'போடு எட்டு... தெரியலையா, இருக்கவே இருக்கு துட்டு!'

'போடு எட்டு... தெரியலையா, இருக்கவே இருக்கு துட்டு' என்று சொல்லும் வகையிலும், உட்கார்ந்த இடத்திலேயே லைசென்ஸ் அதுக்கு தனி அமௌண்ட் என்ற நிலையிலும் ஒட்டுனர் உரிமம் சிலர் மூலமாக கிடைக்கிறது.

போக்குவரத்து விதிகள் தெரியாமை, முறையான பயிற்சி இல்லாமை, சாலை குறியீடுகளைப் பற்றிய அறிவின்மை போன்ற காரணத்தால் ஆயிரக்கணக்கான சாலை விபத்துக்கள் நடக்கின்றன.

இவற்றைக் கற்றுக்கொடுக்க வேண்டிய வட்டாரப் போக்குவரத்து அலுவலகங்களோ ஆயிரக்கணக்கான ஓட்டைகளோடு இருக்கிறது.

மாநிலம் முழுவதும் போக்குவரத்து துறையின் கீழ், 65 வட்டாரப் போக்குவரத்து அலுவலகங்கள் மற்றும், 52 பகுதி அலுவலகங்கள் இயங்கி வருகின்றன. சேவை அளிக்கும் அலுவலகங்கள் தவிர்த்து, ஒன்பது துணை போக்குவரத்து கமிஷனர் அலுவலகங்கள் மற்றும் இரண்டு, இணை போக்குவரத்து அலுவலகங்களும் செயல்படுகின்றன.

ஓட்டுனர், நடத்துனர் உரிமங்கள், வாகனங்கள் தகுதிச் சான்று, வாகனங்கள் பதிவு உள்ளிட்ட சேவைகளுக்காக, வட்டாரப் போக்குவரத்து அலுவலகங்களுக்கு வரும் பொதுமக்களின் எண்ணிக்கை, பல மடங்கு அதிகரித்துவிட்ட தமிழகத்தில் 15 முதல் 20 வட்டாரப் போக்குவரத்து அலுவலங்களில்தான் டெஸ்ட் டிராக்கே இருக்கின்றன.

இருசக்கர வாகனங்கள் ஓட்டுவதற்கான உரிமம் வழங்கப்படுவதில் அரசின் நெறிமுறைகள் கடைபிடிக்கப்படுவதில்லை. அவற்றில் நாள்தோறும் சுமார் 3 ஆயிரத்து 900 விண்ணப்பதாரர்களுக்கு ஓட்டுனர் உரிமங்கள் வழங்கப்பட்டு வருகின்றன தமிழகத்தில் மட்டும் 1,500 ஓட்டுநர் பயிற்சிப் பள்ளிகள் இருக்கின்றன. ஆர்.டி.ஓ அலுவலகங்களில் தலைவிரித்தாடும் லஞ்சமும் பலருக்கு லைசென்ஸ் பெறும் வழியினைச் சுலபமாக்கி இருக்கிறது.

ஓட்டுனர் பயிற்சிப் பள்ளி மூலமாக விண்ணப்பிக்கும் பலரும், தேர்வுகளை சுலபமாக கடந்து விடுகிறார்கள். இதற்காகவே பலர் ஆர்.டி. ஓ அலுவலங்களின் அருகிலேயே ஓட்டுனர் பயிற்சிப் பள்ளி அமைக்கின்றனர் .

அரத பழசாகிப்போன விதிமுறைகளையும், நடைமுறைகளையும் ஊழலையும் ஒழிக்க மாற்று ஏற்பாடாக சாலை பாதுகாப்பு மசோதா கொண்டு வரப்பட்டது. இந்தச் சட்டம் அமலுக்கு வந்துவிட்டால், இப்போது ஓட்டுநர் உரிமங்களை வைத்துள்ள அனைவரும் புதிய ஓட்டுநர் உரிமங்களை எடுக்க வேண்டும். புதிய ஓட்டுநர் உரிமம் பயோமெட்ரிக் முறையில் இருக்கும். முதலில் எல்.எல்.ஆர் எடுக்க வேண்டும்.அதில் சில பாதக அம்சங்கள் இருக்கலாம்.

ஆனால் பொதுமக்கள் பாதுகாப்பு ,போக்குவரத்து விதிகளை சரியாக கடைபிடிக்கும் விதிமுறைகள் ஆகியவை மிக முக்கிய அம்சங்களாக இந்த மசோதாவில் உள்ளது குறிப்பிடத்தக்கது. பாதகங்களை நீக்கிவிட்டு மசோதாவை சட்டமாக்கியிருக்கலாம். மக்கள் பாதுகாப்பை , விபத்தை தவிர்க்க பெரிதும் பயனுள்ள இந்த மசோதாவை வரவே விடாமல் அறிமுக நிலையிலே தடுத்துவிட்டதுதான் துரதிர்ஷ்டம்

.-ஷான் (மயிலாடுதுறை ) @ விகடன்