கொசுக்களை விரட்டும் வீட்டுத்தோட்ட செடிகள்

-
வீட்டில் தோட்டம் அமைத்து பராமரிப்பது இன்பம் தரக்கூடியது. வீட்டையும் அழகாக உயர்த்திக்காட்டும். வீட்டில் பல்வேறு பகுதிகளிலும் செடிகளை வளர்க்கலாம். குறிப்பிட்ட இடத்தில் தோட்டம் அமைத்தாலும் வீட்டின் உட்புறங்கள், வரவேற்பு அறைகள், பால்கனிகள், மாடிப்படிகள் போன்ற இடங்களில் செடிகளை வளர்ப்பது வீட்டிற்கு அழகூட்டுவதாக அமையும்.

இட வசதி

வீட்டுத்தோட்டத்தின் பயன்பாடு என்பது அளப்பரியது. வீட்டில் உள்ள எல்லோரையும் கவர்ந்திழுப்பது. பலவகைகளிலும் பயன் தரக்கூடியது. தற்போது வீட்டுத்தோட்டம் அமைப்பதை அனைத்து தரப்பினரும் விரும்புகின்றனர். செடிகள், கொடிகள், மரங்கள் என எல்லா வகைகளையும் ஒரு சிறு செயல்பாட்டுக்குள் ஒருங்கிணைத்து சிறப்பாக வளர்த்திட முடியும். அதற்கு சரியான திட்டமிடலும், இட வசதியும் தேவை.

அதற்காக இடவசதி அதிகமாக இருக்கவேண்டும் என்ற கட்டாயம் இல்லை. தரைப்பகுதியில் மட்டுமில்லாமல் வீட்டின் மாடிப்பகுதியிலும் தோட்டத்தை அமைக்கலாம். எங்கு அமைத்தாலும் பயனுள்ள செடிகளை பயி ரிடுகிறோமா? என்பது தான் முக்கியம். வீட்டிற்கு பயன்பாட்டிற்கான செடிகளாக இருக்க வேண்டியது அவசியமானது. கீரை வகைகள், காய்கறிகள், பழங்கள் என்று வீட்டுத்தோட்டத்தின் விளைப்பொருட்கள் இருக்க வேண்டும்.

மூலிகை செடிகள்

காய்கறிச் செடிகளை தேர்வு செய்யும் முன் அவை அங்கு வளருமா? என்று முன்பே தெரிந்து வைத்திருக்க வேண்டும். இதெல்லாம் போக சில மூலிகை செடிகளை வளர்ப்பது சில உடனடித் தேவைகளுக்கு பயன்படும். சிறு சிறு செடிகளில் அதிக அளவிலான சத்துக்களும், நோய் எதிர்ப்பு தன்மையும் இருப்பதை நம் முன்னோர்களின் வழிகாட்டுதலின் படி அறிவோம்.

அந்தவகையில் அவற்றை பயன்படுத்தி கொள்வது நல்லது. நிறைய மூலிகை செடிகள் அதிக அளவு சிரத்தை கொடுக்காமலேயே சிறப்பாக வளரும் தன்மை உடையது. இவைகளை வீட்டில் தாராளமாக வளர்க்கலாம். இந்த மாதிரியான மூலிகைச்செடிகளில் நிறைய நன்மைகள் உள்ளன.

கொசுக்களை விரட்டும்

வீடுகளில் இரவில் மிக முக்கிய தொல்லையாக அமைவது கொசுக்கள் தான். எத்தனை விதமான முயற்சிகளுக்கும் ஈடுகொடுக்கும் கொசுக்களை விரட்ட போராட வேண்டியிருக்கும். இந்த பிரச்சினைக்கு வீட்டுத்தோட்டம் மூலம் வழி காணலாம். சில வகை செடிகளை வீட்டில் வளர்க்கும் போது கொசுக்களின் வரவு அறவே தடுக்கப்படுகிறது. வேம்பு, நொச்சி, சாமந்தி, ரோஸ்மேரி, சிட்ரநெல்லா, ஏஜ்ரேடம் போன்ற செடிவகைகள் கொசுக்களை விரட்டும் வேதிப்பொருட்களை இயற்கையாவே கொண்டுள்ளன.

