எய்ட்ஸ் தாக்கிய மனைவி மகள்களை காரில் வைத்து எரித்து கொன்ற என்ஜினீயர்

மத்திய பிரதேசத்தில் எய்ட்ஸ் நோய் தொற்று தாக்கியதால் என்ஜினீயர் ஒருவர் தனது மனைவி மற்றும் 2 மற்றும் 9 வயது உள்ள 2 குழந்தைகளை எரித்து கொன்று போலீசில் சரண் அடைந்தார்.

இந்த பயங்கர சம்பவம் கடந்த மார்ச் 3 ந்தேதி மத்திய பிரதேசம் பிடுல் மாவட்டம் முல்டை என்னும் நகரில் நடந்து உள்ளது. இந்த நகர் போபாலில் இருந்து தெற்கே 250 கிலோமீட்டர் தொலைவில் உள்ளது.

மத்திய பிரதேச மாநிலம் பண்டல்கண்டில் உள்ள ஒரு பொது துறை நிறுவனத்தில் அந்த நபர் என்ஜினீயராக பணியாற்றி வந்துள்ளார்.

அந்த நபர் மகாராஷ்டிராவின் அமராவதி நகரில் போலீசில் சரண் அடைந்த பின்பு கூறுகையில், தனது சொந்த ஊரான அமராவதிக்கு சென்று விட்டு குடும்பத்துடன் காரில் திரும்பி கொண்டு இருந்துள்ளார். அவரும், அவரது மனைவியும் சேர்ந்து தற்கொலை செய்து கொள்வது என்ற முடிவை எடுத்துள்ளனர்.

ஆனால் இது படுகொலை என்று மனைவியின் சகோதரர் சந்தேகம் தெரிவித்துள்ளார். எச்.ஐ.வி.யால் பாதிக்கப்பட்டு உள்ளதை கடந்த 7 மாதங்களுக்கு முன்புதான் அந்த தம்பதியினர் அறிந்துள்ளனர். இதனை அடுத்து அவர்கள் இருவரும் தங்களது மகள்களுக்கும் பரிசோதனை செய்துள்ளனர். அவர்களுக்கும் பாதிப்பு இருந்துள்ளது தெரிய வந்துள்ளது.

கடந்த பிப்ரவரி 28ந்தேதி அவர்கள் குடும்பத்துடன் அமராவதி நகருக்கு சென்றுள்ளனர். அவர்கள் திரும்பி வரும்போது, அந்த நபர் முல்டை நகரில் கானாபூர் மலை பகுதியில் காரை நிறுத்தியுள்ளார். அதன்பின் கார் மீது பெட்ரோலை ஊற்றி தீப்பற்ற வைத்து விட்டு தானும் உள்ளே குதித்து விட்டார். காருக்குள் தூங்கி கொண்டிருந்த குழந்தைகளை காப்பாற்ற நினைத்த 37 வயது நிறைந்த நபரின் மனைவி தனது கணவரிடம் அவர்கள் இந்த பாதிப்பிற்கு எந்த வகையிலும் பொறுப்பில்லை என்ற நிலையில் அவர்களை காப்பாற்றும்படி கூறியுள்ளார்.

இதனை அடுத்து அந்நபர் காரில் இருந்து வெளியே வந்து குழந்தைகளை காப்பாற்ற முயன்றுள்ளார். ஆனால், தீ பற்றி எரிந்து கார் முற்றிலும் கருகி விட்டது. அதன்பின் அவர் மும்பை மற்றும் நாக்பூர் நகருக்கு சென்று தனது குடும்பத்தினர் மற்றும் நண்பர்களிடம் சம்பவம் குறித்து கூறியுள்ளார். அவர்கள் போலீசில் சரணடைய கூறியுள்ளனர் என போலீசாரிடம் தெரிவித்துள்ளார். போலீசார், மத்திய பிரதேசத்தில் உள்ள முல்டை காவல் நிலையத்திற்கு நேற்று (செவ்வாய் கிழமை) அந்நபரை விசாரணை நடத்துவதற்காக கொண்டு வந்துள்ளனர்.

அவர் கூறியவற்றை குறித்து போலீசார் ஆய்வு செய்து வருகின்றனர். இந்நிலையில், உண்மையை அறிவதற்காக புதிதாக எச்.ஐ.வி. பரிசோதனையை அவரிடம் நாங்கள் நடத்த உள்ளோம். அவரிடம் விசாரணை நடந்து வருகிறது. போலீஸ் காவலில் எடுப்பதற்காக அவர் இன்று நீதிமன்றத்தில் ஆஜர்படுத்தப்படுகிறார் என போலீஸ் அதிகாரி எஸ்.கே. சிங் கூறியுள்ளார்.