கப் கேக் காதல்..!

ஒருநாள் அசோக் பில்லர் ஆஞ்சனேயர் கோயில்
பக்கத்துல நின்று கொண்டிருந்தேன். நிமிர்ந்து பார்த்தா
நகுல் அக்கா தேவயாணி.

வெளிநாடு போறதுக்காக சாமி கம்பிட்டுவிட்டு அப்பதான்
நகுல் ஏர்போர்ட் போய்க்கிட்டிருந்தார்.
–
நான் உடனே போன் பண்ணி ‘அக்கா முன்னாடி நிற்குறாங்க?’னு
சொன்னேன். உடனே ‘போனை அக்காகிட்ட போய் குடு’னு
சொன்னார். எனக்கு தூக்கிவாரிப் போட்டது. முன்னப் பின்ன
அறிமுகமே இல்லாத ஒரு பொண்ணு.. திடீர்னு போய் போனை
நீட்டினா என்ன நினைப்பாங்க? என பயம். இருந்தாலும் தைரியமா
போய் போனை அவங்ககிட்ட கொடுத்து ‘உங்க தம்பி பேசுகிறார்’னு
சொன்னேன்.
–
அவங்களுக்கு ஒண்ணுமே புரியல. என்னது? என் தம்பியா?
உன் போன்ல எப்படி? என்கிற குழப்பதோடு யோசிச்சுக்கிட்டே
போனை வாங்கி பேசினாங்க. ‘அக்கா, இந்தப் பொண்ணுதான்
நான் லவ் பண்றேன். நல்லா இருக்காளானு பார்த்துச் சொல்லு?’னு
அவர் சொன்னதும் ரொம்ப மரியாதையா என்னைப் பத்தி
விசாரிச்சாங்க. சினிமாவுலகூட இப்படியொரு லவ் எண்ட்ரி சீனை
நீங்க பார்த்திருக்கமாட்டீங்க என்றபடி நகுல் தோள்பட்டையை
ரொமாண்டிக்காக தட்டுகிறார் ஸ்ருதி-நகுலின் வுட்பி.
–
எப்படி இந்த மாதிரியொரு தைரியம்?
அக்கா தப்பா எடுத்துக்க மாட்டாங்களா? என்று நகுலை கேட்டோம்.
–
‘நாங்க அப்படிதாங்க? எங்க ஃபேமிலியே கொஞ்சம் டிஃபரண்ட்டான
ஃபேமிலி. கண்டுக்காதீங்க’ என்று சொல்லிவிட்டு நாக்கை மெல்லமாக
கடிக்கிறார் நகுல்.
–
‘ஆக்சுவலி எங்களுக்குள்ள காதல் வருவதற்கு தஸ்லிமா ஆன்டிதான்
காரணம். அடிக்கடி அவங்க நகுலைப் பத்தி சொல்லிக்கிட்டே
இருப்பாங்க. ‘பேக்ரி குக்கிங்’ல நான் எக்ஸ்பர்ட் லண்டன் போய்
அதுக்காகவே படிச்சுட்டு வந்திருக்கேன். ஒருநாள் நான் கப் கேக்
வீட்ல செஞ்சு ஆன்ட்டிக்கு கொடுத்தனுப்பினேன். அதை அவங்க
நகுலுக்கு கொடுத்திருக்காங்க. சாப்பிட்டவர் ‘செம டேஸ்ட்டா இருக்கே,
யாரு செஞ்சது?’னு கேட்டிருக்கிறார். அவங்க நம்ம ஸ்ருதிதாண்டானு
சொல்லவே ஓகே.. நானே கூப்பிட்டு பாராட்டுறேன்னு முன்னப்பின்ன
தெரியாத என்னை போனில் கூப்பிட்டு பாராட்டினார்.

அப்படித்தான் எங்க அறிமுகம் முதல்முதலாக நடந்தது!’
என ஐந்தாண்டு கால காதல் கதைகளை ரீவைண்ட் அடிக்க ஆரம்பித்தார்
ஸ்ருதி.

ஸ்ருதியோட போன்ல அறிமுகம் ஆன பிற்பாடு ஏதோ எங்களுக்குள்ள
ஃப்ரெண்ட்ஷிப்பை தாண்டின ஒரு ரிலேஷன்ஷிப் இருப்பதைப் போல
உணர்ந்தேன். ஒருநாள் நானே அவங்க வீட்டுக்கு பார்க்க வந்தப்ப என்
லவ்வை சொல்லிட்டேன். ரியலி, ரியலி ஸோ ஸ்வீட் ஸ்ருதி என ஆச்சர்யம்
அடங்காமல் அடுக்கிக் கொண்டே போகிறார் நகுல்.

வீட்ல எப்படியோ, அம்மாவுக்கு அரசல்புரசலாக தெரிஞ்சு போச்சு, யாருடி?
உண்மையைச் சொல்லுனு அடிக்கடி கேட்டுக்கிட்டே இருந்தாங்க. நான்
படிப்பு முடிஞ்சதும் வேலைக்குப் போய்ட்டு சொல்லிக்கலாம்னு இருந்தேன்.

ஒரு ஃபைவ் ஸ்டார் ஹோட்டலில் செஃப்பா ஜாயிண்ட் பண்ணதும் வீட்ல
அம்மாகிட்ட சொன்னேன். உடனே போனை போட்டு அவங்க கையில
கொடுத்தேன். முதல்ல மறுத்தவங்க வைக்காம ஒன்றரை மணி நேரம்
பேசினாங்க. நகுலுக்கு ஹிந்தி தெரியும். அம்மாவுக்கும் ஹிந்தி தெரியும்.

ரெண்டு பேரும் ஹிந்தியிலயே பேசிக்கிட்டாங்க. எனக்கா சுத்தமா புரியல.
என்னடா பேசிக்கிறாங்கனு மண்டை காய்ஞ்சுபோய் நின்னேன்.
கடைசியில அம்மா போனை கட் பண்ணிட்டு நல்லபையன்டீனு சொன்னாங்க.
அப்பாடானு பெருமூச்சுவிட்டேன் என விழிகள் தெறிக்க விட்டுவிட்டு
விவரிக்கிறார் ஸ்ருதி.

இவரின் அப்பா ஏ.வி. பாஸ்கர் பிரபல புகைப்படக் கலைஞர்.
அவரும் அமைதியாக அருகில் எல்லா கதைகளையும் ஒரு கனவுபோல
கேட்கிறார். இடையிடையே ரன்னிங் கமெண்ட்ரியையும் கொடுத்துக்
கொண்டே இருக்கிறார். அவ்வளவு நட்பான அப்பா! அப்புறமென்ன காதல்
என்ன தப்பா?
–
———————————

– கடற்கரய்
குமுதம்