சோனியா கறுப்பா இருந்தா கட்சி தலைவர் ஆகியிருப்பாரா?

புதுடில்லி : ''சோனியா, நைஜீரியா நாட்டைச் சேர்ந்தவராக இருந்து, கறுப்பு நிறத்தவராக இருந்திருந்தால், ராஜிவ் தான் அவரை திருமணம் செய்திருப்பாரா? காங்கிரசார் தான் அவரை தலைவராக தேர்ந்தெடுத்திருப்பரா?'' என, அதிரடியாக கேள்வி எழுப்பி, சர்ச்சைக்குள் தானாக சிக்கிக் கொண்டுள்ளார், மத்திய அமைச்சர், பா.ஜ.,வைச் சேர்ந்த கிரிராஜ் சிங், 63.

டில்லியில் நேற்று நிருபர்களை சந்தித்த அவர் மேலும், ''மலேசிய விமானம் சமீபத்தில் காணாமல் போனது போல, காங்கிரஸ் துணைத் தலைவர் ராகுலையும் நீண்ட காலமாக காணவில்லை,'' என்று கூறி, காங்கிரசாரின் கடும் எதிர்ப்பையும் சம்பாதித்து உள்ளார்.

அமைச்சர் கிரிராஜ் சிங்கின் இந்த பேட்டி, 'டிவி'களில் வெளியான உடனேயே, பத்திரிகையாளர்களை சந்தித்த, காங்கிரஸ் செய்தித் தொடர்பாளர் மணிஷ் திவாரி, ''இவர் போன்ற ஜந்துக்களை அமைச்சரவையில் சேர்த்ததற்கு, பிரதமர் மோடி தான் பதிலளிக்க வேண்டும்,'' என்றார் கடுமையாக.

நைஜீரிய தூதர்(பொறுப்பு) ஓ.பி.ஓகோங்கர் கூறுகையில், நைஜீரிய பெண்கள் குறித்து, மத்திய அமைச்சர் கிரிராஜ் வெளியிட்ட மோசமான கருத்தை, திரும்ப பெற வேண்டும்; அவர்,நிபந்தனையற்ற மன்னிப்பும் கோர வேண்டும். மோசமான ரசனையில் அவர் பேசிய பேச்சு, நைஜீரிய அரசின் கவனத்திற்கு கொண்டு செல்லப்படும்; வெளியுறவு அமைச்சகத்திடம் புகார் அளிக்கப்படும் என்றார்.

கறுத்துடுவீங்க...:

சமீபத்தில் போராட்டத்தில் ஈடுபட்ட பெண் நர்ஸ்களை, 'பட்டப் பகலில், கொளுத்தும் வெயிலில் போராட்டம் நடத்தினால், கறுத்துப் போவீங்கம்மா... அப்புறம், மாப்பிள்ளை கிடைக்கிறது கஷ்டம்' என, கிண்டல் அடித்த, கோவா மாநில முதல்வரும், பா.ஜ.,வைச் சேர்ந்தவருமான லட்சுமிகாந்த் பர்சேகர், சர்ச்சையில் சிக்கியுள்ளார். அவரின் பேச்சுக்கு பலத்த எதிர்ப்பு கிளம்பியதும், ''நான் அப்படி சொல்லவே இல்லை. வெயிலில் அமர்ந்து போராடினால், கறுத்துப் போவீர்கள் என்று தான் கூறினேன்; மாப்பிள்ளை, திருமணம் என்றெல்லாம் பேசவில்லை,'' என, பர்சேகர் கூறினார்.
-
தினமலர்

வாய் திறப்பதால் --முட்டாள் அறியப்படுகிறான் 
என்ற முதுமொழி மனதில் நிழலாடுகிறது !
ரமணியன்

திமிர் தனமான பேச்சு ...