எனது கவிதைகள் !

**M.Jagadeesan** · **M.Jagadeesan** Sat May 16, 2015 8:38 pm

First topic message reminder :

மெரீனா
=======
அதுவொரு அழகிய நிலாக் காலம்
கடற்கரை பூண்டது விழாக் கோலம்
சித்திரை மாதக் கத்திரி வெய்யிலில்
நித்திரை துறந்த இத்தரை மக்கள்

காற்று வாங்க கடற்கரை மணலில்
களிப்புடன் அமர்ந்து கடலை நோக்க
அழகிய நிலவு மெல்ல எழுந்து
அடிவா னத்தில் ஒளிக்கரம் நீட்ட
பழகிய நட்பில் பரவைக் காதலி
அலைக்கரம் கொண்டு அக்கரம் பற்றும்.

நிலவும் கடலும் நடத்தும் காதலை
உலவும் தென்றலும் உடுக்களின் தொகுதியும்
பறவைக் கூட்டமும் பலபட நின்று
மறைவாய் நோக்கி மகிழ்ச்சியைக் காட்டும்.

நடுக்கடல் தன்னில் நாவாய்க் கூட்டம்
அடுக்கிய அலையின் அன்புக் கரத்தால்
ஆட்டும் அசைவில் தன்னை மறந்து
அழகிய குழந்தை போலத் தூங்கும்.

அலைகடல் தன்னில் பரதவர் கூட்டம்
வலையினை வீசி மீன்களைப் பிடிக்க
கடற்கரை மணலில் கன்னியர் கூட்டம்
கண்வலை வீச காளையர் சிக்குவர்.

மைவிழி மாதர் மையலில் சிக்கிக்
கைப்பொருள் இழந்த காளையர் ஒருபால்
கூடிய எடையைக் குறைக்க வேண்டி
ஓடும் முதியோர் கூட்டம் ஒருபால்
குதிரை முதுகில் ஏறி அமர்ந்து
அதிர ஓட்டும் ஆடவர் ஒருபால்
கடற்கரை மணலில் சிறுகுழி தோண்டிக்
குடிநீர் விற்கும் கூட்டம் ஒருபால்
வடையும் பஜ்ஜியும் வஞ்சிர மீனும்
கடைகளில் வாங்கும் கூட்டம் ஒருபால்
கைவினைக் கலைஞர் உழைப்பினில் எழுந்த
கடல்படுப் பொருட்களின் காட்சிகள் ஒருபால்
இத்தகுக் காட்சிகள் மொத்தமும் கொண்ட
மெத்தகுக் கடற்கரை மெரீனா என்னும்
உலகின் அழகிய இரண்டாம் கடற்கரை.

**விமந்தனி** · **விமந்தனி** Sat May 23, 2015 11:48 am

வாக்குக் கொடுத்தபடி நடந்துகொண்டால்
உனைத்தேடி
செல்வாக்குத் தானே ஓடிவரும்.

வார்த்தை ஜாலம் அருமை!

**M.Jagadeesan** · **M.Jagadeesan** Sat May 23, 2015 12:40 pm

நன்றி விமந்தனி !

**M.Jagadeesan** · **M.Jagadeesan** Sun May 24, 2015 8:14 am

எட்டாத உயரத்தில்...
================
சப்பை வயிற்றுடன் எச்சில் இலைதேடி
குப்பைத் தொட்டியில் குதிக்கின்ற நாய்!
விருந்துவரக் கா!கா! எனக்கரைந்தே ஒருசோற்றுப்
பருக்கைக்காய் மரக்கிளையில் வந்தமரும் காக்கை !
பசும்புல்லும் புண்ணாக்கும் தின்பதற்கு வழியின்றி
நசுங்கிய செய்தித்தாள் தின்னுகின்ற மாடு!
பெருஞ்சாக்கு மூட்டையுடன் பேப்பர் பொறுக்குபவன்!
வருகின்ற எதிர்காலம் சொல்லும் கிளிஜோஷியன்!
தட்டுமுட்டு சாமானும் தகர டப்பாவும்
இட்டால் இனிக்கின்ற பேரீட்சை தருபவன்!
செருப்பு தைப்பவன் ! குடைரிப்பேர் செய்பவன் !
தெருவெங்கும் சுற்றியே சாணை பிடிப்பவன் !
கம்பியில் நடக்கின்ற கூத்தாடி! தன்உழைப்பை
நம்பியே பிழைக்கின்ற தென்னை மரமேறி!
அனுமார் வேடமிட்டு அலைகின்ற யாசகன்
இத்தனைக் காட்சிகளும் பார்க்கின்ற அனுபவத்தை
மொத்தமாய் இழந்து எட்டாத உயரத்தில்
அடுக்குமாடிக் குடியிருப்பில் அனைத்து வசதியுடன்
மிடுக்குடன் வாழ்கின்ற பாவியேன் நான் !

