உலகின் No1 வீராங்கனை... வரலாறு படைக்கவுள்ள சாய்னா நேவால்!

உலக பேட்மிண்டன் தரவரிசையில் விரைவில் இந்திய வீராங்கனை சாய்னா நேவால் முதலிடம் பிடிக்கவுள்ளார். இன்னும் ஒரே ஒரு போட்டியில் வெற்றி பெற்றால் அவர் இந்த சாதனையை படைத்துவிடுவார். அந்த சாதனையை படைத்தால், சர்வதேச பேட்மிண்டன் அரங்கில் கடந்த 2010ஆம் ஆண்டுக்கு பிறகு முதலிடம் பிடித்த முதல் சீனர் அல்லாத வீராங்கனை என்ற புதிய சாதனையை அவர் எட்டுவார்.

டெல்லியில் இந்தியன் ஓபன் பேட்மிண்டன் போட்டி நடைபெற்று வருகிறது. நேற்று நடந்த காலிறுதி ஆட்டத்தில், இந்திய வீராங்கனை சாய்னா நேவால் இந்தோனேஷிய வீராங்கனை ஹனா ராமாதினியை 21-15, 21-12 என்ற நேர் செட் கணக்கில் வீழ்த்தி அரையிறுதி ஆட்டத்துக்கு முன்னேறினார். கவுரவமிக்க இந்த போட்டியின் அரையிறுதி ஆட்டத்துக்கு முதல் முறையாக சாய்னா நேவால் முன்னேறியுள்ளார்.

25 வயது சாய்னா நேவால் இன்று நடைபெறவுள்ள அரையிறுதி ஆட்டத்தில் ஜப்பான் வீராங்கனை யூகி ஹசிமோட்டாவை எதிர்கொள்கிறார். அரையிறுதி ஆட்டத்தில் சாய்னா நேவால் வெற்றி பெற்றால் உலக பேட்மிண்டன் அரங்கில் சாய்னா நேவால் முதலிடம் பிடித்துவிடுவார். அப்படி பிடித்தால் உலக தரவரிசையில் மகளிர் பிரிவில் முதலிடம் பிடித்த சீனர் அல்லாத வீராங்கனை என்ற சிறப்பையும் சாய்னா நேவால் பெறுவார்.

தற்போது மகளிர் தரவரிசையில் சீன வீராங்கனை லீ ஜெரோய் 79 ஆயிரத்து 214 புள்ளிகளுடன் முதலிடத்தில் உள்ளார். ஆனால் லீ இந்த தொடரில் காயம் காரணமாக பங்கேற்கவில்லை. இதனால் 7800 புள்ளிகளை அவர் இழக்க நேரிட்டுள்ளது. தற்போது தரவரிசையில் சாய்னா நேவால் 74 ஆயிரத்து 381 புள்ளிகளுடன் உள்ளார். எனவே இந்தியன் ஓபன் போட்டித் தொடரில் அரையிறுதிப் போட்டியில் சாய்னா நேவால் வெற்றி பெற்று இறுதிஆட்டத்துக்கு முன்னேறினால் தரவரிசை பட்டியலில் முதலிடத்தை பெற்று விடுவார்.

அதேவேளையில் சாய்னா நேவால் அரையிறுதியில் தோற்று தற்போது தரவரிசையில் 4வது இடத்தில் உள்ள ஸ்பெயின் வீராங்கனை கரோலினா மெரின் வெற்றி பெறும்பட்சத்தில் அவர் முதலிடத்தை பிடித்து விடுவார்.

இதற்கு முன் கடந்த 1980ஆம் ஆண்டு இந்திய பேட்மிண்டன் வீரர் பிரகாஷ் படுகோன் தரவரிசையில் முதலிடம் பிடித்திருந்தார். அதற்குபின் பேட்மிண்டன் உலகில் இத்தகைய அரிய சாதனையை நிகழ்த்தவுள்ள மற்றொரு இந்தியர் சாய்னா நேவால்தான்.

சைனா வுக்கு பை சொல்ல வாழ்த்துகள் சாய்னா

மனமார்ந்த வாழ்த்துக்கள் வெற்றிபெற ...............

வாழ்த்துவோம் அவரை 

ரமணியன்