சென்னை சூப்பர் கிங்ஸ், ராஜஸ்தான் அணிகளுக்கு இரண்டு ஆண்டு தடை விதிக்கபட்டுள்ளது !!

புதுடில்லி: ஐ.பி.எல்., என அழைக்கப்படும், பிரீமியர் கிரிக்கெட் தொடரில் அரங்கேறிய சூதாட்டம் உறுதியானது. இது தொடர்பான தீர்ப்பில், சூதாட்டத்தில் ஈடுபட்ட சென்னை சூப்பர் கிங்ஸ், ராஜஸ்தான் அணிகளுக்கு இரண்டு ஆண்டு தடை விதிக்கப்பட்டது. சென்னை அணியின் உரிமையாளரான, இந்தியா சிமென்ட்ஸ் சீனிவாசனின் மருமகன், குருநாத் மெய்யப்பன், ராஜஸ்தான் அணியின் உரிமையாளரும், பிரபல நடிகை ஷில்பா ஷெட்டியின் கணவருமான, ராஜ் குந்த்ரா ஆகியோருக்கு, ஆயுள் கால தடை விதிக்கப்பட்டது.

கடந்த, 2008ல், சில கார்ப்பரேட் நிறுவனங்களின் பின்னணியில், உள்ளூர் பிரீமியர், 'டுவென்டி-20' கிரிக்கெட் தொடர் துவங்கப்பட்டது. இதில், ஆரம்பத்தில் இருந்தே, பல சர்ச்சைகள் வெடித்தன. இதன் உச்ச கட்டமாக, 2013ல், 'ஸ்பாட் பிக்சிங்' எனப்படும், சூதாட்ட சர்ச்சை விஸ்வரூபம் எடுத்தது.


சிக்கிய வீரர்கள்:

இதில் சிக்கிய, ராஜஸ்தான் அணி வீரர்கள் ஸ்ரீசாந்த், அன்கித் சவானுக்கு வாழ்நாள் தடை விதிக்கப்பட்டது. இது தொடர்பாக, இந்திய கிரிக்கெட் போர்டு (பி.சி.சி.ஐ.,) நியமித்த, ஓய்வு பெற்ற இரண்டு நீதிபதிகள் அடங்கிய விசாரணைக் குழு முடிவை ஏற்க, மும்பை ஐகோர்ட் மறுத்தது.


அப்படியே தலைகீழ்:

தொடர்ந்து சூதாட்ட வழக்கு உச்ச நீதிமன்றத்துக்கு செல்ல, எல்லாமே தலைகீழானது. இதுகுறித்து விசாரித்த ஓய்வு பெற்ற நீதிபதி முத்கல் குழு அறிக்கையின்படி, பி.சி.சி.ஐ., தலைவர் சீனிவாசன் பதவி விலக நேர்ந்தது.பி.சி.சி.ஐ., மற்றும் பிரீமியர்தொடருக்கு இடைக்கால தலைவர்கள் நியமிக்கப்பட்டனர். தவிர, அணியின் உரிமையாளர்கள் குருநாத் மெய்யப்பன் (சென்னை),

ராஜ் குந்த்ரா (ராஜஸ்தான்) இருவரும் தங்கள்அணிகளை வைத்து 'பெட்டிங்' செய்தது உறுதியானது.


புதிய கமிட்டி:

இவர்கள் மீதான தண்டனை, இரு அணிகளின் நிலை மற்றும் பி.சி.சி.ஐ.,யில் செய்ய வேண்டிய மாற்றங்கள் குறித்து முடிவு செய்ய, முன்னாள் தலைமை நீதிபதி ஆர்.எம்.லோதா தலைமையில், அசோக் பான், ரவீந்திரன் என, மூன்று பேர் அடங்கிய குழுவை, ஜனவரி, 22ல் உச்ச நீதிமன்றம் நியமித்தது.

அணிகளுக்கு தடை:

நீதிபதி ஆர்.எம்.லோதா குழுவின், தண்டனை விவரம் குறித்த தீர்ப்பு நேற்று வெளியானது. இதில், அவர் கூறியதாவது:

*சென்னை சூப்பர் கிங்ஸ் அணி உரிமையாளர் குருநாத் மெய்யப்பன், ராஜஸ்தான் அணியின் சக உரிமையாளர் ராஜ் குந்த்ராவின், 'பெட்டிங்' தொடர்பான நடவடிக்கைகள்கிரிக்கெட், பி.சி.சி.ஐ., மற்றும்

பிரீமியர் தொடருக்கு மோசமான பாதிப்பை ஏற்படுத்தி விட்டன.
*இவர்கள் இருவரும், பி.சி.சி.ஐ., நடத்தும், கிரிக்கெட் தொடர்பான எவ்வித நடவடிக்கைகளிலும் ஈடுபட, வாழ்நாள் தடை விதிக்கப்படுகிறது.

சென்னை அணியை நிர்வகித்த, இந்தியா சிமென்ட்ஸ் நிறுவனமும், கிரிக்கெட் தொடர்பான விவகாரங்களில் பங்கேற்க, இரண்டு ஆண்டு தடை விதிக்கப்படுகிறது.

*சென்னை, ராஜஸ்தான் அணிகள் பிரீமியர் தொடரில் பங்கேற்க, இரண்டு ஆண்டு தடை விதிக்கப்படுகிறது. இவை அனைத்தும் உடனடியாக அமலுக்கு வருகின்றன.

*பிரீமியர் தொடர் தலைமை அதிகாரி சுந்தர ராமன் செயல்பாடுகள் குறித்து, முழுமையாக விசாரிக்கப்பட்டு வருகிறது. இதுகுறித்து, உச்ச நீதிமன்றம் நியமித்த விவேக் பிரியதர்ஷி அறிக்கை இன்னும் வரவில்லை. அது கிடைத்த பின், சுந்தர ராமன் மீதான நடவடிக்கை குறித்து அறிவிக்கப்படும்.

*பி.சி.சி.ஐ.,யில் ஆதாயம் தரும் வகையில், இரு பதவிகளில் பலர் இருப்பது தொடர்பாக இன்னும் விசாரணை முடியவில்லை. இது தொடர்பாக, 40 முதல், 45 பேரை தொடர்பு கொண்டோம். இன்னும்சிலரை சந்திக்க வேண்டும். இதெல்லாம் முடிந்த பின், பி.சி.சி.ஐ., நிர்வாகத்துக்கு தேவையான வழிமுறைகள் வகுத்து தரப்படும்.இவ்வாறு நீதிபதி ஆர்.எம்.லோதா கூறினார்.

லோதா கமிட்டியின் தீர்ப்பு, பிரீமியர் தொடருக்கு பெருத்த அடியாக அமைந்துள்ளது. இத னால், இனி தொடர் நடக்குமா என்ற சந்தேகத்தை ஏற்படுத்தியுள்ளது.

தினமலர்

அப்பாடா, நம்ம ஊரு புல்லைங்க இனி ஒழுங்கா படிக்கும்.

சென்னை இல்லேனா IPL பார்வையாளர்கள் குறைவார்கள் அதனால் வருமானம் குறையும் BCCI க்கு வருமானமே ப்றேதானம் பாக்கலாம் ஏதாவது செய்வாங்க