2ம்-4ம் சனிக்கிழமைகளில் இனி வங்கிக்கு முழுநாள் விடுமுறை!

**krishnaamma** · **krishnaamma** Mon Feb 23, 2015 8:33 pm

இரண்டாம்-நான்காம் சனிக்கிழமைகளில் இனி வங்கிக்கு முழுநாள் விடுமுறை: விரைவில் நடைமுறைக்கு வருகின்றது1

மும்பை, பிப்.23-

ஊதிய உயர்வு, வங்கிகளில் காலிப் பணியிடங்களை நிரப்புவது உள்பட பல்வேறு கோரிக்கைகளை வலியுறுத்தி, நாளை மறுநாள் (பிப்ரவரி 25) முதல் நான்கு நாள்கள் தொடர் வேலை நிறுத்தத்தில் ஈடுபடப் போவதாக வங்கி ஊழியர்கள் அறிவித்திருந்தனர். இதனையடுத்து, இன்று மும்பையில் நடைபெற்ற பேச்சுவார்த்தையில் ஊழியர்களின் முக்கிய கோரிக்கைகளை ஏற்றுக் கொண்ட வங்கிகள் கூட்டமைப்பு நிர்வாகிகள் 15 சதவீத சம்பள உயர்வுக்கும் ஒப்புக் கொண்டதால் ஏற்கனவே திட்டமிட்டிருந்த 4 நாள் வேலை நிறுத்தத்தை வாபஸ் பெறுவதாக வங்கி ஊழியர்கள் சங்க நிர்வாகிகள் இன்று மாலை அறிவித்துள்ளனர்.

இந்நிலையில், வங்கி ஊழியர்களின் முக்கிய கோரிக்கைகளில் ஒன்றாக வாரந்தோறும் சனிக்கிழமைகளில் அனைத்து அரசுத்துறை வங்கிகளுக்கும் முழுநாள் விடுமுறை அளிக்க வேண்டும் என்பதும் ஒன்றாக முன்வைக்கப்பட்டது. இந்த கோரிக்கைக்கு ‘அரை சமரசம்’ என்னும் வகையில் மாதத்தின் இரண்டாம் மற்றும் நான்காம் சனிக்கிழமைகளில் வங்கிகளுக்கு முழுநாள் விடுமுறை அளிப்பது என்றும், எஞ்சிய சனிக்கிழமைகளில் அந்தந்த வங்கிகள் தற்போது செயல்பட்டு வரும் வேலை நேரங்களையே தொடர்வது என்றும் இன்றைய கூட்டத்தில் முடிவு செய்யப்பட்டதாக தெரிகின்றது.

இதற்கான அதிகாரபூர்வ அறிவிப்பு விரைவில் வெளியாகும் என்றும், அதன் பின்னர் இந்த அறிவிப்பு நடைமுறைக்கு வரும் எனவும் எதிர்பார்க்கப்படுகின்றது.

மாலைமலர்