பெட்ரோல், மின்சாரம்,'சோலார்'மூன்றிலும் ஓடும் ஒரே 'பைக்'

**T.N.Balasubramanian** · **T.N.Balasubramanian** Sat 26 Sep 2015 - 21:07

பெட்ரோல், மின்சாரம்,'சோலார்'மூன்றிலும் ஓடும் ஒரே 'பைக்'

திண்டுக்கல்:பெட்ரோல், மின்சாரம், 'சோலார்,' ஆகிய 3 எரிபொருளிலும் ஓடும் 'பைக்கை' திண்டுக்கல் எஸ்.எஸ்.எம்., பொறியியல் கல்லுாரி மாணவர்கள் கண்டுபிடித்துள்ளனர்.
பெட்ரோல், எலக்ட்ரிக்கல் (மின்சாரம்) இதில் ஏதாவது ஒன்றில் இயங்கும் 'பைக்குகள்' தான் தற்போது புழக்கத்தில் உள்ளன. சிலசமயங்களில் எரிபொருள் குறைவதை கவனிக்காவிட்டால் வாகனம் இடையில் நிற்க வாய்ப்புள்ளது. இதை தடுக்கும் வகையில் பெட்ரோல், எலக்ட்ரிக்கல், 'சோலார்' ஆகிய மூன்றிலும் இயங்கும் 'பைக்கை' திண்டுக்கல் எஸ்.எஸ்.எம்., பொறியியல் கல்லுாரி ஆட்டோமொபைல் துறை கண்டு பிடித்துள்ளது.உதவி பேராசிரியர் விவேக்குமார் வழிகாட்டுதலில் மாணவர்கள் அஜித்குமார், திலீப், அருண்பிரசாத், ஆண்டனிபாலன், ஆசிக்ஜலாலுதீன், அஜீத்கண்ணன் கண்டுபிடித்தனர்.
அவர்கள் கூறியதாவது: நாங்கள் கண்டுபிடித்த 'பைக்கில்' பெட்ரோல், மின்சாரம் தீர்ந்துபோனாலும் 'சோலார்' மூலம் இயக்க முடியும். ஐந்து நிமிடம் சூரிய ஒளியில் 'ரீசார்ஜ்' செய்தாலே 3 கி.மீ., வரை செல்லலாம். வாகனத்தின் முன்புறம் 'சென்சார்' உள்ளது. இது வாகன முகப்பு விளக்கை இரவு நேரத்தில் தானாக எரிய வைக்கும். பகல் நேரத்தில் அணைத்து விடும். எதிரே வாகனங்கள் வந்தால் தானாகவே விளக்கு 'டிம்மாகி' விடும். அலைபேசியை 'சார்ஜ்' செய்யும் வசதியும் உள்ளது, என்றனர்.

நன்றி தினமலர்

ரமணியன்