ஐ.நா. பாதுகாப்பு கவுன்சிலில் நிரந்தர உறுப்பினர் ஆவது இந்தியாவின் உரிமை பிரதமர் மோடி பேச்சு

உலக அமைதிக்கு மகத்தான பங்களிப்பை வழங்கிய ‘இந்தியா, ஐ.நா. பாதுகாப்பு கவுன்சிலில் நிரந்தர உறுப்பினர் ஆவது அதன் உரிமையாகும்’ என்று பிரதமர் மோடி உறுதியாக பேசிஉள்ளார்.

பிரான்ஸ் நாட்டில் 4 நாட்கள் சுற்றுப்பயணம் மேற்கொண்டு உள்ள பிரதமர் மோடி நேற்று இரவு, பிரான்ஸ்வாழ் இந்திய மக்கள் மத்தியில் உரையாற்றினார். பிரதமர் மோடி பேசுகையில், முதலாவது உலகப்போரில் இருந்தும், ஐ.நா. அமைப்பு அமைக்கப்பட்ட பின்னரும் இந்தியா உலகின் அமைதிக்காக பெரும் தியாகங்களை செய்து உள்ளது. உலகம் முழுவதும் அமைதிப்படைக்கு இந்தியா பெரும் பங்காற்றியது. இப்போது, இந்தியா ஐ.நா. பாதுகாப்பு கவுன்சிலில் நிரந்தர உறுப்பினர் பதவி கேட்டு வருகிறது.

இப்போது, அமைதிப்படையின் நடவடிக்கைக்கு மதிப்பளிக்க வேண்டிய நேரம் என்பதை உலக நாடுகளுக்கு வலியுறுத்துகிறேன். மகாத்மா காந்தி மற்றும் கவுதம் புத்தா ஆகியோரது உணர்வுகளின் உரிமையாகும். இந்திய கெஞ்சிய நாட்கள் எல்லாம் போய்விட்டது. தற்போது எங்களுடைய தேசம் அதனது உரிமையைதான் கேட்கிறது. என்று கூறினார். பிரதமர் மோடி உரையை கேட்ட அங்கிருந்த 3000 இந்தியர்களும் “மோடி, மோடி” என்ற கோஷத்தை எழுப்பினர். ஐ.நா. பாதுகாப்பு கவுன்சில் தனது 70-வது ஆண்டு தினத்தை கொண்டாடும் போது இதனை நினைவில் கொள்ளும் என்றும் பிரதமர் மோடி நம்பிக்கை தெரிவித்து உள்ளார்.

இந்தியாவை முன்னெடுத்து செல்லவே பிரான்ஸ் வந்துள்ளதாகவும், வளர்ச்சிப் பாதையில் பிரான்ஸ் நாட்டை இந்தியா பின்னுக்கு தள்ளும். இந்தியா அமைதியை விரும்பும் நாடு, இந்தியாவில் விரைவில் வறுமை ஒழிக்கப்படும் என்றும் பிரதமர் மோடி நம்பிக்கை தெரிவித்தார். முன்னதாக, முதல் உலகப்போரின்போது, பிரான்சில் வீர மரணம் அடைந்த 10 ஆயிரம் இந்திய வீரர்களின் நினைவாக லில்லி நகரில் அமைக்கப்பட்டுள்ள நினைவுச்சின்னத்தை பார்வையிட்ட பிரதமர் மோடி அஞ்சலி செலுத்தினார். உலக அமைதிக்கு இந்தியாவின் பங்களிப்பை உலகநாடுகளுக்கு எடுத்துச் செல்லும் வகையில் பிரதமர் மோடியின் பேச்சு வலுவாக அமைந்தது.