தோனிக்கு அபராதம்!!

மிர்புர்: களத்தில் எப்போதும் ‘கூலாக’ செயல்படும் தோனி, மிர்புர் ஒருநாள் போட்டியில் திடீரென ‘ஹாட்’ ஆனார். தனது ஓட்டத்தை தடுத்த வங்கதேச வீரர் ரஹ்மானை இடித்து தள்ளினார். இப்பிரச்னையில் தோனிக்கு போட்டி சம்பளத்தில் இருந்து 75 சதவீதம் அபராதமாக விதிக்கப்பட்டது.

இந்தியா வங்கதேச அணிகள் மோதிய முதல் ஒருநாள் போட்டி மிர்புரில் நடந்தது. இதில் சொதப்பிய இந்திய அணி படுதோல்வி அடைந்தது. இப்போட்டியின் 25வது ஓவரில் பெரும் பிரச்னை ஏற்பட்டது. இதனை வங்கதேசத்தின் அறிமுக வீரர் முஸ்டபிசுர் ரஹ்மான் வீசினார். 2வது பந்தில் தோனி ரன் எடுக்க ஓடிய போது, குறுக்கே வந்த ரஹ்மான் மீது வேகமாக மோதினார்.

லேசான காயமடைந்த ரஹ்மான், களத்தை விட்டு வெளியேற நேர்ந்தது. இதுகுறித்து அம்பயரிடம் புகார் செய்தார் தோனி. இதில் ரஹ்மான் தரப்பில் தவறு இருந்தது என்றாலும், அனுபவ வீரரான தோனி விலகிச் செல்லாமல் ஆத்திரத்துடன் மோதியது பலரையும் அதிர்ச்சியில் ஆழ்த்தியது.
ரஹ்மானை பொறுத்தவரை 19 வயது இளம் வீரர். அறிமுக போட்டி என்பதால் அதிக ஆர்வம் காட்டினார். முதலில் ரோகித் சர்மா ஓடும் போது இடையில் புகுந்து தடுத்தார். அப்போது ரோகித் எச்சரித்தார். பின் தோனியை தடுத்த போது தான் பிரச்னை பெரிதானது.
இதுகுறித்து ‘மேட்ச் ரெப்ரி’ ஆன்டி பைகிராப்ட் விசாரித்தார். தோனி, இந்திய அணி இயக்குனர் ரவி சாஸ்திரி, மானேஜர் பிஸ்வரப் தேவுக்கு சம்மன் அனுப்பினார். அம்பயர்கள் ராடு டக்கர், எனாமுல் ஹக்கும் விசாரணையில் பங்கேற்றனர்.

‘தோனி வேண்டுமென்றே மோதவில்லை’ என்ற கருத்தை ஏற்க மறுத்த ஆன்டி பைகிராப்ட், அவரது சம்பளத்தில் 75 சதவீதம் அபராதம் விதித்தார். இதேபோல ரஹ்மானுக்கு 50 சதவீத அபராதம் விதிக்கப்பட்டது.

இதுகுறித்து ஆன்டி பைகிராப்ட் கூறியது:
பவுலர் தவறான பாதையில் வந்ததால் பெரியளவில் மோதல் நடக்காமல் இருக்க தனது கையை வைத்து அவரை தள்ளியதாக தோனி கூறுகிறார்.

என்னைப் பொறுத்தவரையில் தோனி வேண்டுமென்றே தேவையில்லாமல் ரஹ்மானை இடித்தார். போதிய இடம் இருந்த நிலையில் அனுபவ வீரர் தோனி, இந்த மோதலை தவிர்த்திருக்க வேண்டும்.
வீரர்கள் களத்தில் உடற்ரீதியாக மோதிக் கொள்வதை எப்போதும் தவிர்க்க வேண்டும். இந்த அடிப்படையில் தோனி சம்பளத்தில் 75 சதவீதம் அபராதம் விதிக்கப்பட்டது. ரஹ்மான் தனது தவறை ஒப்புக்கொண்டார். இவருக்கு 50 சதவீதம் அபராதம் விதிக்கப்படுகிறது.
இது சகஜம் தான்

மோதல் குறித்து தோனி கூறுகையில்,‘‘ நான் ரன் எடுக்க ஓடிய போது வேறு பக்கமாக செல்வேன் என, ரஹ்மான் நினைத்திருப்பார். ஆனால் அவர் வேறு பக்கமாக செல்வார் என நான் நினைத்தேன். கடைசியில் இருவருமே அதைச் செய்யாததால் மோத நேரிட்டது. போட்டிகளில் பெரும்பாலும் இப்படி நடப்பது சகஜம் தான். இதுகுறித்து அவரிடம் பிறகு பேசினேன். மற்றபடி இது ஒரு பெரிய விஷயமே இல்லை,’’ என்றார்.
இப்படி செய்யலாமா

வங்கதேச கிரிக்கெட் போர்டு தலைவர் நஜ்முல் ஹசன் கூறுகையில்,‘‘ இந்திய அணி வலிமையானது. எங்களுக்கு அதிகமாக உதவியுள்ளனர். இவர்களுக்கு எதிராக எங்கள் வீரர்கள் முன்னேற்றம் அடைந்திருப்பது மகிழ்ச்சி. அதேநேரம் தோனி செய்தது விரும்பத்தகாத செயல். இவரைப் போன்ற வீரர் இப்படி செயல்படுவார் என நாங்கள் எதிர்பார்க்கவே இல்லை,’’ என்றார்.