 குலத்தவர்களுக்கும் முதன்மைகுலமாக மரியாதை செய்யும் வகையில் பெரியகுலம் சார்ந்த பட்டக்காரர்களுக்கு மூவேந்தர்களும் தங்கள் பிரதிநிதித்துவத்தை வழங்கி இப்பகுதியின் ஆட்சி பொறுப்பையும் வழங்கினர்.

மேலும் இக்குலத்தில் பிறந்த பெண்களுக்கு பொன்னூஞ்சலில் அமர்ந்தும்,
பூந்தேர் பவனி வரவும் உரிமைகளை வழங்கினர். இந்த வரலாற்று சிறப்பை நினைவு
கூறும் வகையில் கடந்த 300 ஆண்டுகளாக பொன்னுாஞ்சல் விழா இந்த கிராமத்தில் நடத்தப்படுகிறது.

3 ஆண்டுகளுக்கு ஒருமுறை திருவாதிரை நாளன்று நடத்தப்படும் இவ்விழா நேற்று நடந்தது. சங்கரண்டாம்பாளையம் பட்டக்காரர் பாலசுப்பிரமணிய வேணாவுடையார் நிகழ்ச்சிக்கு தலைமை வகித்தார். விழாவை முன்னிட்டு பெரியநாயகிஅம்மன் கோவிலில் அம்மனுக்கு சிறப்பு அஷேக ஆராதனை நடத்தப்பட்டன.

தொடர்ந்து 10 வயது நிரம்பிய இளம் சிறுமிகள் ஊர்வலமாக அழைத்து வரப்பட்டு அமராவதி
ஆற்றில் குளிக்கவைத்து பின் சிறுமியை அம்மனாகவே பாவித்து புத்தாடை அணிகலன்,
மாலை அணிவித்து, தாய் மாமன் முறையுள்ளவர்கள், தங்க தகட்டல் சிறுமிக்கு பட்டம் கட்டி,
தனது தோல்களில் ஏற்றி தாரை,தப்பட்டை, கொம்பு வத்தியங்கள் முழங்க பட்டாக்காரர் அரண்மனையை நோக்கி ஊர்வலமாக அழைத்துவந்தனர்.

தொடர்ந்து அரண்மனை முற்றத்தில் பொன் தகடுகளால் வேயப்பட்ட அலங்கார ஊஞ்சலில் அமர வைக்கப்பட்டு அம்மன் தாலட்டு பாட, ஊஞ்சலை அசைத்து பெண் குழந்தைகளுக்கு மரியாதை செலுத்தினர்.

இதன்பின் உறவினர்கள் புடை சூழ விருந்து மண்டபங்களுக்கு அழைத்து செல்லப்பட்டு
அனைவருக்கும் அறுசுவை உணவு அளித்து மகிழ்ந்தனர்.

இந்த ஆண்டு நடைபெற்ற விழாவில் 170 க்கும் மேற்பட்ட பெண் குழந்தைகள் பொன்னூஞ்சல் ஆடினார். விழாவில் தமிழகம் மட்டுமல்லாமால் ஆந்திரா, கர்நாடகா,கேரள மாநிலங்களிலிருந்தும் ஜெர்மனி, அமெரிக்கா நாடுகளிலிருந்தும் இக்குலத்தை சேர்ந்தவர்கள் குடும்பத்தினருடன் கலந்து கொண்டனர்.

நன்றி-டெய்லிகண்ட்