ஆசிரியர் தினம் .

**M.Jagadeesan** · **M.Jagadeesan** Fri Sep 04, 2015 8:51 pm

ஏணிக்கு ஆயுத பூஜை என்றாவது செய்தோமா ?
ஏணிபோல் இருந்து நம்மை ஏற்றிவிட்ட ஆசிரியரை
ஏணியின் உருவத்தில் இனியாவது காண்போம் !

உன்னுடைய உயர்வைக் கண்டு
உடன்பிறப்புகள் , நண்பர்கள் பொறாமைப் படலாம் - ஆனால்
உண்மையிலேயே அகமகிழ்வது ஆசிரியர் மட்டுமே !

பிரம்புகளால் அழகிய அறைகலன்களை மட்டுமல்ல
சிறந்த குடிமகன்களையும் உருவாக்கமுடியும் என்று
நிரூபித்துக் காட்டுபவர் ஆசிரியர்தாம் !

தாரமும் குருவும் தலைவிதிப் படியே ! -என்பர்
உன் தலைவிதி நன்றானால் அப்துல் கலாம்
போன்றவர்கள் உனக்கு ஆசிரியராய் அமைவர் !

மாணவர்களுக்கு என்றோ ஒருநாள் தேர்வு -ஆனால்
ஆசிரியர்க்கோ தினம்தினம் தேர்வுதான் !
மாணவனுக்காகத் தினமும் படிப்பவனே - நல்லாசிரியன் !

மாதா ,பிதா , குரு ,தெய்வம் - கால்களில்
விழுந்து ஆசி பெறுங்கள் - ஆனால் கண்டவர்களின்
காலில் விழுந்து உங்களைக் களங்கப்படுத்திக் கொள்ளாதீர் !

ஒருநாட்டின் தலைவிதி வகுப்பறையின் நான்கு
சுவர்களுக்குள் தீர்மானம் செய்யப்படுகின்றன - உன்னுடைய
தலைவிதியை தீர்மானம் செய்வது நால்வர் மட்டுமே !

எழுத்தறிவித்த இறைவனை என்றும் நினைவில் வைப்போம் !
இந்நாளில் ஆசான் இருக்கும் திசைநோக்கி வணங்குவோம் !
வாழ்க ஆசிரியர்கள் ! வளர்க அவர்தம் தொண்டு !