எல்லா மாணவர்களுக்கும் கல்விக்கடன்

மத்திய–மாநில அரசுகள், கல்விக்கு அதிக முக்கியத்துவம் கொடுத்துவருகிறது. பிளஸ்–2 வரை அரசே அனைத்து உதவிகளையும் வழங்கும் நிலையில், இன்றைய இளைஞர் சமுதாயம் அதற்குமேல் உயர் தொழில்கல்வி படிப்பதைத்தான் தங்களின் வாழ்க்கை லட்சியமாக கொண்டுள்ளனர். அத்தகைய உயர்கல்வியை நடுத்தர மற்றும் ஏழை குடும்பங்களைச்சேர்ந்த மாணவர்களால் தங்கள் குடும்பத்தின் வருமானத்தை கொண்டு நிச்சயமாக படிக்கமுடியாது. மாணவர்களுக்கு ஒளிமிக்க எதிர்காலத்தை உருவாக்குவதற்காக வழிகாட்டும் ஒரு ஆபத்பாந்தவனாகத்தான் வங்கிகளில் கல்விக்கடன் வழங்கும் திட்டத்தை சில ஆண்டுகளுக்கு முன்பு மத்திய அரசாங்கம் கொண்டுவந்தது. இந்த கல்விக்கடன் பல மாணவர்களை மட்டுமல்லாமல், அவர்களின் குடும்பங்களையே ஏழ்மை என்ற பள்ளத்தில் இருந்து கை தூக்கிவிட்டது.

உயர்கல்விக்கான இந்த கடனை வங்கிகளில் மாணவர்கள் ரூ.4 லட்சம் வரையில் உத்தரவாதம் எதுவும் இல்லாமல் பெறமுடியும். ரூ.4 லட்சம் முதல் ரூ.7.5 லட்சம் வரையில் பெற்றோரில் ஒருவர் உத்தரவாதம் கொடுக்கவேண்டியது இருக்கும். ரூ.7.5 லட்சத்துக்குமேல் என்றால் சொத்து ஜாமீன் கொடுக்க வேண்டியது இருக்கும். படிப்பு முடிந்து ஒரு ஆண்டுக்கு பிறகோ, அதற்குமுன்பு வேலை கிடைத்துவிட்டால் உடனேயோ திருப்பிக்கட்ட வேண்டும். கடந்த டிசம்பர் மாத கணக்குப்படி கல்விக்கடன் தொகை 63 லட்சத்து 27 ஆயிரத்து 718 கோடி என்றும், இதில் வராக்கடன் ரூ.3 லட்சத்து 611 கோடி என்றும் கணக்கிடப்பட்டுள்ளது. மற்ற வராக்கடன்களின் அளவு 5.5 சதவீதம் முதல் 5.6 சதவீதம் என்ற நிலையில் கல்விக்கடன்களில் 4.75 சதவீதம் வராக்கடனாக இருக்கிறது. நிச்சயமாக இது அதிகமான தொகை என்ற நிலையில், இப்போது திடீரென்று நிதி அமைச்சகம் பொதுத்துறை வங்கிகளுக்கு ஒரு தாக்கீதை தெரிவித்துள்ளது. மாணவர்களுக்கு கல்விக்கடன் வழங்கும்போது, அவர்கள் எந்த கல்லூரியில் படிக்கிறார்கள்?, அந்த கல்லூரியின் கேம்பஸ் ரிக்கார்டுகள் எப்படி இருக்கிறது? என்ற அடிப்படையிலேயே வழங்கவேண்டும். ஏனெனில், அத்தகைய மாணவர்கள்தான் வேலைவாய்ப்பு பெறுகிற சூழ்நிலையில் அவர்களால்தான் கடனை திருப்பிக்கட்டமுடியும் என்று புது வியாக்கியானத்தைக் கொடுத்துள்ளது. இந்திய வங்கிகள் சங்கம், இந்தியா முழுவதிலும் இந்த அடிப்படையில் 1,100 கல்லூரிகள், பல்கலைக்கழகங்களை தரம் பிரித்து, அவர்களுக்கு மட்டும் எளிதில் வங்கிக்கடன் கிடைக்க வாசலைத் திறந்துவைத்துள்ளது.

இந்த புதியமுறை நிச்சயமாக தென்னிந்திய அதிலும் குறிப்பாக, தமிழக ஏழை மாணவர்களை பெரிதும் பாதிக்கும். ஏனெனில், கடந்த டிசம்பர் மாதம் 31–ந் தேதி கணக்குப்படி, இந்தியா முழுவதிலும் 30 லட்சத்து 169 மாணவர்கள் இந்த கல்விக்கடன் பெற்றுள்ள நிலையில், தென்மாநிலங்களில் மட்டும் 18 லட்சத்து 26 ஆயிரத்து 753 பேர் பெற்று இருக்கிறார்கள். பொதுவாக ஏழை–எளிய குடும்பங்களைச்சேர்ந்த கிராமப்புற மாணவர்கள் தங்கள் வீட்டுக்கு அருகில் இருக்கும் ஒரு கிராமப்புற கல்லூரியில் படிப்பதற்கான வசதியுடன்தான் இருப்பார்கள். எனவே, கல்லூரிகளின் கேம்பஸ் ரிக்கார்டை பார்க்காமல், அனைத்து ஏழை மாணவர்களுக்கும் உதவவேண்டும் என்ற நோக்கில் தொடங்கப்பட்ட இந்த திட்டத்தை, அந்த நோக்கின் அடிப்படையிலேயே தொடர்ந்து செயல்படுத்தவேண்டும். மாணவர்களுக்கு கடன் கொடுக்கும் அரசாங்கம், அவர்களுக்கான வேலைவாய்ப்புகளை உருவாக்கும் வகையில், உற்பத்தி பிரிவை வலுப்படுத்தவேண்டும். கல்விக்கடன்களுக்கான வட்டி ஏறத்தாழ 13.50 சதவீதமாக பல வங்கிகளில் பல விகிதங்களில் இருப்பது அதிகம் என்று மாணவர்கள் கருதுகிறார்கள். ஒருபக்கம் வேலைவாய்ப்புகளை பெருக்கி மறுபக்கம் வட்டி விகிதத்தையும் குறைக்கலாமே!

தினத்தந்தி

வட்டி இல்லா கடன் வழங்கலாம்