அல்லிராணி !

**M.Jagadeesan** · **M.Jagadeesan** Wed Oct 14, 2015 9:52 am

மாமரத் தோப்பினிலே அல்லிராணி ! – ரெண்டு
...மயில்வந்து ஆடுதடி அல்லிராணி !
தேமதுரக் குரலெடுத்து அல்லிராணி ! – ரெண்டு
...குயிலங்கே பாடுதடி அல்லிராணி !

அரசமரக் கிளையினிலே அல்லிராணி ! – ரெண்டு
...அணில்ஓடி ஆடுதுபார் அல்லிராணி !
சரசங்கள் செய்திடுவோம் அல்லிராணி ! – உன்
...சம்மதம்தான் வேண்டுமடி அல்லிராணி !

கடலலைகள் ஒன்றையொன்று அல்லிராணி ! –ஓடிக்
...காதலிக்கும் அழகைப்பார் அல்லிராணி !
உடலாலும் உயிராலும் அல்லிராணி ! – என்
...ஒருவனுக்கே நீசொந்தம் அல்லிராணி !

கதிரவனின் வருகைக்காய் அல்லிராணி ! – தாமரைக்
...காத்திருக்கும் வான்நோக்கி அல்லிராணி !
மதிமயங்கிப் போகுதடி அல்லிராணி ! – இந்த
...மாலைநேரம் வந்தாலே அல்லிராணி !

நினைவெல்லாம் நீயாக அல்லிராணி ! – என்
...நெஞ்சினிலே நிற்கின்றாய் அல்லிராணி !
மனையாட்டி நீயாக அல்லிராணி ! – என்
...மனம்மகிழ வந்திடுவாய் அல்லிராணி !