விம்பிள்டனில் 'ஹாட்ரிக்' அடித்து இந்தியா சாதனை!

விம்பிள்டன் டென்னிசில் ஒரே சீசனில் இந்தியாவை சேர்ந்த 3 பேர் பட்டம் வென்று வரலாறு படைத்துள்ளனர்.

கிராண்ட்ஸ்லாம் போட்டிகளில் மிகவும் பழமையான விம்பிள்டனில் நேற்று முன்தினம் நடந்த மகளில் இரட்டையர் போட்டியில் இந்தியாவின் சானியா மிர்ஷா சுவிட்சர்லாந்தின் மார்ட்டினா ஹிங்கிஸ் இணை பட்டம் வென்றது. விம்பிள்டனில் பட்டம் வென்ற முதல் இந்திய வீராங்கனை என்ற சாதனையை சானியா மிர்ஷா நிகழ்த்தினார்.



கலப்பு இரட்டையர் இறுதிப் போட்டியில் இந்தியாவின் லியான்டர் பயஸ் - மார்ட்டினா ஹிங்கிஸ் இணை 6-1, 6-1, என்ற நேர் செட்களில் அலெக்சான்டர் பெயா மற்றும் டிமியா பாபோஸ் ஜோடியை வீழ்த்தியது. இது லியாண்டல் பயஸ் வெல்லும் 16வது கிராண்ட் ஸ்லாம் பட்டம் ஆகும். இதற்கு முன் கடந்த 1990ஆம் ஆண்டு விம்பிள்டன் ஜுனியர் ஒற்றையர் பிரிவில் பட்டம் வென்றதே லியாண்டரின்அதிகபட்ச விம்பிள்டன் சாதனையாக இருந்தது.



நேற்று நடந்த ஜுனியல் இரட்டையர் பிரிவு இறுதி ஆட்டத்தில் இந்தியாவின் சுமித் நகல், வியட்நாமை சேர்ந்த நாம் ஹாங் லீயுடன் இணைந்து இறுதிப் போட்டியில் அமெரிக்காவின் ரெய்லி ஓபெல்கா மற்றும் ஜப்பான் வீரர் அகிரா சான்டிலன் ஜோடியை 7-6 (4), 6-4 என்ற செட் கணக்கில் வென்றது. கடந்த 2009ஆம் ஆண்டு ஆஸ்திரேலிய ஓபனில் ஒற்றையர் ஜுனியர் பிரிவில் யுகி பாம்ரி கடைசியாக கிராண்ட்ஸ்லாம் போட்டியில் பட்டம் வென்றிருந்தார்.

அதற்கு பின் தற்போது 17 வயது சுமித் நகல் கிராண்ட் ஸ்லாம் போட்டியின் ஜுனியர் பிரிவில் இந்த சாதனையை படைத்துள்ளார். மேலும் ஜுனியர் பிரிவில் கிராண்ட் ஸ்லாம் பட்டம் வென்ற 5 வது வீரர் என்ற பெருமையையும் சுமித் நகல் பெற்றார்.

இதற்கு முன் கடந்த 1954ஆம் ஆண்டு ராமநாத கிருஷ்ணன் விம்பிள்டன் ஜுனியர் பிரிவில் பட்டம் வென்றார். ரமேஷ் கிருஷ்ணன் 1979 ஆம் ஆண்டு விம்பிள்டன், பிரெஞ்சு ஓபன் பட்டங்களை வென்றார். தொடர்ந்து லியாண்டர், யுகி பாம்ரி ஆகியோர் ஒற்றையர் பிரிவில் பட்டம் வென்றனர். தற்போது அந்த வரிசையில் சுமித் நகல் இணைந்துள்ளார்.

வெற்றி பெருமிதமளிக்கிறது: சானியா



விம்பிள்டன் போட்டியில் பெற்றுள்ள வெற்றி பெருமிதமளிக்கிறது என டென்னிஸ் வீராங்கனை சானியா மிர்சா தெரிவித்துள்ளார்.

இதுதொடர்பாக அவர் கூறியதாவது: விம்பிள்டன் வெற்றி இந்திய பெண்களுக்கு வாழ்வில் மிகப்பெரிய இலக்கை எட்ட ஊக்கமாக அமையும் என நம்புகிறேன். நான் விளையா டினேன்; வெற்றி பெற விரும்பினேன். அதற்காகத்தானே விளையாடுகிறோம்.

இப்போட்டி நம்ப முடியாத அளவுக்கு வியப்பாக இருந்தது. நாங்கள் பின்தங்கி யிருந்தபோதுகூட, எங்களின் முழுத் திறமையையும் வெளிப்படுத்தி னோம் என எங்களுக்குத் தெரியும்.

இத்தருணத்துக்காகத்தான் பல ஆண்டுகளாக பயிற்சி பெற்றோம். எதற்காக வாழ்கிறோமோ அதை அடைவதற்காக காத்திருந்தோம். இவ்வெற்றியால் கவுரவிக்கப்பட்டுள்ளோம். 2-5 எனப் பின்தங்கி யிருந்தபோது கூட, நாங்கள் தோற்றுவிடுவோம் என நினைக்கவில்லை.

நானும் ஹிங்கிஸும் ஒருவருக்கொருவர், “அவர்கள் வெற்றி பெறட்டும். நாம் இப்போட்டியைத் தோற்கப்போவதில்லை. நாம் சரியாகவே விளையாடுவோம்” என்று சொல்லிக் கொண்டோம். விம்பிள்டன் பட்டம் வென்றுள்ளோம் என நினைக்கும்போதே மிக மகிழ்ச்சியாக இருக்கிறது.

இவ்வாறு அவர் தெரிவித்தார்.

குவியும் வாழ்த்துகள்

பிரதமர் மோடி வெளியிட்டுள்ள அறிக்கையில், “மிகச்சிறப்பான ஆட்டம் ஹிங்கிஸ்-சானியா. நீங்கள் அற்புதமான ஆட்டத்தை வெளிப்படுத்தி விம்பிள்டனில் சிறப்பான வெற்றியைப் பதிவு செய்துள்ளீர்கள். உங்களால் நாங்கள் பெருமையடைகிறோம், மகிழ்ச்சியடைகிறோம்” எனத் தெரிவித்துள்ளார்.

குடியரசுத் தலைவர் பிரணாப் முகர்ஜி தனது வாழ்த்துச் செய்தியில், “கிராண்ட்ஸ்லாம் பட்டம் வென்ற முதல் இந்தியப் பெண் என்ற வகையில், நீங்கள் இந்திய இளைஞர்கள் குறிப்பாக இளம்பெண்களுக்கு ஊக்கமளித்துள்ளீர்கள். இந்த வெற்றிக் கொண்டாத்தில் உங்கள் குடும்பத்துடன், தேசமும் இணைந்து கொள்கிறது. இந்தியா வுக்காக இன்னும் ஏராளமான வெற்றிகளைப் பெற வேண்டும்” எனத் தெரிவித்துள்ளார்.

விளையாட்டுத் துறை அமைச்சர் சர்பானந்த சோனோவால், நிதியமைச்சர் அருண் ஜேட்லி, பிஹார் முதல்வர் நிதிஷ் குமார், தெலங்கானா முதல்வர் கே.சந்திரசேகர ராவ் உட்பட பல்வேறு பிரபலங்களும், அரசியல் தலைவர்களும் சானியாவுக்கு வாழ்த்துகளை தெரிவித்துள்ளனர்.

வெற்றி பெற்ற அனைவருக்கும் வாழ்த்துக்கள்

வாழ்த்துகள் பயஸ் ,
சானிய மிர்சா ,
சுமீத் நகல்

ரமணியன்