கண் நிறம், தலை முடி நிறம் என்ன? ராகுல் எப்படி இருப்பார்?: போலீசார் விசாரித்ததால் காங்கிரஸ் அதிர்ச்சி

பாராளுமன்ற தேர்தலில் காங்கிரஸ் கட்சி படுதோல்வி அடைந்ததால் காங்கிரஸ் துணை தலைவர் ராகுல் விரக்தி அடைந்தார்.

இதையடுத்து மாநில சட்டசபை தேர்தல்களிலும் தோல்வி ஏற்பட்டதால் நாடெங்கும் காங்கிரஸ் அமைப்பை சீர்படுத்த ராகுல் திட்டமிட்டுள்ளார்.

இந்த நிலையில் ராகுல் காந்தி கடந்த மாதம் 23–ந்தேதி திடீரென கட்சி பணிகளுக்கு விடுமுறை கொடுத்து விட்டு வெளிநாட்டுக்கு சென்றார். கடந்த 10–ந்தேதி அவர் விடுமுறை முடிந்து விட்டதாக அறிவிக்கப்பட்டது.

ஆனால் அவர் நாடு திரும்பவில்லை. அவர் தனது அரசியல் விடுமுறையை நீட்டிப்பு செய்திருப்பதாக தகவல் வெளியானது. அவர் இந்த மாத இறுதியில்தான் டெல்லி திரும்புவார் என்று கூறப்படுகிறது.

ராகுல்காந்தி என்ன காரணத்துக்காக வெளிநாடு சென்றுள்ளார் என்பது தெரியவில்லை. இதுபற்றி கேட்டால் காங்கிரஸ் மூத்த தலைவர்கள் ‘‘கப்–சிப்’’ என வாயை மூடிக்கொள்கிறார்கள். இதனால் ராகுல் காந்தியின் அடுத்தக்கட்ட நடவடிக்கை என்னவாக இருக்கும் என்ற எதிர்பார்ப்பு ஏற்பட்டுள்ளது.

இந்த நிலையில் ராகுல் காந்தியின் அங்க அடையாளங்கள் பற்றி டெல்லி போலீசார் நடத்திய விசாரணை பெரும் சர்ச்சையை ஏற்படுத்தியுள்ளது. கடந்த வாரம் டெல்லி போலீசாரின் ஒரு சிறப்புக்குழு திடீரென ராகுல்காந்தியின் அலுவலகத்துக்கு சென்றது.

அங்கிருந்த ஊழியர்களிடம் போலீசார், ‘‘ராகுல்காந்தி எப்படி இருப்பார்? அவர் தோற்றம் என்ன? என்று கேள்விகள் கேட்டனர். இதனால் அங்கிருந்த ஊழியர்களுக்கு அதிர்ச்சியும், ஆச்சரியமும் ஏற்பட்டது.

ராகுல்காந்தியின் கண் நிறம் என்ன? அவரது முடி கலர் என்ன? என்றும் போலீசார் விசாரணை நடத்தினார்கள். போலீசார் விசாரணை முழுக்க–முழுக்க ராகுலின் தோற்றம் பற்றியே இருந்தது. இது ராகுல் அலுவலக ஊழியர்களிடம் குழப்பத்தை ஏற்படுத்தியது.

ராகுல்காந்தி விடுமுறையில் வெளிநாட்டுக்கு சென்றிருக்கும் சூழ்நிலையில் போலீசார் ஏன் இத்தகைய விசாரணை நடத்துகிறார்கள் என்று அவர்களுக்கு தவிப்பு ஏற்பட்டது. ‘‘எதற்கு ராகுல் பற்றி இப்படியெல்லாம் கேட்கிறீர்கள்?’’ என்று ஊழியர்கள் கேள்வி எழுப்பினார்கள்.

அதற்கு போலீசார் பதில் சொல்ல மறுத்து விட்டனர். இதையடுத்து அந்த போலீசாரை ராகுல் அலுவலக ஊழியர்கள் செல்போனில் படம் பிடித்தனர். உடனே போலீசார் அந்த அலுவலகத்தில் இருந்து வெளியேறி புறப்பட்டு சென்று விட்டனர்.

டெல்லி போலீசார் நடத்திய இந்த விசாரணை பற்றி நேற்றுதான் காங்கிரஸ் மூத்த தலைவர்களுக்கு தெரிய வந்தது. இதனால் அதிர்ச்சி அடைந்த காங்கிரஸ் தலைவர்கள், ‘‘டெல்லி போலீசாரின் செயலில் ஏதோ சதி இருப்பதாக சந்தேகிக்கிறோம். டெல்லி போலீசார் ராகுலின் அங்க அடையாளங்களை ஏன் விசாரிக்க வேண்டும். அவர்கள் இதற்கு உரிய விளக்கம் அளிக்க வேண்டும்’’ என்று போர்க்கொடி உயர்த்தியுள்ளனர்.

காங்கிரஸ் மூத்த தலைவர் ஒருவர் இதுபற்றி கூறுகையில், ‘‘ராகுல் எப்படி இருப்பார் என்று போலீசாருக்கு தெரியாதா? இணையத்தளங்களில் அவர் படங்கள் ஏராளமாக உள்ளது. ராகுலுக்கு என்று தனி இணையத்தள பக்கம் உள்ளது. அதில் சென்று பார்க்கலாமே’’ என்றார்.

மற்றொரு தலைவர் கூறுகையில், ‘‘ராகுல் பற்றிய எல்லா குறிப்புகளும் பாராளுமன்ற பதிவேடுகளில் உள்ளது. அதை ஆய்வு செய்யாமல் போலீசார் ராகுல் அலுவலகத்துக்கு வந்தது தவறு’’ என்றார்.

காங்கிரஸ் தலைவர்கள் எதிர்ப்பு தெரிவித்ததை தொடர்ந்து டெல்லி போலீசார் நேற்றிரவு ஒரு விளக்கம் வெளியிட்டனர். அதில், ‘‘ராகுல் பாதுகாப்பை கருத்தில் கொண்டே இந்த விசாரணை நடத்தப்பட்டது. வேறு எந்த நோக்கமும் இல்லை’’ என்று அதில் கூறப்பட்டுள்ளது.

ஆனால் காங்கிரஸ் மேலிட தலைவர்கள் இதை ஏற்கவில்லை. ராகுல் பற்றிய விசாரணை தேவை இல்லாதது. எனவே இதற்கு மத்திய அரசு உரிய விளக்கம் தெரிவித்து அறிக்கை வெளியிட வேண்டும் என்று கோரிக்கை விடுத்துள்ளனர்.