கண்டதும் நாவில் சுவையூறும் சாக்லேட் பொக்கே!

**krishnaamma** · **krishnaamma** Tue Apr 07, 2015 11:17 pm

இன்றைய காலகட்டத்தில் குழந்தைகள் அதிகம் விரும்பி சாப்பிடும் சாக்லேட்டுகள் பலவகையிலும், பல வண்ணங்களிலும் கண்ணைக் கவரும் விதத்தில் வந்துவிட்டது. இருந்தாலும் அதிலிருந்து சற்று வித்தியாசமாக யோசித்து ஹோம்மேட் சாக்லேட்டில் "பொக்கே' செய்து குழந்தைகளை அசத்தி வருகிறார் சென்னை கீழ்ப்பாக்கம் பகுதியில் வசித்து வரும் மாலதி ஸ்ரீதர். ஓர் இனிய பொழுதில் அவரைச் சந்தித்தோம். ஒரு பிறந்தநாள் கொண்டாட்டத்துக்காக பலவித வடிவங்களிலான பெரிய அளவு சாக்லேட் பொக்கே தயாராகிக் கொண்டிருந்தது. அதை தயார் செய்து கொண்டே நம்முடன் மாலதி உரையாடியது....

""திருமணத்துக்கு பிறகு வீட்டிலிருந்தபடியே ஏதாவது தொழில் செய்ய வேண்டும் என்று நினைத்தேன். அப்போது செங்கல்பட்டு அருகே வெளிநாட்டவர்கள் சிலர் வந்து அழகுக்கலை பயிற்சியளிக்கும் வகுப்பு நடத்துவதாக ஒரு பத்திரிகையில் படித்து அங்கு சென்று அழகுக்கலைப் பயிற்சி எடுத்துக்
கொண்டேன்.

அதனுடன் சேர்த்து மணப்பெண் அலங்காரத்துக்கான சிறப்புப் பயிற்சியும் எடுத்துக்கொண்டேன். அதன் பிறகு தெரிந்தவர்கள், உறவினர்களின் இல்லத்திருமண விழாக்களில் மணப்பெண்ணுக்கு அலங்காரம் செய்துவந்தேன். பிறகு வாய்மொழியாக கேள்விப்பட்டு நிறைய பெரிய வாய்ப்புகளும் வந்தன.

ஆனால் எனக்கு ஆங்கில மொழிதிறன் குறைவாக இருந்ததால் தமிழில் பேசிய காரணத்திற்காக நிராகரிப்பட்டேன். அதனால் ஆங்கிலம் நன்றாக பேசக்கூடிய இதே துறையில் இருக்கும் என் தோழிகள் சிலரின் உதவியுடன் மீண்டும் மணப்பெண் அலங்காரத்தைத் தொடர்ந்தேன். அங்கேயோ என் திறமையை பயன்படுத்திக் கொண்டு அவர்கள் பெயர் வாங்கிக் கொண்டார்கள். இதனால் அந்தத் துறையே வேண்டாம் என்று நினைத்து வேறு துறைக்குச் செல்ல முடிவுவெடுத்தேன்.

வேறு என்ன செய்வது மீண்டும் கைத்தொழில்கள் பயிற்சி வகுப்புகள் குறித்து இதழ்களில் படித்தேன். அதைப் பயன்படுத்தி பலவகையான ஓவியங்கள், மியூரல் ஓவியம், ஃபேபரிக் ஓவியம்,போஸ்டல் காகிதத்தில் வண்ண ஓவியங்கள்,சேலைகளில் செய்யும் ஆர்.இ. ஓர்க், ஹார்ட் போர்டில் வாஸ்து சக்கரம் செய்வது, குங்குமச் சிமிழ் செய்வது, அலங்காரப் பொருள்கள் போன்ற கைவினைப் பொருள்கள் செய்வது, ஹோம்மேட் சாக்லேட் தயாரிப்பது போன்றவற்றைக் கற்றுக் கொண்டேன். அதன்பின்னர் என் மகளுக்கு விதவிதமாக நகைகள் அணிந்து அழகுபார்ப்பதற்காக பேஷன் ஜுவல்லரி செய்வதையும் கற்றுக் கொண்டேன்.

இதிலிருந்து ஏதாவது ஒன்றை தொழிலாக எடுத்துக் கொள்ள நினைத்தேன். அது அனைவருக்கும் பிடித்தமானதாக இருந்தால் வியாபாரம் நன்றாக இருக்குமே என்று எண்ணியபோது சாக்லேட்தான் மனதில் நின்றது.
அதில் என்ன வித்தியாசப்படுத்தலாம் என்று எண்ணும்போது சாக்லேட்டில் பொக்கே செய்வது பற்றிக் கேள்விப்பட்டேன். சாக்லேட்டில் நிறைய டிரை புரூட்ஸ்களைச் சேர்த்து முயற்சி செய்தும் பார்த்தேன். நல்ல வரவேற்பு கிடைத்தது. அதன்பிறகு பிறந்தநாள் கொண்டாட்டம், திருமண விழா போன்றவற்றிருக்கு நிறைய ஆர்டர் வர ஆரம்பித்தது.

50 ரூபாயிலிருந்து 1000ரூபாய் வரை இந்த சாக்லேட் பொக்கே விதவிதமாக செய்து வருகிறேன். இதில் தற்போது பிறந்தநாள் விழா, திருமண விழாவிற்கு கிப்ட் கொடுக்கவும் ஆர்டர்கள் வருகின்றன. அதுபோக மீதம் இருக்கின்ற நேரங்களில் வாஸ்து சக்கரங்கள், மியூரல் ஓவியங்கள், டிரைபல் ஓவியங்கள் வண்ணக் கைவேலைபாடு அடங்கிய அலங்காரப் பொருட்கள் போன்றவற்றையும் செய்து அருகில் உள்ள கடைக்களுக்குச் சப்ளை செய்து வருகிறேன்.

மேலும் இந்தக் கைத்தொழில்களுக்கு பயிற்சி வகுப்புகளும் எடுக்கிறேன். இது தவிர 3 வயதில் இருந்து பதினைந்து வயதுக்குள் இருக்கும் குழந்தைகளுக்கான கோடைக்கால பயிற்சி வகுப்புகள் க்ளே டாய்ஸ், கண்ணாடி ஓவியங்கள், மெக்சிகன்பார்க் பெயிண்டிங், ஐஸ்கிரீம் ஸ்டிக் பொம்மைகள், டிராயிங் செய்வது போன்றவையும் பயிற்சியளித்து வருகிறேன்'' என்றார்.

ஸ்ரீ.

கண்டதும் நாவில் சுவையூறும் சாக்லேட் பொக்கே!

கண்டதும் நாவில் சுவையூறும் சாக்லேட் பொக்கே!

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக