ஆசிரியரை நினைவுகூர்ந்த உ.வே.சா.

கற்றுக் கொடுத்த ஆசிரியர்களை எவ்வளவு நாளைக்கு
மறக்காமல் இருக்கிறோம்? கல்லூரிக்குச் சென்றதும்
பள்ளி ஆசிரியர்களையும் வேலையில் சேர்ந்ததும்
கல்லூரி ஆசிரியர்களையும் மறந்து விடுகிறோம்.
-
ஆனால் தன்னுடைய ஆசிரியரின் 201வது பிறந்த
ஆண்டை ஒரு மாணவன் நினைவு கூர்ந்த விழா அது.
-
தமிழ் வளர்த்த அந்த ஆசிரியரும் மாணவரும் வரலாறு
ஆகி பலகாலம் ஆயிற்று.
ஆனாலும், சென்னை, உ.வே.சாமிநாதய்யர் நூலகம்
ஏற்பாடு செய்திருந்த தமிழ்த்தாத்தா உ.வே.சா.வின்
ஆசிரியர் "மகாவித்துவான்' மீனாட்சி சுந்தரம் பிள்ளையின்
201வது பிறந்த ஆண்டு விழாவை, "உ.வே.சா. அவரது
ஆசிரியருக்கு எடுத்த விழா' என்றாலும் தகும்.
-
விழாவுக்கு தலைமை தாங்கிய தினமலர் ஆசிரியர்
இரா. கிருஷ்ணமூர்த்தி, "உ.வே.சா.வும் மீனாட்சி சுந்தரம்
பிள்ளையவர்களும் 19, 18ம் நூற்றாண்டில் தமிழ்த்
தொண்டாற்றிய முக்கியமான தலைவர்கள்.
அப்போதெல்லாம் திண்ணைப் பள்ளிக்கூடங்கள்தான்.
மாணவர் - ஆசிரியர் உறவும் பயமும் பக்தியும் கலந்ததாய்
இருந்திருக்கிறது.
-
தன்னுடைய ஆசிரியர் பெயரையே உச்சரிப்பதற்குத்
தயங்கியவராய் "ஆசிரியர் பிரான்' என்றே உ.வே.சா.
குறிப்பிட்டிருக்கிறார். அத்தகைய பெருமகனார்களை
நினைவு கூர்கிற வகையில் நடக்கிற நிகழ்ச்சியில் கலந்து
கொண்டது உண்மையிலேயே மிகுந்த மகிழ்ச்சி தருகிறது'
என்றார்.
-
உ.வே.சாமிநாதய்யருக்கு பெற்றோர் வைத்த பெயர்
வெங்கட்ராமன். மூதாதையர் பெயர் என்பதால்,
தாய் தந்தையர் மரியாதை கருதி அந்த பெயரில்
அழைக்கத் தயங்கி "சாமிநாதன்' என்றே
அழைத்திருக்கிறார்கள்.

இதைத் தெரிந்து கொண்ட மீனாட்சி சுந்தரம் பிள்ளையும்,
"தாய் தந்தையர் வாய் நிறையக் கூப்பிடத்தான் பெயர்.
அவர்களால் அழைக்க முடியாத பெயர் எதற்கு?
இந்தப் பெயர் நன்றாக இருக்கிறதே! நானும் இப்படியே
அழைக்கிறேன்' என்றாராம்.
-
ஆசிரியர் அழைத்த பெயரே பிற்காலத்தில் நிலைத்து
விட்டதில் "தமிழ்த்தாத்தா' நிச்சயம் மகிழ்ந்திருப்பார்' என
அன்றைய கால நிகழ்வுகளை நினைவு கூர்ந்தனர்,
விழாவில் கலந்து கொண்ட சான்றோர் பெருமக்கள்.
-
உவேசா நூலகச் செயலாளர் முனைவர் தி. சத்தியமூர்த்தி,
முன்னாள் தமிழ்பல்கலை துணைவேந்தர் முனைவர்
இ. சுந்தரமூர்த்தி, "ஞானாலயா' பா. கிருஷ்ணமூர்த்தி என
மேலும் சில மூர்த்திகளால் கீர்த்தி பெற்ற அறிமுக
விழாவைத் தொடர்ந்து கருத்தரங்கம்.
-
மூன்று அமர்வுகளாக நாள் முழுக்க நடந்த நிகழ்வில்
மீனாட்சி சுந்தரம் பிள்ளையின் பன்முக மாட்சி, கடிதங்கள்,
மகாவித்வானும் தமிழ்தாத்தாவும், 19ம் நூற்றாண்டுக்
கல்வி மரபுகள், வித்வானின் யாப்பு, செய்யுள் நலன் எனப்
பல்வேறு தலைப்புகளில் விவாதங்கள் அரங்கேறின.
-
முத்துக்குமாரசுவாமி தம்பிரான், முனைவர் ய. மணிகண்டன்,
உலகநாயகி பழனி உள்ளிட்ட அறிஞர் பெருமக்கள் வழங்கிய
கருத்துக்கள் உ.வே.சா. மீனாட்சி சுந்தரம் பிள்ளை தாண்டி,
பழந்தமிழர் நாகரிகம், கல்வி, கலாச்சாரம் என நிறையவே
எடுத்துரைத்தன.
-
-----------------------------
அய்யனார் ராஜன்
தினமலர்

ஓடினாய் ஓடினாய் ஓலைச் சுவடிகளைத்
தேடியே நித்தமும் கால்சலித்தாய் - வாடும்
பயிருக்குப் பெய்த மழைபோல் தமிழின்
உயிர்செழிக்க வந்தவனே வாழ்க .