சிரியாவில் துருக்கி, அமெரிக்கா வான் தாக்குதல் 50–க்கும் மேற்பட்ட ஐ.எஸ். தீவிரவாதிகள் பலி

இஸ்தான்புல்,
-

-

சிரியாவில் துருக்கி, அமெரிக்கா நடத்திய வான் தாக்குதல்களில் 50–க்கும் மேற்பட்ட ஐ.எஸ். தீவிரவாதிகள் பலியாகி விட்டனர்.

தத்தளிக்கும் சிரியா
மேற்கு ஆசிய நாடான சிரியாவில் ஒருபுறம் அதிபர் பஷார் அல் ஆசாத்துக்கு எதிரான கிளர்ச்சி 4–வது ஆண்டாக நீடித்து வருகிறது. இன்னொரு புறம் ஐ.எஸ். தீவிரவாதிகள் முக்கிய நகரங்களை கைப்பற்றிக்கொண்டு, ஆதிக்கம் செலுத்தி வருகின்றனர்.

சிரியா அரசைப் பொறுத்தமட்டில், இரு தரப்பையும் சமாளிக்க வேண்டிய நெருக்கடியில் தத்தளித்து வருகிறது.

அமெரிக்க கூட்டுப்படைகள்
கிளர்ச்சியாளர்களுக்கு எதிராக அதிபர் ஆதரவு படைகள் தாக்குதல் நடத்தி வருகிற வேளையில், ஐ.எஸ். தீவிரவாதிகளுக்கு எதிராக அமெரிக்க கூட்டுப்படைகள் அங்கு வான்தாக்குதல்களை நடத்தி வருகின்றன.

கடந்த ஜூலை மாதம், சிரியாவில் ஐ.எஸ். தீவிரவாதிகளுக்கு எதிரான நடவடிக்கையில் தீவிரமாக இறங்கப்போவதாக துருக்கி அறிவித்தது. அது முதற்கொண்டு, அமெரிக்காவுடன் துருக்கியும் கை கோர்த்தது. துருக்கியும் அங்கு வான்தாக்குதல்களை நடத்தி ஐ.எஸ். தீவிரவாதிகளை ஒடுக்கும் நடவடிக்கையில் ஈடுபட்டு வருகிறது.

துருக்கியின் விமான தளங்களை அமெரிக்கா பயன்படுத்தி, வடக்கு சிரியாவில் உள்ள ஐ.எஸ். தீவிரவாதிகளை அழித்து வருகிறது.

6 விமானங்கள் குண்டுமழை
இந்த நிலையில், நேற்று முன்தினம் துருக்கியில் உள்ள இன்சிர்லிக் விமானப்படை தளத்தில் இருந்து துருக்கியின் 6 போர் விமானங்கள் (எப்–16 ரகம்) புறப்பட்டு சென்று, ஐ.எஸ். தீவிரவாதிகள் ஆதிக்கம் செலுத்தி வருகிற பகுதிகளில் குண்டு மழை பொழிந்தன.

ஏறத்தாழ 5 மணி நேரம் இந்த வான் தாக்குதல் நீடித்தது.

ஆளில்லா விமான தாக்குதல்
இதற்கிடையே அமெரிக்காவின் ஆளில்லா விமானம் ஒன்றும் தாக்குதல் தொடுத்தது.

கிலிஸ் மாகாணத்தில், சிரிய எல்லையில் 5 கி.மீ. உள்ளே சென்று நடத்தப்பட்ட இந்த தாக்குதல்களில் ஐ.எஸ். தீவிரவாதிகளுக்கு பெருத்த பின்னடைவு ஏற்பட்டுள்ளது.

ஒரே நேரத்தில் துருக்கியும், அமெரிக்காவும் நடத்திய இந்த தாக்குதல்களில் ஐ.எஸ். தீவிரவாதிகள் நிலை குலைந்து போயினர். 50–க்கும் மேற்பட்டவர்கள் கொல்லப்பட்டனர். 30–க்கும் மேற்பட்டவர்கள் படுகாயம் அடைந்தனர்.

ஐ.எஸ். தீவிரவாதிகளின் முகாம்கள் பல அழிக்கப்பட்டதாகவும் அங்கிருந்து வரும் தகவல்கள் தெரிவிக்கின்றன.

துருக்கியில் நேற்று பாராளுமன்ற தேர்தல் நடந்தது. அந்த தேர்தல் பரபரப்புக்கு மத்தியிலும் சிரியாவில் துருக்கி போர் விமானங்கள், ஐ.எஸ். தீவிரவாதிகளுக்கு எதிரான நடவடிக்கையில் இறங்கியது குறிப்பிடத்தக்கது.
=
தினத்தந்தி

ஐ.எஸ்.தீவிரவாதிகள் 225 பேரை விமானத்தை சுட்டு வீழ்த்தி கொன்று குவித்து கொக்கரித்தனர்.இன்று அவர்கள் அழிக்கபட்டனர் இதற்கு தீர்வு தான் என்ன? ஆயுத தாக்குதல் இதை சாதித்து விடுமா? வன்முறை இரண்டு பக்கத்திற்கும் தீர்வாக இருக்க முடியாது.

வன்முறை தீர்வல்ல ஆனால் முள்ளை முள்ளால் தான் எடுக்க வேண்டும் இது சரி தான்

பழ.முத்துராமலிங்கம் wrote:ஐ.எஸ்.தீவிரவாதிகள் 225 பேரை விமானத்தை சுட்டு வீழ்த்தி கொன்று குவித்து கொக்கரித்தனர்.இன்று அவர்கள் அழிக்கபட்டனர் இதற்கு தீர்வு தான் என்ன? ஆயுத தாக்குதல் இதை சாதித்து விடுமா? வன்முறை இரண்டு பக்கத்திற்கும் தீர்வாக இருக்க முடியாது.

ஐஎஸ் தீவிரவாதிகள் பற்றி நீங்கள் இன்னும் கொஞ்சம் தெரிந்துகொள்ளவேண்டும் ஐயா. இவர்களிடம் ஆயுததாக்குதலை தவிர வேறு ஒன்றும் பயனளிக்காது அதனால் தான் பெரும்பாலான இசுலாமிய நாடுகளே இவர்களை வெறுக்கின்றனர்.