கண்ணன் பிறந்தான் !

**M.Jagadeesan** · **M.Jagadeesan** Sat Sep 05, 2015 9:54 am

தேவகி மகனாகப் பிறந்தாயே !- யசோதையின்
...செல்ல மகனாக வளர்ந்தாயே !
கோவர்த்தன கிரியை எடுத்தாயே !-குடையாகப்
...பிடித்து ஆயரைக் காத்தாயே !

ஆவணி அட்டமியில் பிறந்தாயே !- விஷ்ணுவின்
...எட்டாம் அவதாரம் ஆனாயே !
கோவிந்தன் என்றபெயர் கொண்டாயே !- கோதை
...ராதையின் உள்ளத்தைக் கவர்ந்தாயே !

காலிங்க நர்த்தனம் செய்தாயே !- மாமன்
...கம்சனைப் போரிட்டுக் கொன்றாயே !
ஆலிங்கனம் செய்ய குக்மணியை - உந்தன்
...அருகினிலே வைத்து மகிழ்ந்தாயே !

பஞ்சவர்க்காய்த் தூது சென்றாயே ! - அந்தப்
...பார்த்தனுக்குச் சாரதியாய் நின்றாயே !
வெஞ்சமரில் விஜயனுக்குச் சொன்னாயே - அந்தச்
...சொன்னமொழி கீதையெனச் செய்தாயே !

திரௌபதியின் மானம் காத்தாயே !- பார்த்தனை
...நாகாஸ்திரம் தாக்காது மீட்டாயே !
துரியோதனன் தன்னைக் கொல்வதற்குப் - போரில்
...துணையாகப் பீமனுக்கு நின்றாயே !

சின்னசின்ன அடிவைத்துக் கண்ணா நீ !- எங்கள்
...சிறுகுடில் வந்திடுவாய் கண்ணா நீ !
வண்ண வண்ண உடைஉடுத்திக் கண்ணா நீ ! - எங்கள்
...வாசலுக்கு வந்திடுவாய் கண்ணா நீ !

வெண்ணை சீடை முருக்கென்று - நல்ல
...வெல்லமிட்டுச் செய்த அப்பத்தால்
கண்ணனை நாமும் வழிபடுவோம் - அந்தக்
...கார்முகில் வண்ணனை வணங்கிடுவோம் .