Preethika Chandrakumar · Preethika Chandrakumar Sun May 24, 2015 6:36 pm

**M.Jagadeesan** · **M.Jagadeesan** Sun May 24, 2015 7:12 pm

நன்றி ப்ரீதிகா சந்திரகுமார் !

**M.Jagadeesan** · **M.Jagadeesan** Mon May 25, 2015 8:01 am

காலத்தின் கண்ணீர்!
=======================
காலதேவன் கண்ணீர் வடிக்கின்றேன்
ஞாலமாந்தர் சுமத்தும் பழிஎண்ணி!

நாட்டிலே
களவு கொள்ளை கற்பழிப்பு
கடத்தல், கொலைகள் நடந்தாலும்
காலம் கெட்டுப் போச்சென்பார்.

பொருளும் முயற்சியும் இல்லாமல்
திருமணம் உலகில் நடந்திடுமா?
துளியும் முயற்சி செய்யாமல்
பழியை என்மேல் போடுகிறார்.
காலமும் நேரமும் வந்தால்தான்
கைவரும் திருமணம் என்கின்றார்.

தீதும் நன்றும் இவ்வுலகில்
பிறர்தர வாரா ஆதலினால்
சூதும் வாதும் செய்வோருக்கு
சூழ்ந்திடும் துன்பம் நிச்சயமே!
ஆறாத துன்பம் அடைகையிலே
போறாத காலம் என்கின்றார்.

மாறும் மனித மனங்களினால்
மாறும் உலக நாகரிகம்
ஞால மாந்தர் மாறுகையில்
காலம் மாறிப் போச்சென்பார்.

காலதேவன் கண்ணீர் வடிக்கின்றேன்
ஞாலமாந்தர் சுமத்தும் பழிஎண்ணி !

Preethika Chandrakumar · Preethika Chandrakumar Mon May 25, 2015 8:06 pm

சூப்பர் கவிதைகள்!
எப்படி ஜெகதீசன் எப்படி, கவியருவி கொட்டோ கொட்டுனு கொட்டுது?
எனது கவிதைகள் ! - Page 3 3838410834

**M.Jagadeesan** · **M.Jagadeesan** Tue May 26, 2015 7:42 am

நன்றி ! பிரீதிகா சந்திரகுமார் !

**M.Jagadeesan** · **M.Jagadeesan** Tue May 26, 2015 7:49 am

வேறென்ன வேண்டும்?
=================
காலையில் சாப்பிட மூன்று இட்டலி
......கடும்பகல் தன்னில் காய்கறி தம்மொடு
ஆலையில் தீட்டா அரிசிச் சாதம்
......அத்துடன் குழம்பும் ரசமும் மோரும்
மாலையில் சுண்டலும் மணக்கும் காபியும்
......மழலைப் பேரனின் மயக்கும் பேச்சும்
வேலையில் இருந்து ஓய்வு பெற்றபின்
......வேறென்ன வேண்டும் முதியோர் தமக்கு?

Preethika Chandrakumar · Preethika Chandrakumar Tue May 26, 2015 6:21 pm

Sponsored content · Sponsored content

எனது கவிதைகள் !

எனது கவிதைகள் !

Re: எனது கவிதைகள் !

Re: எனது கவிதைகள் !

Re: எனது கவிதைகள் !

Re: எனது கவிதைகள் !

Re: எனது கவிதைகள் !

Re: எனது கவிதைகள் !

Re: எனது கவிதைகள் !

Re: எனது கவிதைகள் !

Re: எனது கவிதைகள் !

Re: எனது கவிதைகள் !

Re: எனது கவிதைகள் !

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக