மற்றவர்க்கு உதவி செய்யாமல், நாம் மற்றவரின் உதவியை எதிர்பார்க்க முடியுமா?

காட்டு ராஜாவான சிங்கம் இரைதேடி வந்து கொண்டிருந்தது.

அப்போது ஆட்டைக் கண்டதும் அதை வேட்டையாடும் எண்ணத்தில் பாய்ந்து பாய்ந்து ஓடியது.

விரட்டிய வேகத்தில் எதிரே இருந்த பள்ளத்தை தாண்டிக் குதித்தது. அது ஒரு பெரிய பாழுங்கிணறு.

சிங்கம் தடுமாறி கிணற்றுக்குள் விழுந்துவிட்டது.

கிணற்றுக்குள் வலம் வந்தபடி உதவி வேண்டி கர்ஜித்தது.

அப்போது அந்த வழியாக ஒரு ஓநாய் வந்தது. சிங்கத்தின் சத்தம் கேட்டு கிணற்றை எட்டிப் பார்த்தது.

ஓநாயைக் கண்ட சிங்கம், 'ஓநாயே சரியான சமயத்தில் வந்தாய். என்னை மேலே கொண்டு வர உதவு. உனக்கு புண்ணியமாய்ப் போகும்' என்றது.

'நான் செய்த தவறுக்காக வேறு காடுபோய் ஒருவாரம் வாழ தண்டனை கொடுத்த காட்டுராஜாதானே நீ. என்னை தண்டித்துவிட்டு என்னிடமே உதவி கேட்கிறாயா?, உனக்கு உதவ முடியாது போ' என்றது ஓநாய்.

'ஆபத்தில் உள்ளவர்களுக்கு உதவுவதுதானே பெருந்தன்மை' என்றது சிங்கம்.

'என்னை தண்டித்த உன்னை பழிவாங்க இதைவிட எப்போ வாய்ப்பு கிட்டும். உனக்கு உதவ முடியாது' என்று கூறிய ஓநாய், மகிழ்ச்சியுடன் ஓட்டம் பிடித்தது.
சிங்கம் விழுந்த சந்தோஷத்தில் சிந்தனையை ஓடவிட்டபடியே ஓடிய ஓநாய், வேடன் விரித்து வைத்த வலையில் சிக்கிக் கொண்டது.

உடனே அது உதவி கேட்டு கத்தியது. 'யாராவது காப்பாத்துங்க... காப்பாத்துங்க...' என்று கூப்பாடு போட்டது.

அப்போது அந்த வழியாக ஆடு ஒன்று வந்தது.

'ஆடே, வேடனின் வலையில் சிக்கிக் கொண்டேன். தயவு செய்து என்னை காப்பாத்து. உனக்கு கோடி புண்ணியம்' என்றது ஓநாய்.

'நீ ஒரு பொய்யன். ஏமாற்றுவாய், உன்னை நம்ப முடியாது' என்றது ஆடு.

'நிச்சயம் ஆபத்தில் மாட்டிக் கொண்டேன் ஆடே. நீ உதவினால் இந்த ஜென்மத்துக்கும் உன்னை மறக்க மாட்டேன்' என்று கெஞ்சியது ஓநாய்.

'ஓநாயே உனக்கு நான் உதவி செய்வது வெட்டுக்கத்திக்கு நானே வலிய சென்று தலையை கொடுப்பதை போலத்தான். திருடன் கையில் சாவியை கொடுக்கும் முட்டாள் நான் இல்லை' என்ற ஆடு, அங்கிருந்து சென்றது.

'பிறர்க்கு ஆபத்தில் இருக்கும்போது உதவி இருந்தால் நமக்கும் எந்த ரூபத்திலாவது உதவி கிடைத்து இருக்கும். சிங்கத்துக்கு உதவாம வந்துட்டோம். இப்போ நமக்கு யார் உதவுவார்கள்' என்று வருந்தியது ஓநாய்.

...நல்ல கதை !