துடிப்பு

முனைவர் ப.குணசுந்தரி · 18/07/2015

ஓரம் சுருங்கினாலும்
பாவாடையின் ஒரு பகுதி
சொருகப்பட்டே இருக்கும்.

உடற் சிதைய
வாயிலிருந்து நீர்
ஒழுகிக்கொண்டே இருக்கிறது.

புதிய புடவை
எடுப்பாகத்தான் இருக்கிறது.
விரும்பி வாங்கியதாக
அமுலு அழுதாள்.

உலுத்ததால் சார்த்தப்பட்ட
மரமென நிற்கிறான் அண்ணன்.

கதிரை மேய்ந்ததற்காக
வெகு தூரம் ஓட்டிச் சென்றாலே
கழனிக்காரனுக்குச்
சாபம் கொடுக்கிறவள்
என்ன நினைத்தாயோ

இனி பட்டியிலிருந்து
ஒவ்வொரு ஆடும்
அறுபட்டுவிடும்.

வேண்டாம் என்றாலும்
பிற்பகலில் பரபரக்கும்
பெண்களைக் கண்டதும்
வந்துவிட்டது புரிந்தது.

குழப்பமாக இருக்கிறது
இவர்கள் எப்படி இங்கு!

தம்பியின் சுற்றமோ!
அவன் முந்திக் கொண்டால் என்ன
உன் சாதி தானே
எல்லோரும்
ஒத்துப் போனபிறகு ஏனோ!..

ஏரிக்கரையில்
சுழன்றுவரும் காற்றுக்கே
தெய்வங்களைக் கூப்பிடுபவள்

இயக்கம் நின்ற
நிறுத்திய உடலங்களுடன்
எப்படி இருந்தாய் ஒன்றரை நாள்.

இவ்வளவு நேரம் இவள்
உள்ளேதான் இருந்தாளோ
குழந்தை
பிறந்ததும் இறந்துவிட்டதாமே?
கட்டிக் கொண்டவன் மொறைக்கிறான்
சும்மா பார்த்துக் கொண்டிருக்கட்டும்
ஊராரின் சலுகையில்
உட்கார்ந்து கொண்டாள் அருகே

எல்லோரையும்
பார்த்துவிட்டுத்தான் வந்தாயாமே?

பக்கவாதத்தால்
முடங்கிவிட்ட அப்பா உன்னையே
பார்த்துக் கொண்டிருக்கிறார்
அது அலமரல்.

பஞ்சாயத்தில்
சண்டை போட்டாயாம்
அவமானமாக நினைத்தாயா?

உன்னை அறிந்தவள் நான்
வெறிப்பதில்
நெஞ்சு வலிக்கிறது.

எல்லோருடைய பார்வையும்
தம்பிமீது தான்
உன்னை விலக்காதபடியே
நடக்கிறான் பார்.

நீ உழைத்துப் போட்டதற்கு
ஊராரைச் சாட்சியமாக்கி
ஒப்பாரி வைக்கிறாள் அம்மா.

உனக்கு எப்படியோ
எனக்குப் பிடிக்கவேயில்லை.

இது என்ன
அவசர அவசரமாய்
அலங்காரமோ?

வந்தார் வருவார்
யாரையும் பார்க்கவில்லை
எண்ணெய் தேய்த்து, நீர் தெளித்து
பொட்டு,பூ வைத்தாயிற்று
துணையாம்
கோழியும் வந்துவிட்டது.

பரவாயில்லை
முன்னேமாதிரி இல்லை
ஒருவேளை
எருக்கம் கிடைக்கலையோ

உன் வெட்கம்
எங்கு போனது?
தலையிலிருந்து கால் முடிய
இறுகக் கட்டியிருக்கிறார்கள்.

புடவை கட்டியதில்லை
இன்றுதான் பார்க்கிறேன்
போர்த்திய நிலையில் .

எல்லோரும்
குழுமியிட்ட ஓலத்தில்
தம்பியின் அழுகை
தனியாகக் கேட்கிறதடி

முடிந்து விட்டது.
நடக்கையில் கேட்கிறது
நீ போவது.

விளங்கவில்லை!

இயக்கத்தை
நிறுத்தத் துணிந்த நீ
இயங்க
முயற்சிக்கவில்லையே?

(வார்ப்பு மின்னிதழில் வெளிவந்தது)
முனைவர் ப. குணசுந்தரி தர்மலிங்கம்