மன்மதக் குழந்தை !

**நாகசுந்தரம்** · 27/12/2011

First topic message reminder :

மன்மதக் குழந்தை !

பத்துமாதம் பைசுமந்து
பத்துமாதம் மடிசுமந்து
ஐந்தாண்டு கை சுமந்து
பின்பு ஆயுளெல்லாம் மனம் சுமக்கும்
மாதாவை நாம் அறிவோம்.
அதுபோல்
பனிரெண்டு மாதங்கள்
இரண்டிரண்டாய் ருதுவாக
பனிக்காலம் வெயில்காலம்
இளவேனிர்க்காலமென
பூகம்பம் வெள்ளங்கள்
இவையெல்லாம் கடந்து இங்கே
பெற்றுவிட்டாள் ஒரு குழந்தை
மன்மதப் பெயர் கொண்டு
புத்தாண்டு பிறந்ததடா
பூமித்தாய் பெற்றுவிட்டாள்
நாமவனை நன்றாய் வளர்த்திடவே
நானொரு வழி சொல்வேன்
நல்லதெனப்பட்டால் கேளுங்கள்
அல்லதென்றால் அகன்றிடுங்கள்
மன்மதக் குழந்தைக்கிங்கு
தூய்மையே தாய்ப்பாலாம்
வீட்டை சுற்றி விதம்விதமாய் மரம்
நட்டால் அதுவே நல் ஆடை
ஓடும் நதியெல்லாம் ஒழுங்காக்கி
ஆடுவதே அவனுக்கு நீராட்டல்
விதம்விதாமாய் பயிர்செய்தல்
நிதம் நிதம் அவனுக்கு நல் விருந்து
துளை போட்டு பூமிதனை
துளைக்காதிருத்தல் வாழ்க்கை
துணைவியாவாள்
இப்படி வளர்த்திட்டால்
மூப்பில் நம் குலம் காப்பான்
தப்பாமல் தலை காப்பான்
தொடுத்த பாமாலை கொடுத்தேன் புத்தாண்டில்
கடுத்த முகம் அகற்றி காசினியை காத்திடுங்கள்
பூமித்தாய் அவளும் உச்சி குளிர்ந்திடுவாள்
சாமியாய் நம் சங்கடங்கள்
சடுதியில் தீர்த்திடுவாள்
அடுத்த சந்ததியாய் அரவணைத்து இருந்திடுவாள்
அதுவே நம் நோக்கம் மன்மதனே நிறைவேற்று !

அனைவருக்கும் மன்மத வருட தமிழ்புத்தாண்டு வாழ்த்துக்கள்