கடல் நீரைக் குடிக்கலாமா?

கடல் நீரைக் குடித்து மனிதன் உயிர் வாழ முடியுமா என்று ஓர் ஆராய்ச்சி தொடர்ந்து நடந்துகொண்டே இருக்கிறது.

மனிதன் குடிக்கும் நீரெல்லாம் வியர்வை, சிறுநீர் என வெளியேறிக் கொண்டே இருக்கிறது. அதனால் மேலும் மேலும் தண்ணீரைக் குடிக்கிறான். மனிதர்களின் நீர்த்தேவை பெருகிக்கொண்டே போகிறது. இப்படியே போனால் உலகில் விரைவில் குடிநீருக்குப் பெரும் பற்றாக்குறை ஏற்படும் என்று ஆராய்ச்சியாளர்கள் கூறுகிறார்கள்.

நமது உடலில் சிறுநீரகம்தான் நீரை தனியாகப் பிரித்தெடுக்கிறது. இது, சுத்தப்படுத்தும் கருவியாகச் செயல்படுகிறது.

நம் உடலில் உள்ள கால்சியம், பொட்டாசியம், சோடியம் மற்றும் ஏனைய கழிவு உப்புகளை வெளியேற்றி சிறுநீர் வழியாக அனுப்புகிறது. சிறுநீர் உப்பு கரித்த சுவையில் இருப்பதற்கு இதுவே காரணம்.

இந்த உப்புகள் சிறுநீரை விட கடல் நீரில் அதிக விகிதத்தில் இருப்பதால்தான் கடல் நீரை நம்மால் குடித்துப் பழகிக்கொள்ள முடியவில்லை. நம் உடல் அதற்கு ஒத்துக்கொள்வதில்லை.

ஆலன் பாம்பர்டு என்ற பிரெஞ்சு விஞ்ஞானி சோதனைக்காக தன்னந்தனியே நடுக்கடலில் படகில் சென்றார். அவர் நல்ல நீரை எடுத்துக்கொள்ளாமல் கடல் நீரை மட்டுமே குடித்துவந்தார். அவருக்கு எந்த நோயும் வராமல் 52 நாட்கள் வரை தாக்குப்பிடித்தார். அதோடு தன் பரிசோதனையையும் முடித்துக்கொண்டார்.

அப்படியானால் கடல் நீரில் வாழும் மீன் இனங்கள் உப்பு நீரை உட்கொண்டா வாழ்கின்றன என்ற கேள்வி எழுகிறது.

மீனின் சிறுநீரகங்கள் மிக மிகச் சிறியவை. அதோடு, அசுத்தங்களைப் பிரித்தெடுக்கும் திறனும் அற்றவை. ஆனால், மீன்களின் கழுத்து செதில்களில் நீரை சுத்தப்படுத்தும் மிகச் சிறந்த அமைப்பு ஒன்று உள்ளது.

இது மீனின் ரத்தத்தில் உள்ள கழிவு உப்புகளை பிரித்து எடுத்து கோழை போல செதில் வழியாக வெளியேற்றி விடுகிறது.

மீன்களின் செதில்களில் கோழைப்பொருள் அதிகம் தங்கியிருந்தால், அந்த மீன்களை உணவுக்காக வாங்குவதில்லை. செதில் பகுதியில் கழிவுகள் அதிகமாக சேர்ந்திருப்பது, மீன் இறந்து அதிக நேரம் ஆகிவிட்டதைக் குறிக்கும். மனிதன் கடல் நீரை நேரடியாகக் குடிக்கலாமா என்ற கேள்விக்கு இன்னும் பதில் கிடைக்கவில்லை. இதுகுறித்த ஆராய்ச்சியாளர்களின் ஆய்வுகள் தொடர்ந்துகொண்டே இருக்கின்றன.