தொண்டுக்கு நாம் செய்த துரோகம்

பண்டைய தமிழ் எண்ணியலில் ஒன்பது என்ற சொல்லே கிடையாது .பரிபாடலிலும் , வேறுசில சங்க இலக்கியங்களிலும் எட்டுக்கு  அடுத்துப் பயன்படுத்தப் பெற்றுள்ள சொல் “ தொண்டு “ என்பதாகும் . “ தொண்டு “ என்றால் துளை அல்லது ஓட்டை என்று பொருள் . “ சுவரில் தொண்டி இடு “ என்றால் “ சுவரில் ஓட்டை போடு “ என்று பொருள் .

இருநிழல் படாமை மூவே ழுலகமும் ‘
ஒருநிழல்  ஆக்கிய ஏமத்தை மாதோ
பாழெனக் காலென பாகென ஒன்றென
இரண்டென மூன்றென நான்கென ஐந்தென
ஆறென ஏழென எட்டென தொண்டென

.......................................................................-பரிபாடல்

“ தொண்டு “ தலையிட்ட பத்துக்குறை எழுநூற்று

.................................................................................தொல்காப்பியம்- 1358

“ தொண்டு “ படு திவாவின் முண்டக நல்யாழ்

................................................................................- மலைபடுகடாம் -21

இந்தத் “ தொண்டு “ என்ற சொல் எப்படியோ தன் இடத்திலிருந்து வீழ்த்தப் பெற்றுவிட்டது .

இந்தத் “ தொண்டு “ என்ற சொல்லை அதற்குரிய இடத்தில் வைத்து எண்ணியலை வரிசையாகச் சொல்லிப் பார்த்தால் ஒரு பெரிய குழப்பமே தெளிவாகும் . அதாவது

8.............எட்டு
9.............தொண்டு
10 ..........பத்து
80 .........எண்பது
90 .. ......தொண்பது
100........நூறு
800....  .எண்ணூறு
900  .....தொண்ணூறு
1000  .. ஆயிரம்
8000...  எண்ணாயிரம்
9000 ..  தொள்ளாயிரம்
10000. ..பத்தாயிரம்
80000  ..எண்பதாயிரம்
90000... தொன்பதினாயிரம்
100000-இலட்சம்

ஆக தொண்டு என்ற இடத்தில் ஒன்பது வந்து உட்கார்ந்த காரணத்தினால் ,தொண்பது என்ற இடத்தில் தொண்ணூறு வந்து உட்கார்ந்துகொண்டது . தொண்ணூறு என்ற இடத்தில் தொள்ளாயிரம் வந்து உட்கார்ந்துகொண்டது . தொள்ளாயிரம் வரவேண்டிய இடத்தில் ஒன்பதினாயிரம் வந்து உட்கார்ந்துகொண்டது . தொன்பதினாயிரம் இருக்கவேண்டிய இடத்தில் தொண்ணூறாயிரம் வந்துவிட்டது . முதல் கோணல் முற்றும் கோணல் என்பதுபோல இந்தச் சிக்கல் எண்ணியலின் இறுதிவரையில் பாதித்துள்ளது .

பள்ளியில் மாணவர்கள் ஆசிரியரிடம் , நூறு தொடங்கும் முன்பாக தொண்ணூறு எதற்கு வந்தது என்று கேட்டால் ஆசிரியரால் பதில் சொல்ல இயலாது . ஆயிரம் வரும் முன்பாகத் தொள்ளாயிரம் வரலாமா என்று கேட்டால் அதற்கும் ஆசிரியரால் பதில் சொல்ல இயலாது . இந்தக் குழப்பம் யாரால் , எப்படி வந்தது என்று யாராலும் விடைசொல்ல இயலாது .

நன்றி : கண்டதும் கேட்டதும் –கனகசுப்பு ரத்தினம் .