பொய் சொல்றதுக்கு அளவு வேண்டாமா?

**krishnaamma** · **krishnaamma** Tue Apr 07, 2015 8:51 pm

சிறந்த துணை நடிகைக்கான ஆஸ்கர் விருதை, 12 இயர்ஸ் எ ஸ்லேவ் என்ற ஆங்கில படத்தில் நடித்ததற்காக பெற்ற லூபிதா நியாங்கோவை பற்றித் தான், தற்போது, ஹாலிவுட்டில் பரபரப்பாக பேசி வருகின்றனர். இவர், ஆஸ்கர் விருது நிகழ்ச்சியில் பங்கேற்பதற்காக, முத்துக்கள் பதிக்கப்பட்ட வித்தியாசமான கவுனை அணிந்து வந்திருந்தார். இந்த உடையின் மதிப்பு, 93 லட்சம் ரூபாய் என்றும் பீற்றினார்.

இது நடந்த சில நாட்களுக்கு பின், அமெரிக்காவில் ஒரு ஓட்டலில் தங்கியிருந்த லூபிதா, ஷாப்பிங் சென்று திரும்பியவர், தன்னுடைய முத்து கவுனை யாரோ திருடி விட்டதாக போலீசில் புகார் அளித்தார். இதனால், அந்த ஓட்டலே, களேபரமானது.

கவுன் திருடனை பிடிக்க போலீசார் தனிப்படை அமைத்தனர். அடுத்த நாளே அந்த கவுன், அந்த ஓட்டலுக்கு அருகே குப்பை தொட்டியில் கேட்பாரற்று கிடந்தது. அத்துடன், போலீசாரை தொடர்பு கொண்ட அந்த திருடன், 'முத்துக்கள் பதிக்கப்பட்ட, 93 லட்ச ரூபாய் மதிப்புள்ள கவுன் என, அந்த பொண்ணு கூறியது வடிகட்டிய பொய். அதில் உள்ள முத்துக்கள் எல்லாம் டூப்ளிகேட். அதனால் தான் குப்பை தொட்டியில் வீசி விட்டேன். பொய் சொல்றதுக்கு ஒரு அளவு வேண்டாமா...' என, கடுப்படித்தான்.

இந்த தகவல் வெளியானதிலிருந்து, லூபிதா, ஓட்டலை விட்டு வெளி வரவே இல்லை.

ஜோல்னா பையன்