மிகப் பெரிய மிருகக்காட்சி சாலை

உலகிலேயே மிகப் பெரிய மிருகக்காட்சி சாலை தென்னாப்பிரிக்காவில் ‘டிரான்ஸ்வா‘ என்ற இடத்தில் இருக்கிறது. இதன் பெயர் க்ருகர் நேஷனல் பார்க் என்பதாகும். இது 12,442 சதுர கி.மீ.பரப்பளவு கொண்டது. இதில் சுமார் ஆயிரம் யானைகளும், 250 ஒட்டகங்களும், 600 காட்டெருமைகளும் 500 சிங்கங்களும் இருக்கின்றன. மேலும் பலவகையான 20 ஆயிரத்திற்கும் மேற்பட்ட விலங்குகள் இருக்கின்றன. இந்த மிருகக்காட்சி சாலையைச் சுற்றி 448 கி.மீ. நீளத்திற்கு வாகனங்கள் போகக்கூடிய அளவிற்கு அகலமான சாலைகள் அமைக்கப்பட்டுள்ளன.

இந்த மிருகக்காட்சி சாலையில் மிருகங்கள் எவ்வித இயற்கை சூழ்நிலையில் இருந்தனவோ அதே மாதிரி இருக்கும் படியாக சூழலை உருவாக்கியிருக்கிறார்கள். அனேக விலங்குகள் சுதந்திரமாக சுற்றி வரும்படி திறந்த வெளியில் விட்டிருக்கிறார் கள். இவை பார்வையாளர்களை எந்த விதத்திலும் தீங்கு செய்யாத வண்ணம் வடிவமைத்திருக்கிறார்கள்.

உலகின் பல்வேறு இடங்களில் வாழும் விலங்குகளை ஒரே இடத்தில் சேர்த்து வைப்பது என்பது அவ்வளவு சுலபமல்ல. போலார் கரடி ஆண்டு முழுவதும் பனியிலே வசிக்கக்கூடியது. சிலந்திக் குரங்குகள் பனியில்லா வெப்ப பிரதேசங்களில் வாழக்கூடியவை. இவை இரண்டையும் ஒரே இடத்தில் வைக்கும் போது போலார் கரடி பனியில் இருப்பது போலவும், சிலந்திக் குரங்குகளை உஷ்ணமான இடத்தில் இருக்கும் படியாகவும் சூழ்நிலையை அமைக்கிறார்கள்.

உணவு விஷயத்தில் விலங்குளை பராமரிப்பதும் கஷ்டம் தான். யானைக்கு புல்லும் தழையும் அதிகமாக வேண்டும். புலிக்கு மாமிசம் தான் உணவு. சில விலங்குகளுக்கு புத்தம் புதிய மீன்கள் வேண்டும். குரங்குகளுக்கு புதிய காய்கனிகள் வேண்டும். இவற்றிற்காக மிருகக்காட்சியில் தினமும் நூற்றுக்கணக்கான வித்தியாசமான உணவு வகைகள் தேவைப்படுகின்றன. இதற்காக நாள்தோறும் ஏராளமான மாடுகள், மீன்கள், ரொட்டிகள், புல், தானியம், திராட்சை, பால், ஆரஞ்சு, முட்டை போன்றவற்றை கொண்டு வருகிறார்கள்.

இரையை கொடுப்பதோடு அவர்கள் கடமை முடிந்து விடுவதில்லை. அவற்றை சாப்பிட வைப்பதற்கும் தாஜா செய்ய வேண்டியுள்ளது. பெரிய பாம்புகள் மற்ற விலங்குகள் போல் சொன்னதும் கேட்பதில்லை. மலைப்பாம்புக்கு இரைபோடும் போது தொண்டைக்குள் வைத்து தள்ளிவிட்டால் தான் சாப்பிடுகிறது.

அதே போல் மிருகங்களுக்கு வியாதி வந்து விட்டாலும் பிரச்சினைதான். பல் வலியால் அவதிப்படும் சிங்கத்தின் பல்லைப் பிடுங்குவதும், யானைக்கு தொந்தரவு தரும் கால் நகத்தை வெட்டுவதும், கொரில்லா குரங்கின் கபவாத காய்ச்சலை கட்டுப்படுத்துவதும் சாதாரணமான விஷயமில்லை. விலங்குகள் மீது அக்கறையோடு இருந்தால் மட்டுமே, இவற்றை பராமரிக்க முடியும்.