திறமையானவர் சமந்தா எல்லோரும் விரும்பும் நடிகை நயன்தாரா..!!

-
‘‘திறமையான நடிகை சமந்தா, எல்லோராலும் விரும்பப்படும் நடிகை நயன்தாரா’’ என்று தனுஷ் கூறினார்.
–
நடிகர் தனுஷ், ‘டுவிட்டரில்’ ரசிகர்களின் கேள்விகளுக்கு பதில் அளித்தார். அப்போது ரஜினிகாந்த், விஜய், அஜித், விக்ரம், நயன்தாரா, சமந்தா ஆகியோரைப்பற்றி தன்னுடைய கருத்துக்களை வெளியிட்டார். அவர் கூறியதாவது:-

—

நான் ரஜினி ரசிகன்

–
‘‘விஜய், அஜித் ஆகிய இருவரையும் நான் மிகவும் நேசிக்கிறேன். அவர்களை பின்பற்றவும் செய்கிறேன். இருவரிடம் இருந்தும் நிறைய கற்றுக்கொண்டு இருக்கிறேன். ஆனாலும் யார் ரசிகன்? என்று என்னை கேட்டால், நான் ரஜினி ரசிகன்.

சூர்யா கடின உழைப்பை வெளிப்படுத்தக்கூடிய நடிகராக இருக்கிறார். மற்றவர்களையும் ஊக்கப்படுத்தி வருகிறார். தமிழ் படவுலகில் எனக்கு பிடித்த ‘டான்சர்’ விஜய். அவருடைய படத்தில் கவுரவ தோற்றத்தில் நடிக்கும்படி என்னிடம் கேட்டால் கண்டிப்பாக நடிப்பேன்.

விஜய்-அஜித்

அஜித் கம்பீரமானவர். விஜய், அஜித் படங்களை தயாரிக்கும் வாய்ப்பு எனக்கு கிடைத்தால், அதை பெரிய மரியாதையாக கருதுவேன். விக்ரமை பார்த்து நான் வளர்ந்தேன். அவர், கடினமாக உழைக்கிறார். நிறைய விஷயங்களை அவரிடம் இருந்து கற்றுக்கொண்டு இருக்கிறேன். மிக எளிமையானவர். இனிமையானவராகவும் இருக்கிறார்.

சமந்தா திறமையான நடிகை. அவருடன் இணைந்து நடித்து இருக்கிறேன். அது இனிமையான அனுபவமாக இருந்தது. நயன்தாரா எல்லோராலும் விரும்பப்படும் நடிகையாக இருக்கிறார். அவரைப்பற்றி வேறு என்ன சொல்வதற்கு இருக்கிறது?

செல்வராகவன்

எனது அண்ணன் செல்வராகவன் இயக்கத்தில் மீண்டும் நடிப்பீர்களா? என்று கேட்கிறார்கள். அது கூடிய சீக்கிரம் நடக்கும்.

வில்லன் கதாபாத்திரங்கள் எனக்கு மிகவும் பிடிக்கும். ஹாலிவுட் நடிகர் ஜாக் நிக்கல்சனின் வில்லத்தனமான நடிப்பை ரசிப்பேன். நான் நடித்த மாரி படத்தின் இரண்டாம் பாகத்தை எடுக்க பேச்சு வார்த்தை நடக்கிறது.

ரஜினிகாந்த் படங்களின் தலைப்புகளை என் படங்களுக்கு தொடர்ந்து வைப்பது பற்றி கேட்கிறார்கள். நான் அந்த பெயர்களை தேடிப்போகவில்லை. தானாக அமைகிறது.

குஷ்பு- சிம்ரன்

பள்ளி, கல்லூரியில் படித்த காலத்தில் எனக்கு பிடித்த நடிகைகள் குஷ்பு, சிம்ரன். எனக்கு பிடித்த விஜய் படம் ‘கில்லி’, பிடித்த அஜித் படம் ‘தீனா’.
–
இவ்வாறு தனுஷ் கூறினார்.

–நன்றி- தினத்தந்தி