ஹன்ஸிகாவுக்கும் என் மகனுக்கும் காதலா? – ஜெயப்ரதா ஜாலி டாக்!

80களில் கனவுக் கன்னியாக ரசிகர்களின் இதயம் நிறைந்த ஜெயப்ரதாவின் சினிமா பயணம் “நினைத்தாலே இனிக்கும்’. மகன் சித்து ஹீரோவாக அறிமுகமாகும் “உயிரே உயிரே’ பட விழாவுக்காக சென்னை வந்தவரிடம் பேச நிறைய இருந்தது.
திநகர் வீட்டில் அவரைச் சந்தித்தபோது பேச்சிலும் தோற்றத்திலும் இளமையின் “சலங்கை ஒலி’. மகனுடன் இணைந்து அளித்த அவரது பேட்டியிலிருந்து.

தமிழில் குறைவான படங்களில் மட்டும் நடித்தது ஏன்?
சந்தர்ப்பங்களையும் சூழ்நிலைகளையும் சாக்குச் சொல்லி தப்பிக்க விரும்பவில்லை. எனினும் அதுதான் உண்மையும், அப்படி அமைந்துவிட்டது. இப்படி ஓரவஞ்சனையாக நினைக்கக்கூடாது. இப்பவும் எனக்கு தமிழ்ப்படங்கள் பண்ணும் ஆசை இருக்கு. சும்மா அம்மா கேரக்டரில் நடிப்பதில் விருப்பமில்லை. இந்தி, கன்னடம், மலையாளத்தில் அழுத்தமான கதாபாத்திரஙகளில் நடித்து வருகிறேன். அது மாதிரியான கேரக்டர் என்றால் நடிக்க ரெடி.

சித்து, உங்களுக்கு சினிமா ஆர்வம் எப்படி வந்தது?
சின்ன வயசில் அம்மா நடிக்கும் படங்களோட ஷூட்டிங் பார்க்கப் போவேன். விவரம் தெரிய ஆரம்பித்ததும் உள்ளுக்குள் இருந்த ஹீரோ ஆசை ஸ்விட்ச் ஆன் ஆகிடுச்சு. என் நடிப்புக்கு சின்ன வயசில் நான் பார்த்த ஷூட்டிங்தான் குரு என்றாலும் அம்மாதான் என்னோட யுனிவர்சிட்டி. மும்பையில் ஆக்டிங் கோர்ஸ் முடிச்சிட்டு கிட்டத்தட்ட 50 இயக்குநர்களிடம் கதை கேட்டும் எதுவும் செட் ஆகல. அப்போதான் தெலுங்கில் சூப்பர் ஹிட்டடித்த “இஷ்க்’ படத்தைப் பார்த்தேன். ஒரு அருமையான லவ் ஸ்டோரியை ஏன் தமிழில் ரீமேக் செய்யக்கூடாதுன்னு அம்மாகிட்ட கேட்டேன். அவங்களும் படத்தைப் பார்த்துட்டு ஓகே சொல்லிட்டாங்க. என்கு ஜோடி ஹன்ஸிகா. எனக்கும் ஹன்ஸிகாவுக்கு கெமிஸ்ட்ரி சூப்பரா ஒர்க்கவுட் ஆகியிருக்கு.

ரியல் லைஃபிலும் உங்களுக்கும் ஹன்ஸிகாவுக்கும் காதலாமே?
அந்த செய்தியை நானும் கேள்விப்பட்டேன். ஹன்ஸிகாவுக்கும் எனக்கும் இடையே நல்ல நட்பு மட்டுமே இருக்கிறது. எங்களுக்குள்ள வேற எதுவும் இல்லை. ஹன்ஸிகாவுக்கும் இந்த கிசுகிசு பற்றி தெரியும். ஆனால் நாங்க அதுபற்றி எதுவும் ஷேர் பண்ணிக்கல என சித்து நழுவ,

நீங்க இதுபற்றி என்ன நினைக்கிறீங்க? என்று ஜெயபரதாவிடம் தயங்கத்துடன் கேட்டால்,
அப்படியா.. படத்தில் ஹன்ஸிகாவும் சித்துவும் லவ் பண்றாங்கன்னு தெரியும். நிஜத்தில் உண்மை தெரியல. சொல்ல முடியாது… லவ் இருந்தாலும் இருக்கலாம் என்கிறார் தடாலடியாக.

அப்போ சித்துவுக்கு சரியான ஜோடி ஹன்ஸிகாதானா?
ஹன்ஸிகாவும் சரியான ஜோடின்னு சொல்லலாம். முதலில் தமன்னாவைத்தான் நடிக்க கேட்டோம். தேதி செட் ஆகாததால அவரால் நடிக்க முடியாம போயிடுச்சு. அதன் பிறகுதான் ஹன்ஸிகா வந்தாங்க. ம். இனனொரு விஷயம், இந்தப் படத்தில் வரும் ஒரு டூயட் பாடலுக்கு ஹன்ஸிகாவுக்காக நான்தான் பாடியிருக்கேன்.

ரஜினி, கமலுடனான நட்பு எப்படி இருக்கு?
ஃப்ரிட்ஜில் வச்ச ஆப்பிள் மாதிரி அப்படியேதான் இருக்கு. ஐயோ அந்த காலகட்டங்களை மறக்க முடியுமா? ஐதராபாத்தில் லிங்கா ஷூட்டிங் நடந்தப்போ ரஜினியைப் பார்த்தேன். நான் வந்தது தெரிந்ததும் ஷாட்டை விட்டுட்டு வந்துட்டார். அத்தனை அன்பு. சித்து ஹீரோவாகிறார்னு சொன்னதும் ஆசிர்வதித்தார். கமலுடன் அடிக்கடி பேசிக்கறது உண்டு. ஒரு விழாவில் என்னை பார்த்தவர் நல்ல நடிகை அரசியலுக்கெல்லாம் போகக்கூடாது. திரும்பவும் சினிமாவுக்கு வந்திடுங்கன்னு சொன்னார். இதோ வந்திட்டேன் கமல் சார். ரஜினி, கமல் இருவரும் எனக்கு இரண்டு கண்கள்.

படம் ரீமேக் பண்ணினால் நல்லாயிருக்கும்னு நினைக்கிறீங்க?
தமிழில் நினைத்தாலே இனிக்கும், சலங்கை ஒலியை ரீமேக் பண்ண முடியாது. அப்படியொரு அற்புதமான படம் அது. இனி ஒருமுறை அதுபோல் எடுக்க வாய்ப்பில்லை. கடைசியா கமலுடன் தசாவதாரம் பண்ணினேன். இப்பவும் அவருக்கு ஜோடியா நடிக்க காத்திட்டு இருக்கேன்.

இந்தத் தலைமுறை நடிகைகள் பற்றி?
ம் நல்லா நடிக்கிறாங்க. ஆனால் எங்க காலத்தில் தயாரிப்பாளர், இயக்குநர்களுடன் இருந்த குடும்ப ரீதியிலான உறவு யாருக்கு இல்லை. கேரவன் இல்லைன்னா ஷூட்டிங் ஸ்பாட்டிலிருந்து போயிடுற காலமாயிடுச்சு. நாங்களெல்லாம் துணி மறைவில் டிரெஸ் மாத்திகிட்டு நடிச்சோம். இப்போ நடித்தோமா சம்பளம் வாங்கினோமான்னு போயிடுறாங்க. பழைய பணிவு, அன்பு, மரியாதையெல்லாம் இப்ப இல்லைன்னுதான் சொல்லணும்.

– அமலன்

குமுதம்