ஜெயலலிதா அவர்களே இது நியாயம்தானா? - ஈ.வி.கே.எஸ். இளங்கோவன்

சென்னை மாவட்ட காங்கிரஸ் கட்சி சார்பாக மத்திய, மாநில அரசுகளின் மக்கள் விரோத போக்கை கண்டித்தும், மத்திய அரசின் நிலம் கையகப்படுத்தும் சட்டத்தை எதிர்த்தும், தமிழ்நாடு காங்கிரஸ் கமிட்டி தலைவர் ஈ.வி.கே.எஸ். இளங்கோவன் தலைமையில் சென்னை சேப்பாக்கம் விருந்தினர் மாளிகை அருகே 23.03.2015 திங்கள்கிழமை காலை கண்டன ஆர்ப்பாட்டம் நடைபெற்றது.

ஆர்ப்பாட்டத்தின்போது பேசிய ஈ.வி.கே.எஸ். இளங்கோவன்,

மக்களுக்கு உழைப்பவர்கள் யார். எதிரானவர்கள் யார் என்பதை மக்கள் இப்போது உணர ஆரம்பித்துவிட்டார்கள். காங்கிரசை கடந்த தேர்தலில் தோல்வியடைய செய்தது நாம் செய்த பெரிய தவறு. மீண்டும் காங்கிரஸ் வரவேண்டும் என்று அக்கறை உள்ளவர்களாக தமிழக மக்கள் மட்டுமல்ல, இந்தியாவில் உள்ள அனைத்து மக்களும் மாறி வருகின்றனர். ஆகவே இந்த சட்டத்தை கடுமையாக எதிர்க்கின்றோம்.

விவசாயிகளுடைய நிலங்களை பறிப்பதற்கு ஏதுவாக கொண்டுவரப்படுகிற இந்த சட்டத்தை எதிர்க்கிறோம் என்பது மட்டுமல்ல, உயிரை கொடுத்தாவது இந்த சட்டம் வராமல் பார்த்துக்கொள்ள காங்கிரஸ் முனைப்போடு இருக்கும்.

நாட்டில் உள்ள எல்லா கட்சிகளும் நில கையகப்படுத்துதல் சட்டத்தை எதிர்க்கிறார்கள். ஆனால் இங்கே இருக்கக் கூடிய முன்னாள் முதல் அமைச்சர் ஜெயலலிதா மட்டும் ஆதரிக்கின்றார். ஏன் என்றால் தான் எப்படியாவது சிறைக்கு போகாமல் தப்பிப்பதற்கு பாஜக ஆவண செய்யும், ஆகவே நாட்டில் உள்ள விவசாயிகளை அடமானம் வைத்தாவது, அடகு வைத்தாவது தான் தப்பித்துக்கொள்ள வேண்டும் என்பதற்காக ஜெயலலிதா இந்த சட்டத்தை ஆதரித்திருக்கின்றார்.

ஜெயலலிதா அவர்களே இது நியாயம்தானா. எத்தனை பேர் உங்களை அம்மா அம்மா என்று சொல்கிறார்கள். எத்தனை பேர் உங்களுக்காக மண் சோறு சாப்பிடுகிறார்கள். எத்தனை பேர் உங்களுக்காக மாடுகளை வைத்து பூஜை செய்கிறார்கள். எத்தனை பேர் உங்களுக்காக பாலபிசேகம் செய்து கொண்டிருக்கிறார்கள். எத்தனை பேர் மொட்டை போட்டுள்ளார்கள். மீசை எடுத்துள்ளார்கள். எத்தனை பேர் பார்க்கும்போதெல்லாம் காலிலே விழுகிறார்கள். இத்தனை பேருக்கும் நீங்கள் செய்யும் கைமாறு, நீங்கள் நிலத்தை பறிக்கலாம் என்று மத்திய அரசுக்கு ஆதரவு தருவது நியாயம்தானா. இது நியாயம்தானா. நீங்கள்தான் மாரியம்மா. மேரியம்மா. அம்மா. அம்மா. அம்மா.

ஆனால் நீங்கள் சொல்வீர்கள், கோவிலில் பூஜை செய்கிறார்களே அதிமுகவினர் எனக்காகவா பூஜை செய்கிறார்கள். ஒருவேளை அவர்கள் என்னை சந்தித்தால் சொல்லக்கூடும், இளங்கோவன் நீங்கள் தவறாக புரிந்து கொண்டிருக்கிறீர்கள். நான் உள்ளே இருந்து வரக்கூடாது என்பதற்காக பூஜை செய்கின்றார்கள். நான் வெளியே வந்துவிட்டால் அவர்கள் கொள்ளையடிக்கும் லஞ்சப் பணத்தை நான் வாங்கிக்கொள்வேன் என்பதற்காக, நான் வெளியே வராமல் இருந்தால் அவர்கள் கொள்ளையடிக்கும் பணத்தை அவர்களே அமுக்கிக்கொள்ளலாம் அல்லவா. அதனால் நான் வெளியே வரவேண்டாம் என்பதற்காக பூஜை செய்கிறார்கள் என்பார்.

வெயிலின் கடுமை தெரியாமல் இருப்பதற்காக காமெடியாக சில விசயங்களை சொன்னேன். ஆனால் உண்மையிலேயே இந்த அம்மா விவசாயிகளுக்கு செய்தது மிகப்பெரிய துரோகம். இவ்வாறு பேசினார்.

தகவலுக்கு நன்றி.........

இந்த மனிதருக்கு என்ன ஏதாவது    மூளையில்   பிரச்சனையா ????????எல்லோரும் காங்கிரசில் இருந்து வெளியேறுகிறார்கள் ....இவர் என்னடானா இன்னும் உடும்பு புடியில் இருக்கிறாரே....

பதவி மோகம் சிறிது நாள் ஆகும் அதிலிருந்து வெளியே வர ........


(spelling திருத்தப்பட்டது 
ர...ன் )