மீனவர் பிரச்சினைக்கு நிரந்தர தீர்வு– மோடிதான் காணவேண்டும்

இலங்கைக்கும், தமிழ்நாட்டுக்கும் உள்ள மீனவர் பிரச்சினைக்கு என்றுதான் விடை கிடைக்குமோ? என்று தெரியாமல், ஒவ்வொரு நாளும் இடியாப்ப சிக்கல்போல பிரச்சினை சிக்கலாகிக்கொண்டே இருக்கிறது. இப்போதுகூட தமிழ்நாட்டில் இருந்து கடலில் மீன்பிடிக்க சென்ற 29 மீனவர்களை, இலங்கை கடற்படை கைது செய்து, அவர்களது 3 படகுகளையும் கைப்பற்றி யுள்ளது. நிலத்தில்தான் எல்லை, கடலில் ஏது எல்லை என்ற அடிப்படையில் காலம்காலமாக பாக் ஜலசந்தி யாருக்கு சொந்தம் என்று இல்லாமல், இருநாட்டு மீனவர்களும் சர்வசுதந்திரமாக இருபக்கமும் போய் மீன்பிடித்துக் கொண்டிருந்தனர். 2009–ம் ஆண்டு வரை இந்த நிலைதான் நீடித்தது. அதற்கு பிறகுதான் இருதரப்புக்கும் இடையே மோதல், சச்சரவுகள் தொடங்கியது. இருதரப்புக்கும் இடையே ஒரு சுமுக உறவை ஏற்படுத்த அரசு தரப்பில் எடுத்த முயற்சி களெல்லாம் இதுவரையில் தோல்வியிலேயே முடிந்தது. சரி பாதிக்கப்படுவது மீனவர்கள் தானே, அவர்களே தங்கள் பிரச்சினைகளை உட்கார்ந்து பேசி ஒரு தீர்வு காணட்டும் என்ற வகையில், சென்னையில் கடந்த ஆண்டு ஜனவரி மாதம் 27–ந் தேதி பேச்சுவார்த்தை நடந்தது. இந்த பேச்சுவார்த்தையின் போதும், பிறகு மே மாதம் 12–ந் தேதி கொழும்பில் நடந்த பேச்சுவார்த்தையிலும் நல்ல தீர்வு எட்டப்படாமல் தோல்வியிலேயே முடிந்தது. இப்போது மீண்டும் நாளை சென்னையில் நடத்த திட்டமிட்டுள்ள பேச்சுவார்த்தையும் தள்ளி வைக்கப்பட்டுள்ளது.

வடக்கு மாகாணத்தில் உள்ள தமிழ் மக்களுக்கு இத்தனை ஆண்டுகளாக ஒரு பிரச்சினை என்றால், துடிதுடித்துப்போவது தமிழ்நாட்டு மக்கள்தான். ஆனால், அவர்கள் இப்போது தமிழக மீனவர்கள் சர்வதேச எல்லையைத் தாண்டி மீன்பிடிக்க வருவதை, இலங்கை அனுமதிக்காது என்று திட்டவட்டமாக இந்தியாவுக்கு தெரிவிக்கவேண்டும் என்பதில் உறுதியாக இருக்கிறார்கள் என்றும், இந்திய மீனவர்கள் பெரிய மீன்பிடி படகுகளை பயன்படுத்த மாட்டார்கள், மீன்வளத்தை அழிக்கும் வகை யிலான மீன்பிடி முறைகளை மேற்கொள்ளமாட்டார்கள் என்று இந்திய அரசாங்கத்திடம் உறுதி வாங்கவேண்டும் என்றும் சொல்வதாக இலங்கை மீன்வளத்துறை டைரக்டர் ஜெனரல் கூறுகிறார். மேலும், சமீபத்தில் ‘தந்தி’ டி.வி.க்கு பேட்டி அளித்த தமிழ் தேசிய கூட்டமைப்பு எம்.பி.க்கள் செல்வம் அடைக்கல நாதன், ஸ்ரீதரன் ஆகிய இருவருமே, தமிழக மீனவர்கள் எல்லை தாண்டிவரக்கூடாது என்பதில் உறுதியாக கருத்து தெரிவித்தனர்.

ஆக, தமிழக மீனவர்களை எல்லை தாண்டிவரக்கூடாது என்று கூறுவதில் இலங்கையில் உள்ள தமிழர்கள்தான் உறுதியாக இருக்கிறார்கள். எல்லை தாண்டி செல்லவில்லை யென்றால், வேறு என்ன பிரச்சினை இருக்கிறது. தமிழக மீனவர்களைப் பொறுத்தவரையில், பாரம்பரியமாக மீன்பிடித்து வந்த உரிமையைக் கேட்கிறார்கள். ஆக, இந்த பிரச்சினைக்கு ஒரு நிரந்தர தீர்வு காண்பது என்பது இந்த மாதம் இலங்கைக்கு செல்லும் பிரதமர் மோடியின் கையில்தான் இருக்கிறது. பாக் ஜலசந்தி மீன்பிடி ஆணையம் அமைத்து, இருநாடுகளுக்கும் பிரதிநிதித்துவம் அளித்து, இருவருமே இருபக்கமும் தடையில்லாமல் சென்று வருவதற்குரிய சில ஒழுங்குமுறைகளை வகுத்து, அதை நிறைவேற்றும் வகையில் இருநாட்டு அரசாங் கங்களுமே உறுதுணையாக இருக்கவேண்டும் என்றும் ஒரு யோசனை நிபுணர்களால் கூறப்படுகிறது. இதையும் 2009–ம் ஆண்டுக்கு முன்பிருந்த பரஸ்பர உறவை புதுப்பிக்கவும், இலங்கை சிறைகளை தமிழக மீனவர்களால் நிரப்பப்படுவதை தவிர்க்கவும், மோடியின் இலங்கை பயணம் வழிவகுக்கவேண்டும் என தமிழர்கள் வாழ்த்து கிறார்கள். ஆக, இந்த பிரச்சினைக்கு தீர்வு காணுவது இனி மோடியிடம்தான் இருக்கிறது.

தினத்தந்தி