கொலைகளைத் துப்பறிவதில் 'மொபைல்' பங்கு

சேலம்
: கொங்கு மண்டலத்தில், புதிதாக உருவாகியுள்ள, "மொபைல் போன்' அழைப்பு
கொலைகள், பொதுமக்களிடம் அதிர்ச்சியை ஏற்படுத்தி உள்ளது."உள்ளங்கையில்
உலகம்' என்ற விஞ்ஞான அதிசயமாக அறிமுகப்படுத்தப்பட்ட மொபைல் போன் கள்,
ஆரம்ப காலங்களில் அலங்கார பொருளாகவும், ஏழைகளுக்கு எட்டாத ஒன்றாகவும்
இருந்தது.காலப்போக்கில் அதன் பயன்பாடும், உற்பத்தியும் பலமடங்கு
அதிகரித்தது. தற்போது, மொபைல் போன் வாங்குபவர்களின் எண்ணிக்கை
நாளுக்குநாள் அதிகரித்த வண்ணம் உள்ளது. கல்லூரி மாணவர்கள், பள்ளி மாணவிகள்
என, மாணவர் சமுதாயத்தையே தன் வசப்படுத்தி உள்ளது என்றால் மிகையாகாது.
அதனால் ஏற்படும் சாதனைகளும், வேதனைகளும் சொல்லிமாளாது. அதன் கொடூர
முகத்தை, கொங்கு மண்டலத்தில் அடுத்தடுத்து நடந்தேறிய இரு கொலைகள்
வெளிச்சம் போட்டு காட்டியுள்ளன.


ஈரோடு
மாவட்டம், காங்கேயம் அனைத்து மகளிர் போலீஸ் ஸ்டேஷனில் போலீசாக பணி
புரிந்தவர் ஜெயமணி (39). கடந்த ஆகஸ்ட் 23ம் தேதி, திருப்பூரில் நடந்த
துணைமுதல்வர் ஸ்டாலின் விழா பந்தோபஸ்துக்கு வந்தவர், மீண்டும் வீடு
திரும்பியபோது மாயமானார்.செப்.,18ம் தேதி பெருமாநல்லூர் அருகே வலசுபாளையம்
சுடுகாட்டில் பிணமாக கண்டெடுக்கப்பட்டார். அவரின் மொபைல் போன் மாயமாகி
இருந்தது. அதை விசாரித்த போது, அது சேலத்தில் ஒருவரிடம் இருந்தது. சேலம்
மாவட்டம் இடைப்பாடி அருகே கனியாம்பட்டியைச் சேர்ந்த லாரி டிரைவர்
ஜெய்சங்கர் (32) என்பவரிடம் அவர் வாங்கியது தெரியவந்தது. இரவு நேரத்தில்
சாலையில் நின்று, லிப்ட் கேட்ட ஜெயமணியை கொலை செய்த ஜெய்சங்கர் கைது
செய்யப்பட்டான். இவ்வழக்கில் போலீசாருக்கு ஒரே ஒரு துப்பு கிடைத்தது
ஜெயமணியின் மொபைல் போன் தான். அதன் ஐ.எம்.இ.ஐ., எண்ணை வைத்து தான்
கொலையாளியை போலீசார் கைது செய்தனர்.


கோவை
பீளமேட்டை சேர்ந்தவர் காயத்ரி மாலா (33). சேலம் பெண்கள் கிளைச்சிறை
காவலர். கடந்த அக்., 31ம் தேதி, சேலத்தில் இருந்து கோவை கிளம்பிய மாலா
மாயமானார். அவர் மொபைல் போன் "சுவிட்ச் ஆப்' செய்யப்பட்டிருந்தது.சங்ககிரி
ஆவாரம்பாளையம் ஏரி பகுதியில் மாலா பிணமாக கிடந்தார். போலீஸ் விசாரணையில்,
சிறையில் இருந்த ஆயுள் கைதி சரவணனுடன் ஏற்பட்ட கள்ளத்தொடர்பால் மாலா
கொல்லப்பட்டது தெரியவந்தது.பரோலில் வெளியே வந்து, தலைமறைவான சரவணனுடன்
தொடர்பு கொள்ள மாலாவிற்கு உதவியதும், அவரை சாகடிக்க சரவணனுக்கு உதவியதும்
மொபைல் போன் தான். கடைசியாக, சரவணன் மூன்று முறை மாலாவை தொடர்பு கொண்டதை
காட்டி கொடுத்ததும் அதே மொபைல் போன் தான்.

இவைகளைப்
பார்க்கும் போதும், சென்னையில் நடந்த சில கொலைகளில் துப்புத்துலக்கும்
போதும் மொபைல் போன் தகவல்கள் சில ஆணித்தரமான ஆதாரங்களைத்
தந்திருக்கிறது.இனி கிரிமினல் குற்றவழக்குகள் என்றால் , மற்ற காரணிகளை விட
மொபைல்போன் மிகுந்த முக்கியத்துவம் வாய்ந்த தகவல் தரும் காரணியாக
இருக்கும் என்ற கருத்து எழுந்திருக்கிறது