வெள்ளத்தால் பாதிப்பு - நிவாரண செய்திகள்...

-
பலத்த மழையின் காரணமாக, தாம்பரத்தில் ஏற்பட்ட
வெள்ளத்தால் பாதிக்கப்பட்ட பகுதிகளில் இருந்து கடந்த 24 மணி
நேரத்தில் 12,995 பேர் பத்திரமாக மீட்கப்பட்டுள்ளனர் என்று
காஞ்சிபுரம் மாவட்ட சிறப்புக் கண்காணிப்பாளர் கே.ராஜாராமன்
கூறினார்.
-
சென்னை, காஞ்சிபுரம் உள்ளிட்ட மாவட்டங்களில் வெள்ள மீட்புப்
பணிகளை ஒருங்கிணைக்க சிறப்புக் கண்காணிப்பாளர்களாக
16 ஐ.ஏ.எஸ். அதிகாரிகளை நியமித்து முதல்வர் ஜெயலலிதா
அண்மையில் உத்தரவிட்டிருந்தார். இதன்படி, அவர்கள் வெள்ள
மீட்புப் பணிகளில் ஈடுபட்டு வருகின்றனர்.
-
இந்த நிலையில், சென்னையை அடுத்த தாம்பரம், அதைச் சுற்றியுள்ள
பகுதிகளில் நடைபெற்ற வெள்ள மீட்புப் பணிகள் குறித்து செவ்வாய்க்
கிழமை நடைபெற்ற செய்தியாளர்கள் சந்திப்பில் காஞ்சிபுரம்
மாவட்டத்துக்கான சிறப்புக் கண்காணிப்பாளர் ராஜாராமன் கூறியதாவது:
-
தாம்பரம் சுற்றுவட்டாரப் பகுதிகளான சி.டி.ஓ. காலனி, ஸ்ரீசாய் காலனி,
சமத்துவ பெரியார் நகர், அன்னை அஞ்சுகம் நகர், முடிச்சூர், வரதராஜபுரம்,
மகாலட்சுமி நகர், பாரதி நகர் ஆகிய பகுதிகளில் உள்ள வீடுகளை மழை
வெள்ளம் சூழ்ந்தது. இந்த வீடுகளில் இருந்தவர்கள் வெள்ளம் காரணமாக
வெளியேற முடியாமல் தவித்து வந்தனர்.
-
இதையடுத்து, அவர்களை மீட்பதற்கு துரித நடவடிக்கைகள் எடுக்கப்பட்டன.
அனைத்து அரசுத் துறை அலுவலர்களையும் ஒருங்கிணைத்து அமைக்கப்பட்ட
நான்கு குழுக்கள் மூலம் வெள்ளப் பகுதிகளில் சிக்கியவர்களை மீட்கும் பணி
துரிதப்படுத்தப்பட்டது.
-
மீட்புப் பணிகளில் 6 கடலோரப் பாதுகாப்புப் படை, விமானப் படை,
ராணுவ ஹெலிகாப்டர்கள் ஈடுபடுத்தப்பட்டன. வெள்ளத்தில் உயிர் தப்பி
வீட்டு மாடிகளில் தஞ்சம் அடைந்த மக்களுக்கு ஹெலிகாப்டர்கள் மூலம்
4 ஆயிரம் உணவு பொட்டலங்கள், குடிநீர் பாட்டில்கள் வழங்கப்பட்டன.
-
தாம்பரம் சுற்றுவட்டாரப் பகுதிகளில் அனைவரும் மீட்கப்பட்டு,
99 சதவீத மீட்புப் பணிகள் நிறைவடைந்துள்ளன.
-
23 பேர் சாவு:
இந்தப் பகுதிகளில் தேங்கி இருக்கும் வெள்ளநீர் 3 நாள்களுக்குள் வடிந்து
விடும் என்று எதிர்பார்க்கப்படுகிறது. அடுத்தகட்டமாக பாதிக்கப்பட்டவர்களுக்கு
நிவாரண உதவி, மழைநீர், கழிவுநீர்த் தேக்கத்தால் ஏற்படும் சுகாதாரப் பாதிப்பைத்
தடுக்கும் நடவடிக்கை, இதர கட்டமைப்பு, போக்குவரத்து பணிகளை மேற்கொள்ளத்
திட்டமிடப்பட்டுள்ளோம்.
-
இதுவரை காஞ்சிபுரம் மாவட்டத்தில் மழைக்கு 23 பேர் உயிரிழந்துள்ளனர்.
6 பேர் வெள்ள நீரில் அடித்துச் செல்லப்பட்டுள்ளனர் என்றார் அவர்.
-
தினமணி

அடையாறு, கூவம், கொசஸ்தலையாறு ஆற்றுப் பகுதிகளில் வசித்துவந்த
25 ஆயிரம் பேர் எந்தவித ஆபத்துமின்றி ஒரே நாள் இரவில் மீட்கப்பட்டு,
நிவாரண முகாம்களுக்கு அனுப்பப்பட்டனர் என சென்னை மாநகராட்சி
தெரிவித்துள்ளது.
-