உலகிலேயே மிகப்பெரிய அரசியல் கட்சி பாரதீய ஜனதா

பாரதீய ஜனதா உலகிலேயே மிகப்பெரிய அரசியல் கட்சியாக உருவாகி உள்ளது. கட்சியில் தொடர்ந்து உறுப்பினர் சேர்க்கையின் மூலம், 8.80 கோடி தொண்டர்களை கொண்டு பாரதீய ஜனதா கட்சி உலகின் மிகப்பெரிய அரசியல் கட்சியாக உள்ளது. 2-வது கட்சியாக சீனாவின் ஆளும் கம்யூனிஸ்ட் கட்சி உள்ளது.

ஞாயிறு அன்று பாரதீய ஜனதா கட்சியின் உறுப்பினர்கள் எண்ணிக்கை 8.80 கோடியை எட்டியது என்றும் கட்சியில் இந்த மாதம் இறுதியில்(இன்றுடன்) உறுப்பினர்கள் எண்ணிக்கை 10 கோடியை தாண்டும் என்றும் தகவல்கள் தெரிவித்து உள்ளது. பாரதீய ஜனதா கட்சி கடந்த நவம்பர் மாதத்தில் இருந்து கட்சிக்கு உறுப்பினர்களை சேர்க்கும் பணியினை முழு வீச்சில் செயல்படுத்தி வருகிறது. பெங்களூரில் வருகிற ஏப்ரல் 3 மற்றும் 4-ம் தேதியில் நடைபெறும் பாரதீய ஜனதா கட்சியின் தேசிய தலைவர்கள் கூட்டத்தில் கட்சியின் முழு உறுப்பினர் விபரத்தை கட்சியின் தலைவர் அமித்ஷா அறிவிப்பார் என்று எதிர்ப்பார்க்கப்படுகிறது.

கடந்த வருடம் பாராளுமன்றத் தேர்தலில், பிரதமர் வேட்பாளராக நரேந்திர மோடி அறிவிக்கப்பட்டதில் இருந்து பாரதீய ஜனதா கட்சி வேகமாக வளரத் தொடங்கியது. பாரதீய ஜனதா கட்சியினை வலுப்படுத்தும் விதமாக நாடு முழுவதும் உறுப்பினர்கள் சேர்க்கும் பணியினை கட்சியின் தலைவர் அமித்ஷா கடந்த ஆண்டு நவம்பர் மாதம் தொடங்கி வைத்தார். அதிலிருந்து கட்சியில் உறுப்பினர்கள் சேர்க்கப்பட்டு வருகின்றனர். பாரதீய ஜனதாவில் உறுப்பினர் சேர்க்கைக்கு நவீன தொழில்நுட்ப முறை மற்றும் ஆன்-லைனும் பயன்படுத்தப்படுகிறது. இதற்கு நல்லவரவேற்பு கிடைத்து உள்ளது. மொபைல் வாயிலாக மிஸ்டுகால் கொடுத்தவுடன், பதிவுஎண் அனுப்பி வைத்து உறுப்பினர் விண்ணப்பம் வழங்கி கட்சிக்கு உறுப்பினர்கள் சேர்க்கப்படுகின்றனர்.

சீனாவில் ஆளும் கட்சியான கம்யூனிஸ்ட் கட்சியே இதுவரையில் 8 கோடியே 60 லட்சம் உறுப்பினர்களுடன் உலகின் மிகப்பெரிய கட்சியாக இருந்தது. அதனை தற்போது பாரதீய ஜனதா முறியடித்து உள்ளது. இதேபோன்று காங்கிரஸ் கட்சியும் உறுப்பினர் சேர்க்கையை தொடங்கி உள்ளது.

உறுப்பினர் சேர்க்கையில் உலக 'சாம்பியன்': பா.ஜ.,வை தொடர்ந்து காங்கிரசும் களம் இறங்கியது

புதுடில்லி: பா.ஜ.,வை தொடர்ந்து, காங்கிரசும், இணையம் மூலமாக உறுப்பினர்களை சேர்க்கும் நடவடிக்கையை துவங்கியுள்ளது. இதற்காக, தனியாக, 'மொபைல் அப்ளிகேஷனும்' உருவாக்கப்பட்டுள்ளது.

8.8 கோடி உறுப்பினர்கள்:

மத்தியில், பா.ஜ., ஆட்சிக்கு வந்ததுமே உறுப்பினர் சேர்க்கையில் தீவிரம் காட்டத் துவங்கியது. மொபைல் போன்களில் குறிப்பிட்ட எண்ணுக்கு, 'மிஸ்டு கால்' கொடுத்தால், உறுப்பினராக சேரும் திட்டத்தையும் அறிவித்தது. இதற்கு பெரிய அளவில் பயன் கிடைத்தது. இதுவரை, பா.ஜ.,வில், 8.8 கோடி உறுப்பினர்கள் சேர்ந்துள்ளதாகவும், இதன் மூலம், உலகிலேயே அதிக உறுப்பினர்களை உடைய கட்சி என்ற சாதனையை படைத்துள்ளதாகவும் பா.ஜ., தலைவர்கள் தெரிவித்து உள்ளனர். பத்து கோடி உறுப்பினர்கள் என்னும் இலக்கை அடைய, ஏப்ரல் 1ம் தேதியில் இருந்து, உறுப்பினர் சேர்க்கை விரைவு படுத்தப்படுவதாக, கட்சி வட்டாரத்தில் கூறப்படுகிறது. பா.ஜ.,வுக்கு அடுத்தபடியாக, சீனாவைச் சேர்ந்த கம்யூனிஸ்ட் கட்சிக்கு, 8.6 கோடி உறுப்பினர்கள் உள்ளதாகவும் கூறப்படுகிறது.

எளிதாக்கும் வகையில்...:

இதைத் தொடர்ந்து, காங்கிரசும், இணையம் வாயிலான உறுப்பினர் சேர்க்கைக்கு முக்கியத்துவம் தரத் துவங்கிஉள்ளது. இந்த திட்டத்தை, முன்னாள் பிரதமரும், காங்கிரஸ் மூத்த தலைவருமான மன்மோகன் சிங், அவர் மனைவி குர்சரண் கவுர் ஆகியோர் டில்லியில் நேற்று துவக்கி வைத்தனர். மேலும், கட்சியில் உறுப்பினர் சேர்க்கையை எளிதாக்கும் வகையிலும், இளைஞர்களை ஈர்க்கும் வகையிலும், மொபைல் அப்ளிகேஷன் ஒன்றும் காங்கிரஸ் சார்பில் உருவாக்கப்பட்டுள்ளது. இதன் மூலம், ஸ்மார்ட் போன்கள் வாயிலாக புதிய உறுப்பினர்கள் சேர முடியும்.

மற்ற கட்சிகளில் உறுப்பினர்கள்

காங்கிரஸ் - 3.8 கோடி
திரிணமுல் காங்கிரஸ் - 1 கோடி
சமாஜ்வாதி - 1.50 கோடி
பகுஜன் சமாஜ் - 1.50 கோடி
அ.தி.மு.க., - 1.50 கோடி
தி.மு.க., - 1.25 கோடி
ஆம் ஆத்மி - 4 லட்சம்
ஐக்கிய ஜனதா தளம் - 1.20 கோடி
இந்திய கம்யூ.. - 70 லட்சம்
மார்க்சிஸ்ட் - 80 லட்சம்