டாஸ்மாக் கடையில் மது அருந்தும் ஆடு: ஈரோட்டில் அதிசயம்

டாஸ்மாக் மது மனிதர்களை மட்டுமல்ல விலங்கினங்களையும் அடிமைப்படுத்தியுள்ளது என்பதற்கு சான்றாக ஈரோடு மாவட்டத்தில் ஒரு சம்பவம் நடந்துள்ளது

ஈரோடு மாவட்டம் கோபி அடுத்த டி.என்.பாளையம் பகுதியில் ஒரு ஆடு டாஸ்மாக் மதுவை ருசித்து குடித்து வருகிறது.

டி.என்.பாளையம் மெயின்ரோடு அருகே டாஸ்மாக் உள்ளது. இங்கு நாள்தோறும் ஏராளமான குடிமகன்கள் குடிப்பது வழக்கம்.

கடந்த 4ஆண்டுகளுக்கும் மேலாக சாலையில் சுற்றித்திரியும் ஆடு ஒன்று டாஸ்மாக் அருகே நின்றுகொன்று குடிமகன்கள் குடித்துவிட்டு வீசி செல்லும் டம்ளர்களில் இருக்கும் மீதி சரக்கை குடிக்க பழகிகொண்டது. நாளடைவில் அதுவே அந்த ஆட்டுக்கு வாடிக்கையாகி விட்டது.

இதனால் 'கட்டிங்' போடும் குடிமகன்கள் டம்ளரை வைத்து சரக்கு ஊற்றினால் போதும். உடனே அந்த ஆடு எங்கு இருந்தாலும் சரக்கு வாசனையில் ஓடி வந்து பக்கத்தில் நின்று கொண்டு, தனக்கும் சரக்கு வேண்டும் என பாசாங்கு செய்கிறது. மேலும் சரக்கை ஊற்றி விட்டு ஊறுகாயை பிரிப்பதற்குள் வேகமாக மதுவை குடித்து விடுகிறது.

இந்த ஆட்டின் பெயர் கருப்பராயன் ஆகும். இதனால் டாஸ்மாக் கடைக்கு வரும் குடிமகன்கள், "டேய், கருப்பராயா இங்க வாடா, என்னோடு உட்கார்ந்து சரக்கு அடிடா" என்று கூப்பிடுவார்களாம். உடனே அந்த ஆடு நாலு கால் பாய்ச்சலில் வேகமாக வந்து விடுமாம். இப்படி இந்த ஆடு தினந்தோறும் டாஸ்மாக் அருகே தான் சுற்றிச்சுற்றி வருமாம்.

டம்ளரில் ஊற்றிருக்கும் மதுவை ஆடு லாவகமாக அருந்தும் காட்சியை ஏராளமான குடிமகன்கள் கூடி நின்று ரசித்து வருகிறார்கள்.