காவல் நிலையங்களில் துருபிடிக்கும் வாகனங்களின் மதிப்பு ரூ.10,000 கோடி

தமிழகம் முழுவதும் உள்ள காவல் நிலையங்களில், மண்ணில் புதைந்து மக்கிப் போகும், பல கோடி ரூபாய் மதிப்புள்ள வாகனங்களை பாதுகாக்க, கிடங்கு அமைக்க வேண்டும் என்ற கோரிக்கை வலுத்துள்ளது.காவல் நிலையம், மாவட்ட காவல் கண்காணிப்பாளர், போலீஸ் கமிஷனர் அலுவலகங்களில் தரப்படும் புகார்கள் மீது நடவடிக்கை எடுக்கப்பட்டு, குற்றவாளிகள் கைது செய்யப்பட்டு வருகின்றனர். அப்படி கைது செய்யப்படும் போது, குற்றவாளிகள் பயன்படுத்தும் பொருட்கள் கைப்பற்றப்படுகின்றன. அந்த வகையில், திருட்டு மற்றும் மோசடிக்கு பயன்படுத்தும் வாகனங்களும் பறிமுதல் செய்யப்படுகின்றன. மேலும் விபத்து மற்றும் சட்டவிரோத பொருட்கள் கடத்தலில் ஈடுபடும் வாகனங்கள், போக்குவரத்து போலீசாரால் பறிமுதல் செய்யப்படுகின்றன.

மலை போல்...:

இந்த வாகனங்கள், காவல் நிலையங்கள், மாவட்ட காவல் கண்காணிப்பாளர் அலுவலகம், மத்திய குற்றப்பிரிவு மற்றும் சி.பி.சி.ஐ.டி., அலுவலகங்கள், பொருளாதார குற்றப்பிரிவு அலுவலகங்கள் முன், பல ஆண்டுகளாக நிறுத்தி வைக்கப்பட்டு, மண்ணோடு மண்ணாக மக்கி வீணாகின்றன. பொதுவாக செயின் பறிப்பு, திருட்டு உள்ளிட்ட செயல்களுக்கு பயன்படுத்தும் வாகனங்களை, குற்றச்செயலில் ஈடுபட்டோர் யாரும் திரும்பிக் கூட பார்ப்பது இல்லை. அதுபோல், ஆட்கடத்தலுக்கு பயன்படுத்திய கார், மோசடி பணத்தில் வாங்கிய வெளிநாட்டு கார்கள், லாரிகள் தொடர்பான வழக்குகள், நீதிமன்றத்தில் பல ஆண்டு களாக நிலுவையில் இருப்பதால், இந்த வாகனங்களும் மண்ணில் புதைந்து, எலும்பு கூடுபோல் ஆகிவிடுகின்றன.

'ஆட்டை' போடும் தந்திரம்:

போலீசார் துணையுடன், இந்த வாகனங்களின் இன்ஜின், டயர் உள்ளிட்ட பாகங்கள் திருடப்பட்டு, பழைய இரும்பு கடைகளில் விற்கப்படுவதாகவும் குற்றச்சாட்டு உள்ளது. சென்னை போன்ற நகரங்களில், இருசக்கர வாகனங்கள், போலீஸ் உதவியுடன் விற்கப்படுவதாகவும் கூறப்படுகிறது. எஞ்சிய வாகனங்கள், ஆண்டுக்கணக்கில் வெயில், மழையில் கிடந்து வீணாகி வருகின்றன.

விஷப் பாம்பு:

இவ்வாறாக, தமிழகம் முழுவதும் உள்ள வாகனங்களின் மதிப்பு, 10 ஆயிரம் கோடி ரூபாய் இருக்கும் என, போலீசார் தெரிவிக்கின்றனர். மலை போல் குவிந்து கிடக்கும் வாகனங்களில், கொடிய விஷப் பாம்பு கள் குடி கொண்டு, காவல் நிலையங்களில் புகுந்து, போலீசாரை கதி கலங்கச் செய்யும் சம்பவங்களும் ஆங்காங்கே அரங்கேறி வருகின்றன.

கோரிக்கை:

அவ்வப்போது இந்த வாகனங்களை ஏலம் விட்டு, அப்புறப்படுத்தி வந்த நடைமுறை என்ன ஆனது என்றே தெரியவில்லை. இந்த நடைமுறையை தீவிரமாக செயல்படுத்த வேண்டும். முடியாத பட்சத்தில், மாநிலம் முழுவதும் நெல் கொள்முதலுக்கு சேமிப்பு கிடங்குகள் இருப்பது போல், வாகன பாதுகாப்புக்கு கிடங்குகள் அமைக்கப்படுமா என்ற கோரிக்கை எழுந்துள்ளது.

தினமலர்

எப்படியெல்லாம் காசு வீணாகுது

ஆட்சியாளர்களுக்கு இதை பற்றி சிந்திக்க எங்கே நேரம் இருக்கிறது.. இதுபோன்று வீணாகும் நமது சொத்துக்கள் பல்வேறு துறைகளிலும் உள்ளது... மக்கள் நலனை மனதில் கொண்ட ஆட்சியாளர்கள் என்று வருகின்றார்களோ அன்றுதான் நம் தேசத்தில் இதற்க்கு விடிவு கிடைக்கும்...