இவை எளிமையானது மட்டுமில்லாது செயற்கை ரசாயனக் கலப்பு ஏற்படுவதையும் தவிர்த்திடுகிறது. சிலருக்கு ரசாயன கொசு விரட்டிகளை பயன்படுத்துவதால் மூச்சுத்திணறல் கூட உருவாகும். இந்த இயற்கை செடிகள் இவற்றையெல்லாம் தடுக்கிறது. இவை கொசுக்களால் தாங்கிக்கொள்ள முடியாத சிலவகை இயற்கை ரசாயனங்களை கொண்டுள்ளதால் இவை கொசுக்களுக்கு பேரடியாக அமைந்திடும். இவற்றை வீட்டில் வளர்ப்பதால் எந்த வித பாதிப்பும் ஏற்படபோவதில்லை. இவற்றை பராமரிப்பதும் எளிது தான்.

பசுமை சூழல்

வீட்டின் வாசல், பால்கனிகள், ஜன்னல்கள் போன்ற இடங்களில் இந்த செடிகளை தொட்டிகளிலோ அல்லது வேறு வகையான பயிரிடல் மூலமாகவோ முறையாக அமைத்து கொள்ளலாம். அந்தவகையில் வீட்டின் கட்டுமானத்தின்போதே இந்த செடிகளை வளர்ப்பதற்கு ஏதுவான சரியான கட்டுமான அமைவுகளை ஏற்படுத்திக்கொள்வது நல்லது.

இச்செடிகளால், கொசு தொல்லைக்கும் தீர்வினை ஏற்படுத்திவிடலாம். அதே நேரத்தில் செடிகளின் வாயிலாக வீட்டில் பசுமை சூழல் எப்போதும் இருக்கும் என்பதால் பார்ப்பதற்கும் அழகாக இருக்கும். ஒரே செயல்பாட்டின் மூலம் இருவகையான பயன் களை எளிதாக அடைந்திட முடியும். எக்காரணத்தைக் கொண்டும் அதிக பொருட் செலவை உண்டு பண்ணாத செடிவளர்ப்பு எல்லா பருவத்திற்கும் ஏற்றது.

பாதிப்பு இல்லை

இந்த செடிகளினால் கொசுக் களை மட்டுமில்லாமல் வீட்டினுள் நுழைந்து பாதிப்பை ஏற்படுத்தும் சிறு உயிரினங்களின் ஆதிக்கத்தையும் தடுக்கலாம். இவற்றில் அத்தகைய வல்லமை கொண்ட இயற்கை ரசாயனங்கள் இருக் கின்றன. இவற்றால் மனிதனுக்கு எத்தகைய பாதிப்பும் இல்லை.

குறிப்பாக கழிவு நீர் உள்ள இடங்களில் அதிகம் கொசுக்கள் உருவாகும். இந்த செடிகளை வீட்டில் கழிவு நீர் வெளியேற்றம் இருக்கும் இடங்களில் நடவு செய்யலாம். அவை அங்கு கொசுக்கள் உற்பத்தியாவதையும் தடுக்க ஏதுவாகும்.

–

தினத்தந்தி

நன்று

ayyasamy ram wrote:
குறிப்பாக கழிவு நீர் உள்ள இடங்களில் அதிகம் கொசுக்கள் உருவாகும். இந்த செடிகளை வீட்டில் கழிவு நீர் வெளியேற்றம் இருக்கும் இடங்களில் நடவு செய்யலாம். அவை அங்கு கொசுக்கள் உற்பத்தியாவதையும் தடுக்க ஏதுவாகும்.
தினத்தந்தி

மேற்கோள் செய்த பதிவு: 1177897