என் கணவருக்கு காட்டுங்கள்: யாகூப் மேமன் மனைவி வேண்டுகோள்

மும்பை குண்டுவெடிப்பு வழக்கில் தாமே முன்வந்து சரணடைந்ததைக் கருத்தில்கொண்டு, தன் கணவரின் தூக்கு தண்டனையை ஆயுள் தண்டனையாகக் குறைக்க வேண்டும் என்று நீதித்துறைக்கும் அரசுக்கும் யாகூப் மேமனின் மனைவி ரஹீன் மேமன் வேண்டுகோள் விடுத்துள்ளார்.

1993 ஆம் ஆண்டு நிகழ்த்தப்பட்ட தொடர் குண்டுவெடிப்பு தொடர்பான வழக்கில் கைது செய்யப்பட்ட ஒரே நபரான யாகூப் மேமனுக்கு மும்பை தடா நீதிமன்றம் தூக்கு தண்டனை விதித்தது. இதை மும்பை உயர் நீதிமன்றமும், உச்ச நீதிமன்றமும் உறுதி செய்தன. தீர்ப்பை சீராய்வு செய்யக்கோரி யாகூப் மேமன் தாக்கல் செய்த மனுவும் உச்ச நீதிமன்றத்தால் தள்ளுபடி செய்யப்பட்டது.

உச்ச நீதிமன்றத்திடம் தூக்கு தண்டனைக்கு இடைக்காலத் தடை விதிக்கக்கோரி அவர் வியாழக்கிழமை மனுத் தாக்கல் செய்தார்.

இடைக்காலத் தடை விதிக்கக் கோரி யாகூப் மேமன் தாக்கல் செய்துள்ள மனு மீது நாளை திங்கள்கிழமை (ஜூலை 27) விசாரணை நடத்தப்படும் என்று உச்ச நீதிமன்றம் தெரிவித்தது.

இந்த சூழ்நிலையில், நாக்பூர் சிறையில் உள்ள யாகூப் மேமனை வியாழக்கிழமை காலை 11 மணிக்கு அவரது குடும்பத்தினர் சந்தித்தனர். இந்த சந்திப்பில் யாகூப் மேமனின் மனைவி ரஹீன் மேமன், ரஹீன் மேமனின் இரு சகோதரிகள், அவரது மகள் ஜுபேதா, மற்றொரு உறவினர் இக்பால் மேமன் ஆகியோர் இடம் பெற்றிருந்தனர்.

இந்த நிலையில், யாகூப் மேமனின் மனைவி ரஹீன் மேமன் அளித்த செய்தியாளர்களுக்கு அளித்த பேட்டி ஒன்றில், "எனக்கு நீதித்துறை மீது முழு நம்பிக்கை உள்ளது. அவரை அப்பாவி என்று யாரேனும் கருதும் பட்சத்தில், அவர் தானாக முன்வந்து சரணடைந்ததைக் கருத்தில்கொண்டு, யாகூப் மேனனை மன்னித்து, அவரது மரண தண்டனையை ஆயுள் தண்டனையாக்க அரசு கருணை காட்ட வேண்டும்  என்று இந்திய அரசிடம் மன்றாடுகிறேன்.

என் மகள் இதுவரை அவருடன் (யாகூப்) ஒரு நாள் கூட இருந்ததில்லை. தந்தை ஒரு நாள் வீட்டுக்கு வருவார் என்ற ஏக்கத்துடன் மகள் காத்திருக்கிறாள்" என்றார் அவர்.

யாகூப் மேமனனின் கருணை மனுவை குடியரசுத் தலைவர் பிரணாப் முகர்ஜி ஏற்கனவே நிராகரித்ததுள்ளது குறிப்பிடத்தக்கது.

-நன்றி தினமணி