பில்லா , ரங்கா

**M.Jagadeesan** · **M.Jagadeesan** Mon Jul 13, 2015 7:27 pm

பக்கத்து ஊரில் நடைபெறும் ஒரு திருமணத்தில் கலந்து கொள்வதற்காக பரமசிவ முதலியார் கிளம்பினார். தன் வீட்டில் வேலை செய்யும் பில்லா, ரங்கா ஆகிய இரண்டு வேலையாட்களையும் துணைக்கு அழைத்துக்கொண்டார்.

முதலியார் ,வீட்டைப் பூட்டும் சமயத்தில் ரங்கா , முதலியாரைப் பார்த்து," ஐயா ! செல்போன், ATM கார்டு ஆகியவற்றை எடுத்துக் கொண்டீர்களா? சமயத்தில் உதவும்; கையோடு குடையையும் எடுத்துக் கொள்ளுங்கள் ! மழை வரும்போல இருக்கிறது." என்று சொன்னான்.

" சரியாகச் சொன்னாய் ரங்கா!" என்று சொல்லிவிட்டு , முதலியார் வீட்டினுள் சென்று செல்போன், ATM கார்டு,குடை ஆகியவற்றை எடுத்துக்கொண்டார். வீட்டைப் பூட்டிவிட்டு மூவரும் கிளம்பினர்.

பேருந்து நிலையம் அடைந்தனர்.

திடீரென முதலியாருக்கு ஒரு சந்தேகம் வந்துவிட்டது. வீட்டைச் சரியாகப் பூட்டவில்லையோ என்று சந்தேகப்பட்டார்.

" பில்லா !, ரங்கா ! வீட்டைச் சரியாகப் பூட்டினேனா இல்லையா என்ற சந்தேகம் வந்துவிட்டது. " என்றார் முதலியார்.

உடனே ரங்கா, " ஐயா ! கொஞ்சமும் கவலைப்படவேண்டாம். நீங்கள் வீட்டைப் பூட்டும்போது நான் கவனித்தேன்; சரியாகத்தான் பூட்டினீர்கள். பூட்டை நான் இழுத்துப் பார்த்தேன். எனவே சந்தேகம் வேண்டாம். " என்று சொன்னான்.

ஆனாலும் முதலியாருக்கு சந்தேகம் தீர்ந்தபாடில்லை. தயக்கத்துடன் நின்றுகொண்டு இருந்தார். உடனே ரங்கா,

" ஐயா ! சாவியைக் கொடுங்கள் ; வேண்டுமானால் தங்களுடைய திருப்திக்காக நான் போய் பார்த்துவிட்டு வருகிறேன். " என்று சொன்னான்.

ரங்காவை நம்பி வீட்டு சாவியைக் கொடுக்க முதலியார் தயங்கினார். ஆறு மாதங்களுக்கு முன்புதான் ரங்காவை , முதலியார் வீட்டு வேலைக்கு சேர்த்துக்கொண்டார். பில்லா அந்த வீட்டில் ஐந்து ஆண்டுகளாக வேலை செய்கிறான். ரங்காவை நம்பி வீட்டு சாவியைக் கொடுத்தால், அவன் வீட்டில் உள்ளதை எல்லாம் சுருட்டிக்கொண்டு கம்பி நீட்டிவிட்டால் என்ன செய்வது என்று யோசித்தார். உடனே பில்லாவைப் பார்த்து,

" பில்லா! நீ போய் பார்த்துவிட்டு வா ! " என்றார்.

" சரி ஐயா ! " என்று சொல்லிவிட்டு பில்லா கிளம்பினான். அவன் சிறிதுதூரம் சென்றவுடன் முதலியார்,

" முட்டாளே ! சாவி வாங்காமல் போகிறாயே ! பூட்டு சரியாகப் பூட்டாமல் இருந்தால் என்ன செய்வாய் ?" என்று கோபித்தார் முதலியார்.

" ஐயா ! மறந்துவிட்டேன். " என்று சொல்லித் தலையைச் சொறிந்தான் பில்லா.

பில்லா வீட்டை நெருங்கும் சமயத்தில் மழை பிடித்துக்கொண்டது. அருகிலிருந்த ஒரு மரத்தின் கீழே ஒதுங்கினான் பில்லா.

அப்போது அங்குவந்த வழிப்போக்கன் ஒருவன் பில்லாவைப் பார்த்து,

" தம்பி ! இது உங்க வீடா ? "என்று கேட்டான்.

" இல்லை ; என் முதலாளி வீடு. பஸ் ஸ்டாண்டில் முதலாளி காத்துக்கொண்டு இருக்கிறார். வீடு சரியாகப் பூட்டி இருக்கிறதா என்று என்னைப் பார்த்துவிட்டு வரச் சொன்னார். அதான் வந்தேன். அதற்குள் இப்படி மழை பிடித்துக்கொண்டது." என்றான் பில்லா.

