நடுரோட்டில் இறக்கிவிட்ட பயணிக்கு கால் டாக்சி நிறுவனம் நஷ்டஈடு வழங்க நுகர்வோர் கோர்ட்டு உத்தரவு

சென்னை புரசைவாக்கத்தை சேர்ந்தவர் வக்கீல் மதுபிரகாஷ். இவர் கடந்த 2013–ம் ஆண்டு ஆகஸ்ட் மாதம் 29–ந்தேதி அன்று புரசைவாக்கத்தில் இருந்து விமான நிலையம் செல்வதற்காக பிரபலமான கால் டாக்சி நிறுவனம் ஒன்றில், இண்டிகா காரை பதிவு செய்தார்.

ஆனால் கால் டாக்சி நிறுவனம் இண்டிகா காருக்கு பதில் பெரிய அளவிலான ஸைலோ காரை அனுப்பி வைத்தது. ஆனால் இண்டிகா காருக்கு என்ன கட்டணமோ அதனை கொடுத்தால் போதும் என்று உறுதி கூறியது. இதையடுத்து மதுபிரகாஷை அழைத்துச் செல்வதற்காக கால் டாக்சி வந்தது. சஞ்சீவ்குமார் என்ற டிரைவர் அதனை ஓட்டி வந்தார். கார் புறப்பட்ட சிறிது நேரத்தில் அவர், வக்கீல் மதுபிரகாஷிடம் விமான நிலைய பார்க்கிங் கட்டணத்தை கொடுத்துவிடுமாறு கேட்டுள்ளார்.

இதற்கு மறுப்பு தெரிவித்த மதுபிரகாஷ் கார் விமான நிலையத்தை சென்றடைந்ததும், தேவைப்பட்டால், பார்க்கிங் கட்டணத்தை கொடுத்துவிடுகிறேன் என்று கூறினார். ஆனால் இதனை ஏற்க மறுத்த டிரைவர் சஞ்சீவ்குமார், மதுபிரகாஷை அவதூறான வார்த்தைகளால் திட்டியுள்ளார். பின்னர் நடுரோட்டில் அவரை இறக்கிவிட்டு அங்கிருந்து சென்றுவிட்டார்.

இது பற்றி உடனடியாக மதுபிரகாஷ் கால் டாக்சி நிறுவனத்தை தொடர்பு கொண்டு புகார் செய்தார். இதனை ஏற்றுக் கொண்ட அந்நிறுவனத்தின் மானேஜர் அருண், இதுபற்றி விசாரிப்பதாக உறுதி அளித்தார். உடனடியாக அவர் டிரைவர் சஞ்சீவ்குமாரை போனில் தொடர்பு கொண்டு பேசியும் பலனில்லை. அதே நேரத்தில் வக்கீல் மதுபிரகாஷ் விமான நிலையம் செல்வதற்கு மாற்று கால் டாக்சியையும் நிறுவனம் அனுப்பி வைக்கவில்லை.

இதையடுத்து மதுபிரகாஷ், கால்டாக்சி நிறுவனத்துக்கு நோட்டீஸ் ஒன்றை அனுப்பினார். இதற்கு பதில் அளித்து நிறுவனம் சார்பில் அனுப்பி வைக்கப்பட்ட கடிதத்தில் மன்னிப்பு கோரப்பட்டிருந்தது. இருப்பினும் தனக்கு ஏற்பட்ட மன உளைச்சல், அவமானம், சேவை குறைபாடு இவற்றுக்கு காரணமான கால் டாக்சி நிறுவனம் மீது அவர், மாவட்ட நுகர்வோர் கோர்ட்டில் வழக்கு தொடர்ந்தார். அதில், கால் டாக்சி நிறுவனம் ரூ.1 லட்சம் நஷ்டஈடு தரவேண்டும் என்று குறிப்பிட்டிருந்தார்.

இதனை விசாரித்த நுகர்வோர் தீர்ப்பாய தலைவர் நீதிபதி ராமலிங்கம், உறுப்பினர் அமலா ஆகியோர், அதிரடி உத்தரவை பிறப்பித்தனர். சம்பந்தப்பட்ட கால் டாக்சி நிறுவனம், மனுதாரர் மதுபிரகாசுக்கு நஷ்ட ஈடாக ரூ.5 ஆயிரம் மற்றும் வழக்கு செலவு தொகை ரூ.1000 ஆகியவற்றை 6 வாரங்களுக்குள் வழங்க வேண்டும் என்று அதில் குறிப்பிடப்பட்டுள்ளது.

மிகவும் பிரபலமான அந்த கால் டாக்சி நிறுவனத்தில் பணிபுரியும் டிரைவர்கள் பயணிகளிடம் இது போன்று தகராறில் ஈடுபடுவதும், குறிப்பாக பெண் பயணிகளிடம் அவதூறாக பேசுவதும் அன்றாட நிகழ்வுகளாகிவிட்டது என பொது மக்கள் புகார் தெரிவித்து வருகின்றனர்.

இது தொடர்பாக பாதிக்கப்படும் பயணிகள், குறிப்பிட்ட கால் டாக்சி நிறுவனத்தை தொடர்பு கொண்டு தொடர்ந்து புகாரும் செய்து வருகிறார்கள். எனவே கால் டாக்சி நிறுவனங்கள் தங்களிடம் பணியாற்றும் டிரைவர்கள் எப்படிப்பட்டவர்கள் என்பது பற்றி விசாரணை நடத்தி, பிரச்சினைக்குரிய நபர்களை பணி நீக்கம் செய்ய வேண்டும் என்பது பயணிகளின் கோரிக்கையாக உள்ளது. அதே நேரத்தில் பயணிகளிடம் கனிவாக நடந்து கொள்வது எப்படி? என்பது பற்றி கால் டாக்சி டிரைவர்களுக்கு பயிற்சி அளிக்கலாம் என்றும் அவர்கள் கூறினர்.-maalaimalar

அப்டி போடு அருவாளை.....

fast track நம்பகத்தன்மை குறைந்து வருகிறது .
நாம் வண்டியில் ஏறுவதற்கு முன்னரே மீட்டரை ஓடவிடுகிறார்கள் .
முன்பெல்லாம் fast track இல் பொன்னான காலம் .
இப்போது அவையே புண்ணான காலமாக மாறி வருகிறது .
இப்போதே அவர்கள் முழித்துக் கொள்ளாவிடில் ,
கடையை இழுத்து மூடவேண்டிய காலம்
வெகு தூரத்தில் இல்லை .

ரமணியன்