சனி மகா பிரதோஷம்

ChitraGanesan · ChitraGanesan Fri Oct 09, 2015 4:59 pm

நாளை (10.10.15) - சனி மகா பிரதோஷம்

பிரதோஷ தினத்தில் சனிப்பிரதோஷமே சிறந்ததாகும். அதுவே கிருஷ்ணபட்சத்தில் (தேய்பிறை) சனிக்கிழமையில் வந்தால் "மஹா பிரதோஷம்" என்று வழங்கப்படுகிறது.

11ம் பிறையாகிய ஏகாதசியில் ஈசன் விஷம் உண்டார். 12ம் பிறையாகிய துவாதசியில் காட்சி தந்தார். 13ம் பிறையாகிய திரயோதசி மாலை பிரதோஷ காலத்தில் நடன தரிசனம் தந்தார். சிவபெருமான் விஷம் உண்டு நீலகண்டன் ஆன நாள் சனிக்கிழமையாகும். எனவே, சனி பிரதோஷம் மகத்தான சிறப்பு வாய்ந்தது.

விரத முறை :

இந்த நாட்களில் அதிகாலை எழுந்து நீராடி, சிவாலயம் சென்று வழிபட வேண்டும். அன்று முழுவதும் உணவின்றி உபவாசம் இருந்து திருமுறைகளைப் படிக்க வேண்டும்.

பிரதோஷ நேரமான மாலை 4.30 மணிக்கு சிவாலயம் சென்று உள்ளம் உருகி ஐந்தெழுத்தை (சிவாய நம) ஓதி வழிபட வேண்டும்.

நந்தி தேவரது தீபாராதனைக்குப் பின் மூலவரான லிங்கத்திற்கு நடக்கும் தீபாராதனையை நந்தியின் இரண்டு கொம்புகளுக்கிடையே பார்த்து தரிசித்து, பஞ்சாக்ஷரம் ஓதி வழிபட நம் தோஷங்கள் நீங்கி சர்வ மங்களங்களும் உண்டாகும்.

பலன்கள் :

பிரதோஷ நாளில் நந்திதீஸ்வரருக்கு அருகம்புல் மாலை இட்டு நெய் விளக்கு ஏற்றி காப்பரிசி படைக்க சகலவிதமான துன்பங்களும் நீங்கும் என்பது ஐதீகம்.

சனிப் பிரதோஷத்தன்று வழிபடும் போது ஐந்து வருடம் ஆலய வழிபாடு செய்த பலன் கிடைக்கும் என்பது ஆண்டாண்டு காலமாக இருந்து வரும் நம்பிக்கை.

சனிப்பிரதோஷ வழிபாடு செய்தால் 108 சிவ பூஜை செய்த பலன்கள் கிடைக்கும்.