உலக கோப்பை கிரிக்கெட் தொடர் வெற்றி மூலம் இந்திய அணி சாதனை மேல் சாதனை

உலக கோப்பை கிரிக்கெட் தொடரில் ”பி” பிரிவில் இடம் பெற்றுள்ள இந்திய அணி தனது 5 வது லீக் ஆட்டத்தில் இன்று அயர்லாந்தை எதிர்கொண்டது. முதலில் பேட் செய்த அயர்லாந்து அணி 49 ஒவர்களில் அனைத்து விக்கெட்டுகளையும் இழந்து 259 ரன்கள் எடுத்தது. இதையடுத்து 260 ரன்கள் எடுத்தால் வெற்றி என்ற இலக்குடன் பேட் செய்த இந்திய அணி 36.5 ஓவர்களில் 2 விக்கெட்டுகளை மட்டுமே இழந்து 260 ரன்கள் எடுத்து 8 விக்கெட்டுகள் வித்தியாசத்தில் அயர்லாந்தை வீழ்த்தியது.

இந்திய அணி நடப்பு உலக கோப்பை தொடரில் தொடர்ந்து 5 வெற்றிகளை பதிவு செய்துள்ளது. இதன் மூலம் காலிறுதிக்கு தகுதி பெற்றுள்ள இந்தியா பி பிரிவிலும் முதலிடம் வகிக்கிறது. இந்த நிலையில், அயர்லாந்துக்கு எதிரான போட்டியில் இந்திய அணி வெற்றி பெற்றதற்கு ஜனாதிபதி பிரணாப் முகர்ஜி மற்றும் பிரதமர் நரேந்திர மோடி ஆகியோர் வாழ்த்து தெரிவித்துள்ளனர்.

இந்த போட்டியில் வெற்றிபெற்றதன் மூலம் இந்திய அணி பல சாதனைகளை நிகழ்த்தி உள்ளது.

* 1975 மற்றும் 1979ம் ஆண்டு உலக கோப்பை தொடர்களில் தொடர்ச்சியாக 9 போட்டிகளில், கிளைவ் லாய்ட் தலைமையிலான, வெஸ்ட் இண்டீஸ் வெற்றி பெற்றது. அந்த சாதனை தற்போது சமன் செய்யப்பட்டுள்ளது. அடுத்த போட்டியில் ஜிம்பாப்வேயை இந்தியா வீழ்த்தினால், புது சாதனை படைக்கப்படும்.

* தொடர்ச்சியான வெற்றியில், ரிக்கி பாண்டிங் தலைமையிலான ஆஸ்திரேலியா தொடர்ந்து முதலிடத்தில் உள்ளது. அது 1999 முதல் 2011 வரை மொத்தம், 25 போட்டிகளில் தொடர்ச்சியாக வெற்றி பெற்றிருந்தது.

* கபில் தேவ் தலைமையில் இந்திய அணி உலக கோப்பையில் மொத்தம் 11 போட்டிகளில் வெற்றி பெற்றிருந்தது. ஆனால் டோணி தலைமையில், இதுவரை உலக கோப்பையில், மொத்தம் 12 போட்டிகளை இந்தியா வென்றுள்ளது. அதில் 9 வெற்றி தொடர்ச்சியாக பெற்றதாகும்.

* 2003 உலக கோப்பையில், 8 வெற்றிகளை கேப்டன் கங்குலி தலைமையில் பெற்றிருந்தது இந்தியா. டோணி தலைமையிலான இந்திய அணி 2011 மற்றும் நடப்பு உலக கோப்பை தொடர்களில் சேர்த்து, தொடர்ச்சியாக 9 வெற்றிகளை பெற்றுள்ளது.

* சச்சின் தெண்டுல்கர்-ஜடேஜா இணைந்து 1996 உலக கோப்பையில், கென்யாவுக்கு எதிராக, முதல் விக்கெட்டுக்கு 163 ரன்கள் எடுத்த நிலையில், இன்றைய போட்டியில் ரோகித் ஷர்மா- தவான் ஜோடி 174 ரன்கள் குவித்து ஒரு சாதனை படைத்துள்ளது.

* டோனி தலைமையில், இந்திய அணி உலக கோப்பை தொடர்களில் சக்கைபோடு போட்டு வருகிறது. 2011 உலக கோப்பையின்போது, இந்தியா, தென் ஆப்பிரிக்காவுக்கு எதிராக மட்டுமே தோற்றிருந்தது. இங்கிலாந்துடன் டை ஆனது. பிற அனைத்து போட்டிகளையும் வென்று, கோப்பையையும் கைப்பற்றியது. நடப்பு உலக கோப்பையில் முதல் 5 ஆட்டங்களிலும் இந்தியா வென்றுள்ளது.

* டோணி 2011 மற்றும் 2015 உலக கோப்பை தொடர்களில் இந்தியாவுக்கு கேப்டனாக இருந்து, இதுவரை 11 போட்டிகளில் வெற்றி பெற்று தந்துள்ளார். கபில் தேவ் 1983 மற்றும் 1987 உலக கோப்பை தொடர்களில் கேப்டனாக இருந்து 10 போட்டிகளை வென்று கொடுத்தார். 1992, 1996 மற்றும் 1999 ஆகிய உலக கோப்பைகளில் இந்தியாவின் கேப்டனாக அசாருதீன் இருந்தபோதும், 9 போட்டிகளில் மட்டுமே இந்திய அணி வெற்றி பெற்றிருந்தது.

தொடர்ந்து வெல்ல வாழ்த்துவோம் 

ரமணியன்