பிரிட்டிஷ் பேரரசு!

அரசி விக்டோரியா 1837ல் பிரிட்டிஷ் அரியணை ஏறினார். 1901ல் அவர் மரணம் அடையும் வரை அரசியாக இருந்தார். அவரது நீண்ட கால ஆட்சியில் பிரிட்டன் உலகின் மிகுந்த வல்லமை பெற்ற நாடாக மாறியது. ஒரு மிகப் பெரிய பேரரசை அவர் ஆண்டார். சுதந்திரமான நாடுகளின் காமன்வெல்த் அமைப்பாக பிரிட்டிஷ் பேரரசு பின்பு பரிணாமம் பெற்றது.

பிரிட்டனின் பெரும்பங்கு செல்வம் அதனுடைய குடியேற்ற நாடுகளில் இருந்து வந்ததுதான். 17 மற்றும் 18ம் நூற்றாண்டுகளில் தூரமான நாடுகளில் அதாவது கனடா, ஆஸ்திரேலியா, இந்தியா மற்றும் கரீபியன் போன்ற நாடுகளில் குடியேற்றப் பகுதிகளும், வர்த்தக நிலையங்களும் உருவாக்கப் பட்டன.

நெப்போலினியப் போர்களின் முடிவில் வியன்னா ஒப்பந்தப்படி மேலும் பல இடங்கள் பிரிட்டனுடன் சேர்க்கப்பட்டன. விக்டோரியாவின் ஆட்சியின் கீழ் நியூசிலாந்து, பசிபிக் மற்றும் அட்லாண்டிக் பெருங்கடல்களில் உள்ள பல தீவுகள், தூரக்கிழக்கு நாடு களின் சில பகுதிகள் மற்றும் ஆப்பிரிக்கா வின் பெரும் பகுதி நிலங்களும் சேர்க்கப் பட்டன.

19ம் நூற்றாண்டின் பிற்பகுதியில் அதன் உச்சகட்டமான நிலப்பரப்பு எல்லைகளால், பேரரசு உலகின் கால்பங்கு நிலத்தையும், மக்கட் தொகை யில் கால்பங்கையும் கொண்டிருந்தது.

பிரிட்டிஷ் தொழிற்சாலைகளுக்குத் தேவையான மூலக் கச்சாப் பொருட்களை குடியேற்ற நாடுகள் வழங்கின. அதே போல், அவர்களின் பொருட் களுக்கான சந்தையையும் குடியேற்ற நாடுகள் ஏற்படுத்தித் தந்தன. இவற்றில் சில இந்தியாவில் இருந்த கிழக்கிந்திய கம்பெனி போன்ற கம்பெனிகளால் முதலில் நடத்தப்பட்டன. மெதுவாக பிரிட்டனின் நேரடி ஆட்சியின் கீழ் சந்தைகள் கொண்டு வரப்பட்டன. பல குடியேற்ற நாடுகளில் தேயிலை, கரும்பு, காபி, நறுமணப் பொருட்கள், ரப்பர் மற்றும் பருத்தி போன்றவற்றைப் பயிரிட தோட்டங்கள் உருவாக்கப்பட்டன.

பல மில்லியன் மக்களின் வாழ்வினை இப்பேரரசு பாதித்து இருந்தது. பிரிட்டிஷ் சட்டங்கள், தொழில் நுட்பம், கலாச்சாரம் ஆகியவை உலகம் முழுவதும் கொண்டுச் செல்லப்பட்டன. பிரிட்டிஷ் கப்பற்படை பேரரசைப் பாதுகாத்தது. 1900ல் தொழில்சார் சக்தி யாக, தலைமைச் சக்தியாக பிரிட்டனால் தொடர்ந்து இருக்க முடியாமல் போனது. நாடுகள் சுதந்திரத்தை நாடியதால் பேரரசு உருக்குலைய ஆரம்பித்தது.
***

கிரீமியன் போர்

கிரீமியன் போரின் போது (1853-1856) துருக்கி, பிரான்ஸ் மற்றும் பிரிட்டன் ஆகியன ரஷ்யாவுக்கு எதிராகப் போரிட்டன. புறக்கணிப்பாலும், நோயாலும் ஆயிரக்கணக்கான பிரிட்டிஷ் படை வீரர்கள் இறந்தனர். பிளாரென்ஸ் நைட்டிங்கேல் மற்றும் அவரது செவிலியர் குழு, ராணுவ மருத்துவமனைகளைச் சுத்தப் படுத்தி பிரிட்டனின் முதல் செவிலியர் பயிற்சிப் பள்ளியை ஆரம்பித்தனர்.

சிறுவர் மலர்