ராணுவ ரகசியங்களையும் திருட முயற்சி: ஆவணங்கள் திருட்டில் மேலும் 25 பேருக்கு தொடர்பு

டெல்லியில் மத்திய அமைச்சகங்களின் ரகசிய ஆவணங்கள் திருடி விற்பனை செய்யப்பட்டிருப்பது நாடெங்கும் அதிர்ச்சியை ஏற்படுத்தி இருக்கிறது. கடந்த 2 மாதங்களாக டெல்லி போலீசார் ரகசியமாக விசாரணை நடத்தி ‘பொறி’ வைத்து சிலரை பிடித்து நீண்ட நாட்களாக நடந்து வந்த இந்த திருட்டை வெளிச்சத்துக்கு கொண்டு வந்துள்ளனர்.

டெல்லி சாஸ்திரி பவனில் உள்ள பெட்ரோலியம் மற்றும் இயற்கை எரிவாயு அமைச்சக அலுவலகத்தில் கடந்த ஆண்டு ஒரு நாள் கோப்புகள் சிதறி கிடந்தன. அடுத்த நாள் பெட்ரோலிய அமைச்சகத்தில் எடுக்கப்பட்ட முடிவுகள் மற்றும் முக்கிய தகவல்கள் நாளிதழ்களிலும் இணையத் தளங்களிலும் வெளியாகி இருந்தன. எப்படி இந்த தகவல்கள் வெளியில் கசிந்தன என்று பிரதமர் அலுவலகம் உத்தரவிட்டதின் பேரில் போலீசார் ரகசியமாக விசாரணை நடத்தினார்கள்.

ரகசிய கண்காணிப்பு கேமிராக்கள் பொருத்தப்பட்டும் சோதனை நடந்து வந்தது. இந்த நடவடிக்கைகளின் பயனாக பெட்ரோலிய அமைச்சக ஊழியர்களே அரசு ஆவணங்களை திருடி விற்பது கண்டுபிடிக்கப்பட்டது. இதைத் தொடர்ந்து பெட்ரோலியத்துறை ஊழியர்கள் ஆசாராம், ஈஸ்வர்சிங், ரிலையன்ஸ் பெட்ரோலிய நிறுவன ஊழியர் ராஜ்குமார் சவுத்திரி, இடைத்தரகர்கள் லல்தா பிரசாத், ராகேஷ் குமார் ஆகிய 5 பேரை டெல்லி போலீசார் கடந்த வியாழக்கிழமை கைது செய்தனர்.

அவர்கள் 5 பேரிடம் நடத்தப்பட்ட விசாரணையைத் தொடர்ந்து முன்னாள் பத்திரிகையாளர் சாந்தனு சைக்கியா, எரிபொருள்துறை ஆலோசகர் பிரயாஸ் ஜெயின் ஆகிய இருவரும் நேற்று காலை கைது செய்யப்பட்டனர். தொடர்ந்து டெல்லி முழுவதும் மத்திய அரசு மற்றும் தனியார் நிறுவன அதிகாரிகளின் வீடுகளில் போலீசார் அதிரடி வேட்டை நடத்தினார்கள்.

அப்போது ரிலையன்ஸ் நிறுவனத்தின் மேலாளர் சைலேஷ் சக்சேனா, ஜூப்லிகண்ட் எரிபொருள் நிறுவன மூத்த நிர்வாகி சுபாஷ் சந்திரா, அம்பானி ரிலையன்ஸ் நிறுவன அதிகாரி ரிஷி ஆனந்த், எஸ்ஸார் நிறுவன அதிகாரி வினய்குமார், காய்ர்ன்ஸ் நிறுவன அதிகாரி கே.கே.நாயக் ஆகிய 5 பேரை நேற்றிரவு போலீசார் கைது செய்தனர். இதனால் ஆவணங்கள் திருட்டு விவகாரத்தில் கைதானவர்கள் எண்ணிக்கை 12 ஆக உயர்ந்தது.

இந்த நிலையில் பெட்ரோலியம் அமைச்சகம் மட்டுமின்றி மேலும் சில அமைச்சகங்களின் ஆவணங்களும் திருடப்பட்டது நேற்றிரவு தெரிய வந்தது. கைதான 12 பேர் வீடுகளில் இருந்து 2 பெட்டிகள் நிறைய திருடப்பட்ட ஆவணங்கள் பறிமுதல் செய்யப்பட்டன. அதில் இயற்கை எரிவாயு தொடர்பாக வரும் 28–ந்தேதி தாக்கல் செய்யப்பட உள்ள பட்ஜெட்டின் 2 பக்கங்களும் இருந்தது குறிப்பிடத்தக்கது.

பெட்ரோலிய அமைச்சகத்தின் 9 முக்கிய ஆவணங்கள் திருடப்பட்டது கண்டு பிடிக்கப்பட்டுள்ளது. இது தொடர்பாக மேலும் 25 பேரிடம் போலீசார் விசாரணை நடத்தி வருகிறார்கள். அந்த 25 பேருக்கும், அரசு ஆவணங்கள் திருட்டில் முக்கிய பங்கு இருப்பது தெரிய வந்துள்ளது. எனவே அவர்கள் 25 பேரும் விரைவில் கைது செய்யப்படுவார்கள் என்று எதிர்பார்க்கப்படுகிறது.

அரசு ஆவணங்கள் திருடப்பட்டுள்ள 5 அறைகளுக்கு போலீசார் சீல் வைத்துள்ளனர். அந்த அறைகளில் பணி புரிபவர்களின் வீடுகளில் சோதனை நடந்து வருகிறது. இதற்காக டெல்லி போலீசில் தனி விசாரணைக்குழு உருவாக்கப்பட்டுள்ளது.

அவர்கள் இன்று தங்கள் அதிரடி வேட்டையை தொடங்கினார்கள். அரசின் ரகசிய ஆவணங்களை பணம் கொடுத்து வாங்கிய தனியார் நிறுவனங்கள், எத்தகைய முறைகேடுகளில் ஈடுபட்டன என்ற விசாரணையும் தொடங்கப்பட்டுள்ளது.

இதுவரை நடந்துள்ள விசாரணைகள் மூலம், டெல்லியில் உள்ள அமைச்சகங்களின் அலுவலகங்களில் ஆவணங்களை திருடி விற்பதற்கு என்றே சிலர் ஒருங்கிணைந்து செயல்பட்டு வந்தது கண்டுபிடிக்கப்பட்டுள்ளது. கடந்த 10 ஆண்டுகளாக அவர்கள் அரசு ஆவணங்களை திருடி உள்ளனர்.

ஒரு தடவை இந்த கும்பல் ராணுவ ரகசியங்களையும் திருட முயன்றது. ஆனால் ராணுவ அமைச்சகத்தில் இந்த கும்பலால் ஊடுருவ முயலவில்லை என்று தெரிய வந்துள்ளது.

தொடர்ந்து நடைபெறும் விசாரணைகளில் மேலும் திடுக்கிடும் தகவல்கள் வெளியாகும் என்று எதிர்பார்க்கப்படுகிறது. அரசு ஆவணங்களை திருடி விற்றவர்களுக்கு கடும் தண்டனை அளிக்க மத்திய அரசு தீவிர நடவடிக்கையை தொடங்கியுள்ளது.-maalaimalar

என்னப்பா இது ....நம் நாடு ஏன் இப்படி போய் கொண்டு இருக்கிறது ?????