சாதனை படைக்கப்போகும் சர்வதேச யோகா தினம்

ஐக்கிய நாட்டு சபையில் பிரதமர் மோடி முன்மொழிந்து, 177 நாடுகள் ஆதரவோடு நிறைவேற்றப்பட்ட சர்வதேச யோகா தினத்தை வருகிற 21–ந் தேதி சிறப்பாக கடைபிடிக்க மத்திய அரசாங்கம் ஜரூராக ஏற்பாடுகளை செய்துவருகிறது. இன்றும் தினமும் யோகா, பிரணாயம் மற்றும் ஆழ்ந்து மூச்சை உள்ளே இழுத்து வெளியே விடுவதுதான் பிரதமர் மோடியின் சுறுசுறுப்பான வாழ்க்கையின் ரகசியமாகும். பா.ஜ.க.வின் தேர்தல் அறிக்கையிலேயே, ‘‘யோகாவும், ஆயுர்வேதமும் பண்டையகால இந்திய கலாசாரம் மனித குலத்துக்கு தந்த பரிசுகளாகும். யோகாவுக்கும் ஆயுஷ் என்று சொல்லப்படும் ஆயுர்வேதம், யோகா, இயற்கை மருத்துவம், யுனானி, சித்தா, ஓமியோபதி ஆகியவற்றை வளர்க்க பொதுமக்களின் பங்களிப்பை மேம்படுத்துவோம்’’ என்று உறுதி அளித்து இருந்தார். அதை நிறைவேற்றும் வகையில், இதற்கென தன் மந்திரிசபையில் ஒரு மந்திரியையும் நியமித்தார்.

ஆயுஷ் மந்திரி என்று அழைக்கப்படும் மந்திரி ஸ்ரீபாத்யாஸ்சோ நாயக் சர்வதேச யோகா தினத்துக்காக தீவிர ஏற்பாடுகளைச் செய்து வருகிறார். அன்று காலை 7 மணியில் இருந்து 7.35 மணி வரையில் டெல்லி ஜனாதிபதி மாளிகைக்கு நேர் எதிரே உள்ள ராஜபாதையில் இந்தியா கேட் வரையில் பிரதமர் உள்பட அனைத்து கட்சித்தலைவர்கள், பாராளுமன்ற உறுப்பினர்கள், சினிமா நட்சத்திரங்கள், விளையாட்டு வீரர்கள் உள்பட ஏறத்தாழ 45 ஆயிரம் பேர்களில் இருந்து 50 ஆயிரம் பேர்கள் வரை கலந்துகொள்ளும் யோகா முகாம் நடக்கிறது. இந்த முகாமில் அனைவரும் யோகாவில் 15 ஆசனங்கள் செய்வதற்கும், 5 நிமிடங்கள் தியானம் செய்வதற்கும் ஏற்பாடுகள் நடந்துவருகிறது. அன்று ஞாயிற்றுக்கிழமையாக இருந்தாலும் அனைத்து கல்வி நிறுவனங்கள், அரசு அலுவலகங்களிலும் இதுபோன்ற யோகா முகாம்களை நடத்த மாநில அரசுகள் கேட்டுக்கொள்ளப்பட்டுள்ளது. உலகமே யோகா தோன்றிய இடம் இந்தியாதான் என்று அறியும் வகையில், வெளிநாடுகளிலும் இதுபோன்ற முகாம்களை நடத்த இந்திய தூதரகங்கள் ஏற்பாடுகளை செய்கின்றன. தமிழ்நாட்டில் 2012–2013–ல் இருந்தே அனைத்து பள்ளிக்கூடங்களிலும் மாணவர்களுக்கு வாரத்துக்கு ஒருநாள் யோகா வகுப்புகளை நடத்த முதல்–அமைச்சர் ஜெயலலிதா உத்தரவிட்டு இன்றும் நடந்துவருகிறது. ஆக, யோகாவில் ஜெயலலிதா முதல் முயற்சியை எடுத்து இருக்கிறார் என்றே சொல்லலாம்.

யோகாவை பிரபலப்படுத்த எடுத்துக்கொள்ளும் முயற்சிகள் மதரீதியாக சில விமர்சனங்களுக்கு ஆட்பட்டுள்ளன. இது மதங்களுக்கு அப்பாற்பட்டதாகும். ஆரோக்கியமான உடல், மகிழ்வான மனம், ஆனந்தமான வாழ்க்கைக்கு வழிவகுக்கும் யோகா என்ற சொல், யுஜ் என்ற சமஸ்கிருதச் சொல்லில் இருந்து வந்ததாகும். சிதறும் சக்தியை கட்டுப்படுத்துதல் என்பது இதன் பொருளாகும். உடலையும், உயிரையும், ஆன்மாவையும் ஒன்றிணைக்கும் அற்புதமான வாழ்வியல் கலை. அனைத்து இந்தியர்களுக்கும் சொந்தமானது. அப்படி ஒரு மதத்துக்கு சொந்தமானதாக இருந்தால், மதங்களில் நம்பிக்கை இல்லாத பகுத்தறிவாளரான தி.மு.க. தலைவர் கலைஞர் கருணாநிதி பல ஆண்டுகளாக தவறாமல் தினமும் யோகா செய்திருப்பாரா?. சீனாவிலும். அமெரிக்காவிலும் இந்த அளவு பிரபலமாக இருக்குமா?. எனவே, இந்த யோகாவை ஒரு அறிவியலாக கருதி, மத்திய அரசாங்கத்தின் முயற்சிக்கு, இந்தியர்கள் அனைவரும் உத்வேகம் அளிக்கவேண்டும். சூரிய நமஸ்காரத்துக்கு சிறுபான்மையினர் எதிர்ப்பு தெரிவித்ததால், யோகா முகாமில் இடம்பெறாது என்று மத்திய அரசாங்கம் அறிவித்துவிட்டது. அப்படியும் மதரீதியாக எதிர்ப்புகள் வந்தால், கட்டாயம் என்று வேண்டாம், விருப்பத்துக்கு விட்டுவிடலாம்.