இந்தியாவில் போலோ கார்களை விற்க விதிக்கப்பட்ட தடைக்கான காரணம் வெளியானது

ஜெர்மனியின் முக்கிய கார் தயாரிப்பு நிறுவனமாக விளங்கிய ‘வோக்ஸ்வேகன்', அதன் டீசல் கார்களில் செய்த, மாசு கட்டுப்பாட்டு முறைகேடுகளைப் பற்றிய தகவல் கடந்த மாதம், அமெரிக்க சுற்றுச்சூழல் பாதுகாப்பு முகமையான இ.பி.ஏ., மூலம் வெளிவந்தது.

இதில், வோக்ஸ்வேகன் நிறுவனம் உலக அளவில் விற்பனை செய்த ஒரு கோடியே பத்து லட்சம் டீசல் கார்களில், மாசு கட்டுப்பாட்டு அளவை மென்பொருள் மூலமாக குறைத்துக் காட்டி முறைகேடு செய்துள்ளது என, இ.பி.ஏ., குற்றஞ்சாட்டியது. இதனை அடுத்து டீசல் கார்களில் செய்த மோசடியால், பாதிக்கப்பட்ட ஒரு கோடியே பத்து லட்சம் கார்களைக் கண்டறிந்து அவற்றின் எஞ்சின்களை மாற்றித் தருவதாக அறிவித்துள்ளது.

இந்நிலையில் சில நாட்களுக்கு முன் இந்தியாவில் அதிகம் விற்பனையாகும் சிறிய ரக கார்களில் முக்கிய இடம் வகிக்கும் போலோ கார்களின் விற்பனையை நிறுத்திவைக்கும்படி வோக்ஸ்வேகன் நிறுவனம் அதன் டீலர்களுக்கு உத்தரவிட்டது. ஏற்கனவே முன்பதிவு செய்யப்பட்டுள்ள கார்களையும் டெலிவரி கொடுக்க வேண்டாம் எனவும் அறிவுறுத்தியது.

வோக்ஸ்வேகனின் இந்த அறிவிப்பால் போலோ கார்களில் ஏதேனும் மோசடி நடந்திருக்குமோ என்ற சந்தேகம் எழுந்து. இந்நிலையில் இந்தியாவில் விற்கப்பட்ட போலோ கார்களின் கை பிரேக்கில் ஏற்பட்டுள்ள பிரச்சனை காரணமாகதான் இந்தியாவில் போலோ கார்களின் விற்பனையை நிறுத்திவைக்கும்படி கூறியதாக தெரிவித்துள்ளது வோக்ஸ்வேகன்.

குறிப்பிட்ட அழுத்தத்தில் கை பிரேக்கின் ஒயர்கள் அறுந்துவிடலாம் என்பதை வோக்ஸ்வேகன் நிறுவனம் கண்டறிந்ததாகவும், அதன் காரணமாகவே இந்தியாவில் விற்கப்பட்டுள்ள 389 கார்களை சரி செய்வதற்காக அவற்றை திரும்ப அழைத்துள்ளதாகவும் அந்நிறுவனம் கூறியுள்ளது. மேலும் விற்பனைக்கு தயாராகவுள்ள போலோ கார்களில் இந்த பிரச்சனை சரி செய்யப்பட்டதும், மீண்டும் போலா கார்காளின் விற்பனை தொடங்கும் எனவும் அந்த நிறுவனம் தெரிவித்துள்ளது. -maalaimalar