உடனே வழிப்போக்கன்," அவ்வளவுதானே ! நீ இங்கேயே இரு தம்பி ! சாவியைக் கொடு. நான் போய் பார்த்துவிட்டு வருகிறேன். பூட்டாமல் இருந்தால் நான் போய் சரியாகப் பூட்டிவிட்டு வருகிறேன்; வீணாக நீ ஏன் மழையில் நனையவேண்டும் ?" என்று சொன்னான்.

உடனே பில்லா , வழிப்போக்கனிடம் சாவியைக் கொடுத்தான்.

சாவியை வாங்கிக்கொண்ட வழிப்போக்கன் வீட்டின் கதவருகில் சென்றான். பூட்டை இழுத்துப் பார்த்தான். சரியாகப் பூட்டி இருந்ததைக் கண்டான். உடனே சாவியைப் பூட்டில் செருகி பூட்டைத் திறந்தான். பூட்டைத் திறந்த நிலையில் வைத்துவிட்டு பில்லாவிடம் வந்து,

" தம்பி ! நீ இங்கு வந்தது நல்லதாப் போச்சு ! பூட்டு சரியாகப் பூட்டப்படாமல் இருந்தது. நான் சரியாகப் பூட்டிவிட்டேன்." என்று சொல்லி சாவியை பில்லாவிடம் கொடுத்தான்.

" ரொம்பவும் நன்றி ஐயா !" என்று சொல்லிவிட்டு பில்லா முதலியாரிடம் சென்றான். மழையும் விட்டிருந்தது.

பில்லாவைப் பார்த்த முதலியார், " என்ன பில்லா! வீடு பூட்டியிருந்ததா ?"

" இல்லை ஐயா ! பூட்டு சரியாக பூட்டப்படாமல் இருந்தது. "

" நான் நினைத்தது சரியாப் போச்சு. உன்னை அனுப்பினது நல்லதாப் போச்சு. இப்ப பூட்ட சரியாப் பூட்டுனியா ?"

" ஆம் ஐயா! சரியாகப் பூட்டிவிட்டான். "

" பூட்டிவிட்டானா ! அப்ப நீ பூட்டவில்லையா ?"

பில்லா நடந்ததைச் சொன்னவுடன், முதலியார் தீயை மிதித்தவர் போல ஆனார்.

" மூளையில்லா முண்டமே ! முன்பின் தெரியாத ஒருவனிடம் சாவியைக் கொடுத்து வீட்டைப் பூட்டச் சொல்லியிருக்கியே ! அவன் என்ன செஞ்சானோ ஏது செஞ்சானோ தெரியலையே " என்று பதறி அடித்துக்கொண்டு வீட்டை நோக்கி ஓடினார் முதலியார். அங்கே

வீடு திறந்துகிடந்தது. வீட்டின் உள்ளே நுழைந்த முதலியார் பீரோவைப் பார்த்தார். பீரோவிலிருந்த நகைகள், ரொக்கப் பணம் எல்லாம் கொள்ளையடிக்கப்பட்டு சுத்தமாக துடைத்து வைக்கப்பட்டு இருந்தது.

' அய்யய்யோ ! எல்லாம் போச்சே ! ' என்று முதலியார் தலையில் அடித்துக்கொண்டார்.

குறள்:
=====

தேரான் தெளிவும் தெளிந்தான்கண் ஐயுறவும்
தீரா இடும்பை தரும். ( தெரிந்து தெளிதல்-510 )

கருத்து:
=======
ஒருவனை ஆராயாது தெளிதலும், ஆராய்ந்து தெளிந்தவன் மாட்டு ஐயப்படுதலும் நீங்காத துன்பத்தைக் கொடுக்கும்.

shobana sahas · shobana sahas Tue Jul 14, 2015 11:19 pm

நல்ல கதை அய்யா . நன்றி . மகிழ்ச்சி

**M.Jagadeesan** · **M.Jagadeesan** Wed Jul 15, 2015 8:22 am

ஷோபனா அவர்களின் பாராட்டுக்கு நன்றி .

**krishnaamma** · **krishnaamma** Wed Jul 15, 2015 5:43 pm

நல்ல கதை ஐயா புன்னகை

balakarthik · balakarthik Wed Jul 15, 2015 6:43 pm

வீட்ட கொள்ளை அடிச்சதோட போனானே யாருக்காவது வித்திருந்தா அம்போதான்

இதுக்குத்தான் பூட்ட ஒழுங்கா வீட்டனும் ச்சே வீட்ட ஒழுங்கா பூட்டனும்

**krishnaamma** · **krishnaamma** Sun Jul 19, 2015 7:46 pm

balakarthik wrote:வீட்ட கொள்ளை அடிச்சதோட போனானே யாருக்காவது வித்திருந்தா அம்போதான்

இதுக்குத்தான் பூட்ட ஒழுங்கா வீட்டனும் ச்சே வீட்ட ஒழுங்கா பூட்டனும்

மேற்கோள் செய்த பதிவு: 1151171

சிரி சிரி