மியூச்சுவல் பண்ட்: அறிந்துகொள்ள வேண்டியவை

தற்போது பலரும் மியூச்சுவல் பண்ட்களில் முதலீடு செய்ய ஆர்வம் காட்டுகிறார்கள். ஆனால் அதற்கு முன் சில விஷயங்களை அறிந்திருப்பது அவசியம் என்கிறார்கள் நிதி ஆலோசகர்கள்.

மியூச்சுவல் பண்டுகளில் முதலீடு செய்வதற்குமுன், உங்களுடைய 'ரிஸ்க்' எடுக்கும் தன்மையையும், எத்தனை வருடங்களுக்கு முதலீடு செய்யப் போகிறீர்கள் என்பதையும் முடிவு செய்துகொள்வது முதலாவது முக்கியமான விஷயம். மேலும், முதலீடு ஒரேமுறை முதலீடா அல்லது எஸ்.ஐ.பி. முறை முதலீடா என்பதையும் கவனிக்க வேண்டும். இவற்றின் அடிப்படையில் உங்களுக்கு ஏற்ற மியூச்சுவல் பண்ட் திட்டத்தைத் தேர்வு செய்வது நல்லது.

மியூச்சுவல் பண்ட் திட்டத்தில் முதலீடு செய்வதற்குமுன், ஏற்கனவே செய்துள்ள முதலீடுகள் குறித்தும் அலசுவது அவசியம். ஏற்கனவே என்னென்ன முதலீடுகள் செய்துள்ளீர்கள், அவற்றின் நிலை என்ன, அவசரகாலத் தேவைகளுக்குத் தேவையான முதலீடு உள்ளதா என்பதைப் பார்க்க வேண்டும். ஏனெனில், நீண்ட காலத்துக்குத் திட்டமிட்டு பண்டுகளில் முதலீடு செய்துவிட்டு, அதை இடையில் எடுக்கும்போது எதிர்பார்த்த வருமானம் கிடைக்காமல் போகலாம்.

என்ன தேவைக்காக முதலீடு செய்யப்போகிறோம், அந்தத் தேவையை நிறைவேற்ற போதுமான தொகையை முதலீடு செய்கிறோமா என்று உறுதி செய்துகொண்டு முதலீட்டில் இறங்கலாம்.

முதலீடு செய்யும் பண்டின் வருமானம் தொடர்ச்சியாக எப்படி உள்ளது என்பதைப் பார்க்க வேண்டும். குறைந்தது, கடந்த ஐந்தாண்டுகளின் வருமானத்தையாவது கவனிக்க வேண்டும். குறிப்பிட்ட வருடத்தில் அதிக வருமானத்தையும், குறிப்பிட்ட வருடம் மிகக் குறைவான வருமானத்தையும் கொடுத்திருந்தால் அந்த பண்டை தவிர்ப்பதே சிறந்தது. அதாவது, அந்த பண்டின் சராசரி வருமானம் எப்படி உள்ளது என்பதையும், சந்தையின் ஏற்ற இறக்கத்தில் பண்டின் வருமானம் எப்படி உள்ளது என்பதையும் கவனத்தில் கொள்ள வேண்டும்.

முதலீடு செய்யும் பண்ட் நிறுவனத்தின் வரலாறு, அந்த பண்டை நிர்வகிக்கும் பண்ட் மேனேஜரின் அனுபவம் எப்படி உள்ளது என்பதையும் அறிய வேண்டும். புதிதாக அறிமுகப் படுத்தும் பண்ட் திட்டங்கள் குறித்து யோசித்தே இறங்க வேண்டும். காரணம், அந்த பண்டுக்கு கடந்த கால வரலாறு இருக்காது. மேலும், இனிவரும் காலத்தில் அதன் வளர்ச்சி எப்படி இருக்கும் என்றும் கணிக்க முடியாது.

முதலீடு செய்யும் பண்டின் நிர்வாகக் கட்டணம் எவ்வளவு என்பதைக் கவனிப்பது நல்லது. சில பண்டுகளில் இது 2 சதவிகிதமாகவும், சில பண்டுகளில் 11.5 சதவிகிதமாகவும் இருக்கும்.

உங்களின் ரிஸ்க் எடுக்கும் தன்மையைப் பூர்த்திசெய்யும் வகையில் நீங்கள் தேர்ந்தெடுக்கும் பண்ட் உள்ளதா என்பதை உறுதி செய்ய வேண்டும். கடன் சார்ந்த பண்டுகளில் முதலீடு செய்யும்போது அந்த பண்டின் முதலீடுகள் 'ஏஏஏ' ரேட்டிங் பாண்டுகளில் முதலீடு செய்யப்படுகிறதா என்பதைக் கவனிக்க வேண்டும். இதேபோல பிற பண்டுகளில் முதலீடு செய்யும்போதும், அந்த பண்ட் எந்தெந்த பங்குகளில் முதலீடு செய்யப்படுகிறது என்பதைப் பார்த்து முதலீடு செய்வது நல்லது.

இவ்வாறு நிதி ஆலோசகர்கள் கூறுகிறார்கள்.

பதிவுக்கு நன்றி தல

நன்றி